Roma 1 - Samoan Contemporary New Testament

O ‘Upu Fa‘afeiloa‘i

¹ O a‘u o Paulo le ‘au‘auna a Iesu Keriso, na vala‘auina e ‘avea ma ‘aposetolo, ma ‘ua tofia e tāla‘i le Tala Lelei a le Atua.

² O lenei Tala Lelei sa folafolaina mai e ia anamua, e ala i ana perofeta i Tusi Pa‘ia.

³ O le Tala Lelei lea e uiga i lona Alo, o lē na tupu mai i le ‘āiga o Tavita, e tusa ma lona itū i le tino,

⁴ ma o le Alo o le Atua e tusa ma lona itū pa‘ia i le Agaga, ‘ua fa‘aalia ma le mana tele ‘ina ‘ua toetū mai o ia nai ē ‘ua oti; o Iesu Keriso lava lea lo tatou Ali‘i.

⁵ O ia ‘ua tatou maua ai le alofa tunoa ma le galuega fa‘a‘aposetolo, ‘ina ‘ia ta‘ita‘iina mai nu‘u uma i le fa‘atuatua ma le usiusita‘i ‘ona o lona suafa,

⁶ e aofia ai ma ‘outou o ē ‘ua vala‘auina ‘ina ‘ia ‘avea mo Iesu Keriso.

⁷ O ‘outou uma lava o lo‘o i Roma o ē ‘ua alofa i ai le Atua, ma ‘ua vala‘auina e ‘avea ma ona tagata: ‘Ia ‘iā te ‘outou le alofa tunoa ma le manuia mai le Atua lo tatou Tamā, ma le Ali‘i o Iesu Keriso.

O le Tatalo Fa‘afetai

⁸ E muamua ‘ona ‘ou fa‘afetai i lo‘u Atua e ala ‘iā Iesu Keriso ‘ona o ‘outou uma, auā ‘ua iloa lo ‘outou fa‘atuatua i le lalolagi ‘atoa.

⁹ E molimau le Atua, o lē o lo‘o ‘ou ‘au‘auna i ai ma lo‘u agaga ‘atoa i le Tala Lelei a lona Alo, e lē aunoa ‘ona ‘ou ta‘uta‘uina atu ‘outou i a‘u tatalo.

¹⁰ ‘Ua ‘ou ōle atu fo‘i i le Atua, ‘āfai e tusa ai i lona finagalo, ia mafai lava ‘ona ‘ou alu atu ‘iā te ‘outou.

¹¹ Auā ‘ua ‘ou naunau tele e feiloa‘i ma ‘outou, ‘ina ‘ia ‘ou avatu ‘iā te ‘outou se meaalofa fa‘aleagaga ia fa‘amalosia ai ‘outou.

¹² O lona uiga, ‘ia mafai e i tatou, o ‘outou ma a‘u, ‘ona fa‘amalolosiina i le fetufaa‘i o lo tatou fa‘atuatua.

¹³ O‘u uso e, ‘ou te mana‘o ‘ina ‘ia ‘outou iloa e tele taimi sa ‘ou fa‘amoemoe ai ‘ou te alu atu ‘iā te ‘outou, ‘ae peita‘i e le‘i fa‘ataunu‘uina lava. ‘Ua ‘ou mana‘o lava ia maua ni fua mai ‘iā te ‘outou, ‘atoa ma tagata o Nu‘u ‘ese.

¹⁴ O lo‘o ‘ou nofo ‘aitalafu i tagata uma, o tagata Eleni ma tagata e lē o ni Eleni; o tagata a‘oa‘oina ‘atoa ma ē e le‘i a‘oa‘oina.

¹⁵ O le mea lea ‘ua ‘ou naunau tele ai e folafola atu le Tala Lelei ‘iā te ‘outou uma o lo‘o i Roma.

O le Mana o le Tala Lelei

¹⁶ ‘Ou te lē ma e folafola le Tala Lelei: auā o le mana lea o le Atua e fa‘aolaina ai tagata ta‘ito‘atasi uma o ē ‘ua fa‘atuatua, e muamua i le tagata Iutaia, ‘ona soso‘o ai lea ma tagata o Nu‘u ‘ese.

¹⁷ Auā ‘ua fa‘aalia mai ai le amiotonu a le Atua i le fa‘atuatua mo ē e fa‘atuatua; e pei ‘ona tusia, “O le tagata e amiotonu i la le fa‘atuatua e fa‘aolaina.”

O le Agasala a Tagata

¹⁸ Auā ‘ua fa‘aalia mai le lagi le to‘asā o le Atua, ‘ona o amio lē mafaufau ma amioleaga uma a tagata, o ē ‘ua punitia le ‘upu moni ‘iā latou amioleaga.

¹⁹ O mea uma e tatau ‘ona iloa e i latou e uiga i le Atua ‘ua uma ‘ona iloa, auā ‘ua uma ‘ona fa‘aali mai e le Atua ‘iā te i latou.

²⁰ Talu mai le amataga o le lalolagi, ‘ua fa‘aalia manino mai e ia i ana mea na fai lona uiga e lē ma va‘aia, e pei o lona mana e fa‘avavau ma lona itū Atua. O le mea lea, e lē sao i latou pe a su‘esu‘eina.

²¹ Auā e ui lava ‘ina iloa e i latou le Atua, ‘ae sa le‘i vivi‘i atu i latou ‘iā te ia e pei ‘ona tatau ai, ma tu‘uina atu ‘iā te ia le fa‘afetai. Peita‘i, ‘ua mafaufau i latou o mea lē aogā, ma ‘ua fa‘apogisāina o latou mafaufau vālea.

²² O vale i latou, a ‘ua fai mai o i latou o tagata atamamai;

²³ ‘ua fa‘afesuia‘i e i latou le mamalu o le Atua e fa‘avavau ma fa‘atusa o foliga o le tagata, po o manu felelei, po o manu vaefā, po o meaola fetolofi.

²⁴ O le pogai lea ‘ua tu‘uina atu ai i latou e le Atua e faia tu‘inanau leaga o latou loto, ma ‘ua so‘ona femuliluaa‘i i o latou tino;

²⁵ auā ‘ua fa‘afesuia‘i e i latou le ‘upu moni e uiga i le Atua ma mea pepelo, ma ‘ua tapua‘i i latou ma ‘au‘auna i mea na faia, a ‘ua lē tapua‘i ma ‘au‘auna i lē na faia mea uma, o ia lenā e ao ‘ona vi‘ia e fa‘avavau. Amene.

²⁶ O le mea lea ‘ua tu‘uina atu ai i latou e le Atua e fai o latou tu‘inanau matagā. O o latou fafine ‘ua fa‘afesuia‘i e i latou le uiga fa‘atane ma fafine ma isi uiga lē tatau.

²⁷ E fa‘apenā fo‘i tane, ‘ua tu‘u e i latou uiga fa‘atane i le fa‘afeagai ai ma fafine, a ‘ua fa‘atūmulia i le tu‘inanau o le isi tane i le isi fo‘i tane. ‘Ua fai e tane uiga matagā fa‘atasi ma isi fo‘i tane, e aunoa ma le lagona o le māasiasi, ma ‘ua ia i latou lava lo latou fa‘asalaga.

²⁸ ‘Ona ‘ua lē mafai e i latou ‘ona manatua pea le Atua i o latou mafaufau, o lea ‘ua tu‘uina atu ai i latou e le Atua e fai o latou manatu sesē ma amioga leaga.

²⁹ ‘Ua fa‘atūmulia i latou i amioga leaga ‘ese‘ese e i ai le mana‘o tele i mea a isi ma uiga taufa‘aleaga. ‘Ua tumu i latou i le matau‘a, ma le fasioti tagata, ma le femisaa‘i ma le taufa‘avalea, ‘atoa ma le fia fa‘aleaga atu fua i isi. ‘Ua fela‘ula‘ua‘i i latou,

³⁰ o tagata taufa‘aleaga ma le ‘ino‘ino i le Atua, e fa‘atupu māseiga ma fa‘amaualuluga, e fa‘alialiavale ma fa‘atuputupu leaga, e lē usiusita‘i fo‘i i o latou matua,

³¹ e valelea ma lē fa‘amaoni; e lē alolofa ‘ae amio sauā.

³² E ui lava ‘ina ‘ua iloa le poloa‘iga a le Atua, e fa‘asalaina i le oti tagata e faia mea fa‘apenā, peita‘i ‘ua lē gata ‘ina faia ia mea e i latou, a ‘ua lagolagoina fo‘i e i latou tagata e faia mea fa‘apea.