Roma 15 - Samoan Contemporary New Testament

‘Ia Fa‘afiafia atu i Isi Tagata

¹ O i tatou o ē e malolosi, ‘ia tatou fesoasoani atu i le vaivai o ē e vaivai, ‘ae ‘aua le fa‘afiafia i o tatou lava loto.

² ‘Ia ta‘itasi i tatou ma fa‘afiafia lē la te tuā‘oi, ‘ina ‘ia lelei ai o ia, ma a‘oa‘oina ai fo‘i.

³ Auā o Keriso e le‘i fa‘afiafia o ia ‘iā te ia lava; peita‘i, e pei ‘ona tusia: “ ‘Ua o‘o mai ‘iā te a‘u ‘upu fa‘atigā a i latou o ē na fa‘atigā ‘iā te oe.”

⁴ O mea uma fo‘i na tusia anamua, na tusia ‘ina ‘ia a‘oa‘o mai ai ‘iā te i tatou; ‘ina ‘ia tatou maua le fa‘amoemoe e tupu mai i le ‘onosa‘i, ma le fa‘amalosi mai o Tusi.

⁵ ‘Ia fesoasoani atu fo‘i ‘iā te ‘outou le Atua o lē e tupu mai ai le ‘onosa‘i ma le fa‘amalosi, ‘ina ‘ia ‘outou maua le loto gatasi, e tusa ma le finagalo o Keriso Iesu,

⁶ ‘ina ‘ia ‘outou vivi‘i atu i le Atua, le Tamā o lo tatou Ali‘i o Iesu Keriso, ma le loto e tasi ma le leo e tasi.

O le Tala Lelei mo Tagata o Nu‘u ‘Ese

⁷ O lea ‘ia ‘outou talia ai e le tasi le isi, fa‘apei ‘ona talia ‘outou e Keriso, mo le vi‘iga o le Atua.

⁸ ‘Ou te fai atu fo‘i, ‘ua ‘avea Keriso ma ‘au‘auna i ē ‘ua peritomeina, e fa‘aalia ai le fa‘amaoni o le Atua, ‘ina ‘ia fa‘amaonia ai mea na folafolaina i tamā ‘ua mavae,

⁹ ma ‘ia vivi‘i atu ai fo‘i tagata o Nu‘u ‘ese i le Atua ‘ona o le alofa, pei ‘ona tusia: “O le mea lea ‘ou te ta‘utino ai oe i Nu‘u ‘ese, ma ‘ou pese atu i lou suafa.”

¹⁰ ‘Ua toe fa‘apea mai fo‘i: “ ‘Ia ‘oli‘oli ‘outou Nu‘u ‘ese fa‘atasi ma lona nu‘u.”

¹¹ I le ma lea: “ ‘Ia vivi‘i atu i le Ali‘i ‘outou Nu‘u ‘ese uma lava, ma ‘ia fa‘ane‘ene‘e atu ‘iā te ia ‘outou tagata uma lava.”

¹² ‘Ua toe fa‘apea mai fo‘i Isaia: “E i ai le aa o Iese, o ia lea o le a tula‘i mai e pule i Nu‘u ‘ese, o ia fo‘i le fa‘amoemoe o Nu‘u ‘ese.”

¹³ O le Atua o le fa‘amoemoe, ia na fa‘atūtūmuina ‘outou i le ‘oli‘oli uma lava ma le filemū, ‘ina ‘ua ‘outou fa‘atuatua; ‘ina ‘ia saga tele ai pea lo ‘outou fa‘amoemoe ‘ona o le mana o le Agaga Pa‘ia.

O le Mafua‘aga na tusia ai le Tusi

¹⁴ O‘u uso e, ‘ua ‘ou mautinoa lava e a‘u ‘ua matuā tele lo ‘outou agalelei, ‘ua fa‘atūmulia fo‘i ‘outou i le poto uma lava, ‘ua mafai fo‘i e ‘outou ‘ona apoapoa‘i atu le tasi i le isi.

¹⁵ Peita‘i e i ai nisi mea ‘ua ‘ou tusi atu ai ma le lototele ‘iā te ‘outou, e fa‘amanatu atu, ‘ona o le alofa tunoa ‘ua foa‘iina mai ‘iā te a‘u e le Atua,

¹⁶ ‘ina ‘ia ‘avea a‘u ma ‘au‘auna a Keriso Iesu i Nu‘u ‘ese, ‘ou te faia le galuega fa‘aositaulaga i le Tala Lelei a le Atua; ‘ina ‘ia talia lelei le taulaga a Nu‘u ‘ese, ‘ina ‘ua fa‘apa‘iaina e le Agaga Pa‘ia.

¹⁷ O lea, o lo‘o ‘iā te a‘u mea e mitamita ai ‘ona o Keriso Iesu i mea tau le Atua.

¹⁸ Auā ‘ou te lē tautala atu fa‘amalosi e ta‘u atu ni mea e le‘i galue ai Keriso ‘iā te a‘u, ‘ina ‘ia usiusita‘i mai ai tagata o Nu‘u ‘ese, i ‘upu ‘atoa ma mea e fai,

¹⁹ i le mana o fa‘ailoga ma vāvega, i le mana o le Agaga Pa‘ia; o le mea lea ‘ua ‘ou matuā folafola atu ai le Tala Lelei a Keriso, e amata mai Ierusalema, ma fa‘ata‘amilomilo e o‘o atu i Iluriko.

²⁰ O lea fo‘i ‘ua ‘ou lototele ai lava e tāla‘i i mea sa le‘i ta‘ua muamua ai le suafa o Keriso; ‘ina ne‘i ‘ou ati a‘e i luga o le fa‘avae a se isi tagata.

²¹ ‘Ae peita‘i, e fa‘apei ‘ona tusia: “E vā‘ai i latou o ē na lē tala‘iina i ai le tala ‘iā te ia; e lagona fo‘i e i latou o ē na le‘i fa‘alogo ai.”

O le Tonu a Paulo e Asiasi i Roma

²² O lea fo‘i, e tele mea sa lē mafai ai ‘ona ‘ou alu atu ‘iā te ‘outou.

²³ A o lenei, ‘ua leai se mea o toe ‘ou te faia i nu‘u nei, ma ‘ua tele fo‘i tausaga sa ‘ou matuā fia alu atu ai ‘iā te ‘outou;

²⁴ a ‘ou alu atu nei la i la‘u malaga i Sepania, ‘ua ‘ou fa‘amoemoe ‘ou te asiasi atu ‘iā te ‘outou, ma ‘ia ‘outou momoliina a‘u i lea mea pe a uma sa tatou feiloa‘iga fiafia ma ‘outou.

²⁵ A o le a ‘ou malaga nei i Ierusalema, ‘ou te ‘au‘auna atu ai i le au pa‘ia;

²⁶ auā ‘ua loto Maketonia ma Akaia e saunia se meaalofa faitele i ē e matitiva o le au pa‘ia o i Ierusalema.

²⁷ ‘Ua loto fo‘i i ai i latou; ma o lo‘o nofo ‘aitalafu ai fo‘i i latou; auā ‘āfai ‘ua molia e tagata Iutaia i Nu‘u ‘ese a latou mea fa‘aleagaga, e tatau fo‘i la i tagata o Nu‘u ‘ese ‘ona fesoasoani i tagata Iutaia i mea fa‘aletino.

²⁸ O lenei, a o‘o ‘ina ‘ou fa‘aumaina lenei mea, ma fa‘ao‘o atu ‘iā te i latou lea meaalofa, ‘ona ‘ou ui atu ai lea ‘iā te ‘outou aga‘i i Sepania.

²⁹ ‘Ua ‘ou iloa fo‘i, a ‘ou alu atu ‘iā te ‘outou, ‘ou te alu atu ma le ‘ato‘atoa o le manuia o le Tala Lelei a Keriso.

³⁰ Uso e, ‘ou te ‘ai‘oi atu ‘iā te ‘outou, ‘ona o lo tatou Ali‘i o Iesu Keriso, ma le alofa o le Agaga, ‘ia ‘outou matuā fa‘amalosi fa‘atasi ma a‘u e tatalo i le Atua mo a‘u.

³¹ ‘Ina ‘ia lavea‘iina a‘u nai ē ‘ua lē fa‘atuatua o i Iutaia, ia talia lelei fo‘i e le au pa‘ia la‘u sāvali i Ierusalema.

³² ‘Ina ‘ia ‘ou alu atu ‘iā te ‘outou ma le ‘oli‘oli, i le finagalo o le Atua, ‘ina ‘ia tatou fefa‘amafanafanaa‘i ma ‘outou.

³³ ‘Ia ‘iā te ‘outou uma lava le Atua e ona le manuia. Amene.