Roma 4 - Samoan Contemporary New Testament

O Aperaamo le Fa‘aa‘oa‘oga

¹ O le ā nei sa tatou ‘upu e fai e uiga ‘iā Aperaamo lo tatou tamā fa‘aletino?

² Auā ana ta‘uamiotonuina Aperaamo i galuega, po ‘ua i ai se mea e mitamita ai o ia; peita‘i e leai se mea e mitamita ai o ia i luma o le Atua.

³ Auā, o le ā ‘ea le mea o lo‘o fai mai ai le Tusi? “Na fa‘atuatua Aperaamo i le Atua, ‘ona ta‘ua ai lea o ia o le tagata amiotonu.”

⁴ O le totogi o le tagata faigaluega e lē mafai ‘ona ta‘ua o le meaalofa, a o le taui lava o lana galuega.

⁵ A o le tagata e lē galue, ‘ae fa‘atuatua i lē na te ta‘uamiotonuina le tagata e lē mata‘u, e ta‘ua lona fa‘atuatua o le amiotonu.

⁶ Sa fa‘apea fo‘i ‘ona folafola atu e Tavita le fa‘a‘amu‘ia i le tagata ‘ua ta‘uamiotonuina e le Atua e aunoa ma galuega:

⁷ “ ‘Amu‘ia ē ‘ua fa‘amāgaloina o latou solitulafono, ma ‘ua ufitia a latou agasala.

⁸ ‘Amu‘ia le tagata e lē ta‘usalaina o ia e le Ali‘i.”

⁹ Po ‘ua gata ‘ea i lē ‘ua peritomeina lenei fa‘a‘amu‘ia? E lē aofia ai ‘ea ma lē e le‘i peritomeina? Auā ‘ua tatou fai ane, “ ‘Ua ta‘ua le fa‘atuatua o Aperaamo o le amiotonu.”

¹⁰ O fea le taimi na ta‘ua ai o ia fa‘apea? ‘Ina ‘ua uma ‘ea ‘ona peritomeina, pe a o le‘i peritomeina? E le‘i ta‘ua ‘ina ‘ua uma ‘ona peritomeina, ‘ae na ta‘ua a o le‘i peritomeina.

¹¹ ‘Ua maua fo‘i e ia le fa‘ailoga o le peritome, e fa‘amaonia ai lana amiotonu i le fa‘atuatua sa i ai lava a o le‘i peritomeina o ia. ‘Ua tupu lea mea ‘ina ‘ia ‘avea ai Aperaamo ma tamā o i latou uma o ē e fa‘atuatua ‘ae le‘i peritomeina, ma ‘ua ta‘uamiotonuina ai i latou.

¹² E fa‘apenā fo‘i ‘ona ‘avea o ia ma tamā o ē ‘ua peritomeina; o i latou ia e lē gata ‘ina ‘ua peritomeina, a ‘ua mulimuli atu fo‘i i le fa‘aa‘oa‘oga o le fa‘atuatua sa i lo tatou tamā o Aperaamo, a o le‘i peritomeina o ia.

‘Ua Talia i le Fa‘atuatua le Folafolaga a le Atua

¹³ E le‘i folafolaina atu ‘iā Aperaamo, po o lana fānau, o le a ‘avea le lalolagi ma o latou tofi ‘ona o le tulafono, peita‘i ‘ona o le amiotonu i le fa‘atuatua.

¹⁴ Auā ‘āfai e tofia na o ē ‘ua i le tulafono, ‘ua leai la se aogā o le fa‘atuatua, ma ‘ua leai fo‘i se taunu‘uga o le folafolaga.

¹⁵ O le tulafono ‘ua tupu mai ai le to‘asā; peita‘i a leai se tulafono, ‘ona leai fo‘i lea o se solitulafono.

¹⁶ O le mea ‘ua ala mai ai i le fa‘atuatua le mea na folafolaina, ‘ina ‘ia maua i le alofa tunoa. ‘Ina ‘ia tumau ai ia i latou uma e tupuga mai uma lava ‘iā Aperaamo, e lē na o ē ‘ua i le tulafono, a o i latou uma ‘ua au fa‘atasi i lona fa‘atuatuaga, o ia o le tamā o i tatou uma.

¹⁷ E pei ‘ona tusia, “ ‘Ua ‘ou tofia oe e ‘avea ma tamā o nu‘u e tele,” i luma o le Atua lē ‘ua fa‘atuatua i ai o ia, lē e foa‘iina atu le ola i ē ‘ua oti, ma vala‘auina ia i ai mea sa lē i ai.

¹⁸ Na fa‘atuatua ma fa‘amoemoe o ia a o le‘i i ai se mea e fa‘amoemoe i ai, ‘ina ‘ia ‘avea o ia ma tamā o nu‘u e tele; e pei lava ‘ona ta‘uina mai ‘iā te ia, “O le a fa‘apea lava fo‘i lau fānau.”

¹⁹ E le‘i fa‘avaivaia lona fa‘atuatua i le manatu ifo i lona tino, ‘ua vaivai e peiseaī ‘ua oti, auā po ‘ua tusa ma le selau ona tausaga, pe manatu fo‘i i le manava o Sara e lē fānau.

²⁰ E le‘i fa‘alētonu lona fa‘atuatua i le mea na folafolaina e le Atua, peita‘i ‘ua fa‘amalosia atili lona fa‘atuatua a o tu‘uina atu e ia le vi‘iga i le Atua.

²¹ ‘Ua mautinoa fo‘i e ia e mafai e le Atua ‘ona fa‘ataunu‘u le mea na folafolaina mai e ia.

²² O le mea lea ‘ua ta‘ua ai lona fa‘atuatua o le amiotonu.

²³ Peita‘i, o ‘upu nei, “ ‘Ua ta‘ua ‘iā te ia,” e le‘i tusia fa‘apitoa tau o ia lava;

²⁴ ‘ae aofia ai fo‘i ma tatou. ‘Ua ta‘ua ‘iā te i tatou o ē ‘ua fa‘atuatua i le Atua, na fa‘atūina mai Iesu lo tatou Ali‘i nai ē ‘ua oti.

²⁵ Na tu‘uina atu o ia ‘ina ‘ia oti ‘ona o a tatou agasala, ma toe fa‘atūina mai ‘ina ‘ia ta‘uamiotonuina ai i tatou i luma o le Atua.