Mataio 7 - Samoan Contemporary New Testament

‘Aua le Fa‘amasino Atu

¹ “ ‘Aua tou te fa‘amasino atu, ‘ina ne‘i fa‘amasinoina ‘outou.

² Auā o le fa‘amasinoga tou te fa‘amasino atu ai, o le fa‘amasinoga lava lea e fa‘amasinoina ai ‘outou. O le fua fo‘i tou te fua atu ai, o le fua lava lea e toe fuaina ai ‘outou.

³ Aiseā ‘ua faigofie ai ‘ona e va‘aia le otaota i le mata o lou uso, ‘ae te lē o amana‘ia le ogāla‘au o lo‘o i lou lava mata?

⁴ E fa‘apefea fo‘i ‘ona e fai atu i lou uso, ‘Tu‘u mai ia se‘i ‘ou ‘ave‘esea le otaota mai lou mata,’ peita‘i o lo‘o i lou lava mata le ogāla‘au?

⁵ Talofa ‘iā te oe le tagata fa‘afia amiotonu! ‘Ave ‘ese muamua le ogāla‘au lenā e i lou mata; ‘ona manino ai lea o lau va‘ai, ma faigofie ai ‘ona ‘ave ‘ese le otaota mai le mata o lou uso.

⁶ “ ‘Aua le avatua mea pa‘ia i ta‘ifau; ‘aua fo‘i le lafoa‘iina a ‘outou penina i pua‘a; ‘ina ne‘i soli e i latou i o latou vae, ma liliu mai ma saeia ‘outou.

‘Ia Sā‘ili Atu

⁷ “ ‘Ia ‘outou ōle atu, ‘ona foa‘iina mai lea ‘iā te ‘outou; ‘ia ‘outou sā‘ili, ‘ona ‘outou maua ai lea; ‘ia ‘outou tu‘itu‘i atu, ‘ona tatalaina mai ai lea ‘iā te ‘outou.

⁸ So o se isi e ōle atu e maua e ia le mea na ōle atu ai; o le tagata fo‘i e sā‘ili e maua e ia le mea na sā‘ilia; e tatalaina fo‘i le faitoto‘a i le tagata e tu‘itu‘i atu.

⁹ O ai o ‘outou na te avatua i lona atali‘i se ma‘a pe a tagi mai i se areto?

¹⁰ A tagi mai fo‘i i se i‘a, na te avatua ‘ea i ai se gata?

¹¹ ‘Āfai o ‘outou o tagata leaga ‘ae tou te iloa ‘ona avatu mea lelei ‘iā ‘outou fānau, e lē sili ‘ea la ‘ona foa‘i mai e lo ‘outou Tamā o i le lagi mea lelei ‘iā i latou e ōle atu ‘iā te ia?

¹² “ ‘Ia ‘outou faia i isi tagata mea uma ‘ua ‘outou manana‘o ia fai mai e isi tagata ‘iā te ‘outou, auā o le mea tonu lea o lo o fai mai ai le tulafono ma perofeta.

O le Faitoto‘a Vā Itiiti

¹³ “ ‘Ia ‘outou ulu atu i le faitoto‘a vāitiiti, auā e vatele le faitoto‘a, e lautele fo‘i le ala e tau i le malaia, e to‘atele fo‘i ‘ua ui atu ai.

¹⁴ Auā e vāitiiti le faitoto‘a, e lauitiiti fo‘i le ala e tau atu i le ola; e to‘aitiiti fo‘i i latou o ē ‘ua mauaina.

O le La‘au ma ona Fua

¹⁵ “ ‘Ia ‘outou fa‘aeteete i perofeta pepelo, o ē e ō atu ‘iā te ‘outou e pei o ni mamoe, a o i latou moni lava o luko fe‘ai.

¹⁶ O fua o a latou galuega tou te iloa ai i latou. E aumai ‘ea e tagata se fuifui vine mai le la‘au tuitui, po o mati mai le la‘au talatala?

¹⁷ O la‘au lelei e fua mai i fua lelei; o la‘au leaga fo‘i e fua mai i fua leaga.

¹⁸ E lē mafai e se la‘au lelei ‘ona fua mai i ni fua leaga; e lē mafai fo‘i e se la‘au leaga ‘ona fua mai i ni fua lelei.

¹⁹ O la‘au uma e lē fua mai i fua lelei, e tātu‘uina ma susunuina i le afi.

²⁰ E fa‘apea fo‘i ‘ona ‘outou iloa i latou i fua o a latou galuega.

‘Ou te le‘i Iloa lava ‘Outou

²¹ “E lē ulu atu i le Mālō o le lagi i latou uma e fai mai, ‘Le Ali‘i e, le Ali‘i e,’ ‘ae na o i latou e faia le finagalo o lo‘u Tamā i le lagi.

²² E to‘atele o le a fai mai ‘iā te a‘u i lea aso, ‘Le Ali‘i e, le Ali‘i e, matou te le‘i tāla‘i ‘ea i lou suafa? O lou suafa fo‘i na matou tulia ai temoni. O lou suafa fo‘i lea na matou faia ai galuega ofoofogia e tele.’

²³ ‘Ona ‘ou ta‘utino atu ai lea ‘iā te i latou, ‘ ‘Ou te le‘i iloa lava ‘outou. Inā ō ‘ese ia ‘iā te a‘u, o ‘outou o ē e fai amio leaga.’

O Tagata Fau Fale e To‘alua

²⁴ “O lenei la, o le tagata e fa‘alogo mai i a‘u ‘upu nei ma usita‘i i ai, ‘ou te fa‘atusaina o ia i le tagata atamai na fa‘atūina lona fale i luga o le papa.

²⁵ Na to mai i ai timuga; na tatafe i ai vaitafe; na afātia fo‘i i matagi; ‘ae le‘i pa‘ū lava, auā na fa‘avaeina i luga o le papa.

²⁶ “A o le tagata e fa‘alogo mai i a‘u ‘upu nei ‘ae lē usita‘i i ai, e fa‘atusaina o ia i le tagata valea na fa‘atūina lona fale i le oneone.

²⁷ Na to mai i ai timuga; na tatafe mai i ai vaitafe; na afātia fo‘i i matagi; ‘ona pa‘ū ai lea; ma ‘ua matuā malepe lava.”

O le Pule a Iesu

²⁸ ‘Ina ‘ua fa‘ai‘u e Iesu ana a‘oa‘oga, sa matuā ofo tele tagata e to‘atele sa fa‘alogologo i ana matā‘upu;

²⁹ auā ‘ua a‘oa‘o atu o ia e pei o lē ‘ua i ai le pule, ‘ae lē pei o a‘oa‘o tulafono.