Roma 11 - Samoan Contemporary New Testament

O le Alofa o le Atua ‘iā Isaraelu

¹ O lenei, se‘i ‘ou fesili atu: ‘Ua lafoa‘iina ‘ea e le Atua lona lava nu‘u? E leai lava! O a‘u fo‘i o le Isaraelu, e tupuga mai ‘iā Aperaamo, o le itū‘āiga o Peniamina.

² E le‘i lafoa‘iina e le Atua lona nu‘u na silafia e ia anamua. Tou te lē iloa ‘ea le mea ‘ua fai mai ai le Tusi i le tala ia Elia? Na molia Isaraelu e ia i luma o le Atua:

³ “Le Ali‘i e, ‘ua fasiotia e i latou au perofeta, ma ‘ua soloia ou fatafaitaulaga; ‘ua na o a‘u lava o lo‘o totoe, a ‘ua sā‘ili mai fo‘i i latou e fasioti a‘u.”

⁴ A o le ā la le tali a le Atua ‘iā te ia? “ ‘Ua ‘ou fa‘atotoeina mo a‘u le to‘afituafe o tagata, o ē e le‘i to‘otuli lava ia Paala.”

⁵ E fa‘apenā fo‘i aso nei, o lo‘o i ai ē o totoe e tusa ma le filifiliga o le alofa tunoa.

⁶ ‘Āfai la o le alofa tunoa, o lona uiga e lē o galuega; ana fa‘apenā po ‘ua lē toe ta‘ua le alofa tunoa o le alofa tunoa.

⁷ O lenei, a fa‘apefea ‘ea? E le‘i maua e Isaraelu le mea na sā‘ilia e ia. O le mea lenā ‘ua maua e ē ‘ua filifilia, a ‘ua fa‘ama‘a‘aina loto o ē ‘ua lē filifilia.

⁸ E pei ‘ona tusia: “ ‘Ua tu‘uina atu e le Atua ‘iā te i latou le loto moe gase, ma mata e lē va‘ai ai, ‘atoa ma taliga e lē lagona ai, ‘ua o‘o mai lava i le aso nei.”

⁹ ‘Ua fai mai fo‘i Tavita, “ ‘Ia liua la latou tausamiga e fai ma mailei, ia ‘avea ma matāsele ma mea e fa‘asesēina ai, ia fai fo‘i ma taui ‘iā te i latou;

¹⁰ ia fa‘apouliuligia o latou mata ‘ina ‘ia lē vā‘ai, ia fa‘ano‘uno‘u fo‘i o latou tua e lē aunoa.”

¹¹ O lenei, se‘i ‘ou fesili atu: ‘Ua fa‘asesēina ‘ea i latou ‘ina ‘ia pa‘u‘ū ai? E leai lava! A ‘ona o la latou agasala ‘ua o‘o ai le ola i Nu‘u ‘ese, ‘ina ‘ia tupu ai lo latou losilosi.

¹² O lea, ‘āfai ‘ua ‘avea le agasala a Isaraelu ma tamao‘āiga mo le lalolagi, ma ‘āfai e ‘avea lo latou to‘ilalo ma tamao‘āiga o Nu‘u ‘ese, e lē sili ai ‘ea ‘ona fa‘apea o lo latou manuia?

O le Fa‘aolataga mo Nu‘u ‘ese

¹³ ‘Ou te fai atu ‘iā te ‘outou tagata o Nu‘u ‘ese, ‘ona o a‘u o le ‘aposetolo o Nu‘u ‘ese, o le mea lea ‘ou te mitamita ai i la‘u galuega.

¹⁴ Atonu e mafai ‘ona ‘ou fa‘atupuina le losilosi i tagata o lo‘u lava nu‘u, ‘ina ‘ia fa‘aolaina ai i latou.

¹⁵ ‘Āfai ‘ua maua le leleiga e le lalolagi ‘ina ‘ua lafoa‘iina Isaraelu, e fa‘apefea pe a o‘o ‘ina toe ‘amia i latou? E lē o le ola ‘ea lea nai ē ‘ua oti?

¹⁶ ‘Āfai e pa‘ia se vaega o le paluga ‘ua ofoina atu e ‘avea ma ulua‘i fua, e fa‘apea fo‘i ‘ona pa‘ia ai le paluga ‘atoa; ‘āfai e pa‘ia le pogai, e fa‘apea fo‘i ‘ona pa‘ia lālā.

¹⁷ ‘Āfai fo‘i na gaui ‘ese nisi ‘ona lālā, a o oe o le olive vao, ‘ua fa‘apipi‘ina oe i ai e fai ma sui o i latou, ‘ina ‘ia tofusia fa‘atasi ‘outou ma i latou i le pogai ma le sua o le olive.

¹⁸ O lea, ‘aua ‘e te mitamita i ona lālā. ‘Āfai ‘e te mitamita, ia e manatua, ‘ua lē o ola le pogai ‘iā te oe, a ‘ua e ola i le pogai.

¹⁹ Atonu o le a e fai mai, “ ‘Ua gaui‘eseina ona lālā, ‘ina ‘ia fa‘apipi‘iina ai a‘u.”

²⁰ E moni lava. ‘Ua gaui‘eseina i latou ‘ona o lo latou lē fa‘atuatua, a o lo‘o tumau oe ‘ona o le fa‘atuatua; o lea, ‘aua ‘e te fa‘amaualuga, a ‘ia e mata‘u.

²¹ Auā ‘āfai ‘ua lē fa‘asaoina e le Atua lālā na tutupu mai ai, o le a lē fa‘asaoina fo‘i oe.

²² Se‘i silasila i le agalelei ma le to‘asā o le Atua: e o‘o atu lona to‘asā i e na pa‘u‘ū, a o lona agalelei e o‘o atu ‘iā te oe, pe ‘āfai ‘e te tumau ai i lona agalelei; ‘ae ‘āfai e lē fa‘apenā, ‘ona gaui‘eseina lea o oe.

²³ O i latou fo‘i, ‘āfai e lē tumau pea i le lē fa‘atuatua, e toe fa‘apipi‘iina i latou; auā e mafaia e le Atua ‘ona toe fa‘apipi‘iina i latou.

²⁴ Auā ‘āfai ‘ua sala‘eseina oe nai le olive vao na e tupu mai ai, ma ‘ua fa‘apipi‘iina oe i le olive lelei, ‘e te le‘i tupu mai ai, o le a sili atu ai ‘ona fa‘apipi‘iina gofie lālā moni o le olive na tutupu mai ai.

O le Alofa o le Atua mo Tagata Uma

²⁵ Uso e, ‘ou te loto ‘ina ‘ia ‘outou iloa le mea lilo lenei, ‘ina ne‘i ‘outou fa‘afiapopoto; ‘ua fa‘ama‘a‘aina loto o nisi o Isaraelu, se‘ia o‘o ‘ina ulufale mai tagata uma o Nu‘u ‘ese;

²⁶ ‘ona fa‘aolaina lea o Isaraelu ‘atoa uma, e pei ‘ona tusia: “E maliu mai le Fa‘aola mai Siona, na te fa‘ate‘a‘eseina le amio fa‘alēmata‘u ia Iakopo.

²⁷ O la‘u feagaiga fo‘i lenei ma i latou pe a ‘ou ‘ave‘eseina a latou agasala.”

²⁸ O fili i latou o le Atua, e tusa ma le Tala Lelei, ‘ona o ‘outou; a ‘ua alofaina i latou, e tusa ma le filifiliga, ‘ona o latou tamā na tupuga mai ai.

²⁹ Auā e lē salamō le Atua i ana mea e foa‘ifuaina mai, ‘atoa ma lana vala‘au.

³⁰ Auā e fa‘apei o ‘outou fo‘i, sa ‘outou lē fa‘alogo anamua i le Atua, a o lenei ‘ua alofaina ‘outou ‘ona ‘ua lē fa‘alogo i latou;

³¹ e fa‘apea fo‘i i latou ‘ua lē fa‘alogo i aso nei, ‘ina ‘ia alofaina i latou fo‘i ‘ona o le alofaina o ‘outou.

³² Auā ‘ua ufitia e le Atua tagata uma lava i le lē fa‘alogo, ‘ina ‘ia alofaina e ia tagata uma lava.

‘Ia Vi‘ia le Atua

³³ E! le loloto o le tamao‘āiga o le poto ma le silafaga a le Atua! E lē masu‘esu‘eina ana fa‘amasinoga; e lē mafai fo‘i ‘ona iloa ona ala.

³⁴ Auā o ai ‘ea ‘ua na iloa le finagalo o le Ali‘i? O ai fo‘i lē e mafai ‘ona ‘avea ma ona faufautua?

³⁵ O ai sē ‘ua na mua‘i avatua ni mea ‘iā te ia, ‘ina ‘ia tauia mai?

³⁶ Auā na pogai mai ‘iā te ia mea uma lava, na faia fo‘i e ia, ma o le a i‘u atu fo‘i ‘iā te ia mea uma; ia ‘iā te ia le vi‘iga e fa‘avavau lava. Amene.