Mataio 5 - Samoan Contemporary New Testament

O le Lauga i le Mauga

¹ ‘Ua silasila atu Iesu i tagata e to‘atele, ‘ona maliu a‘e lea o ia i le mauga. ‘Ua nofo o ia i lalo, ‘ona ō mai lea o ona so‘o ‘iā te ia.

² ‘Ona fetalai atu lea o ia i ana a‘oa‘oga ‘iā te i latou, ‘ua fa‘apea atu:

O le Fiafia Moni

³ ‘Amu‘ia ē ‘ua latou iloa lo latou matitiva fa‘aleagaga, auā e fai mo latou le Mālō o le lagi.

⁴ ‘Amu‘ia ē e fa‘anoanoa, auā e fa‘amafanafanaina i latou.

⁵ ‘Amu‘ia ē e agamalū auā e fai mo latou le nu‘u.

⁶ ‘Amu‘ia ē e fia ‘a‘ai ma fia inu i le amiotonu auā e fa‘amalilieina i latou.

⁷ ‘Amu‘ia ē e alolofa atu, auā e alofaina mai i latou.

⁸ ‘Amu‘ia ē e loto mamā, auā e iloa atu e i latou le Atua.

⁹ ‘Amu‘ia ē e fa‘atupuina le filemū, auā e ta‘ua i latou o atali‘i o le Atua.

¹⁰ ‘Amu‘ia i latou e sauāina ‘ona o le amiotonu, auā e fai mo latou le Mālō o le lagi.

¹¹ “ ‘Amu‘ia ‘outou pe a ‘upuleagaina ma fa‘asauāina, pe tu‘ua‘iina pepelo ‘outou i mea leaga uma ‘ona o a‘u.

¹² ‘Ia ‘outou ‘oli‘oli ma fiafia, auā e tele lo ‘outou taui i le lagi; auā na fa‘apea fo‘i ‘ona fa‘asauāina e i latou perofeta na muamua ‘iā te ‘outou.

O le Masima ma le Malamalama

¹³ “O ‘outou o le masima o le lalolagi. ‘Ae ‘āfai e māgalo le masima, o le ā ‘ea se mea e mafai ‘ona toe fa‘a‘o‘ona ai? ‘Ua lē toe i ai sona aogā, na o le tia‘i i fafo ma soli ai e tagata.

¹⁴ “O ‘outou o le malamalama o le lalolagi. E lē mafai ‘ona fa‘aliloina le ‘a‘ai e tu i le mauga.

¹⁵ E leai se isi na te tutuina se molī ma fa‘apulou i le tanoa, ‘ae tu‘u lava i luga o lona tulaga; ‘ina ‘ia fa‘amalamalamaina ai tagata uma i totonu o le fale.

¹⁶ ‘Ia fa‘apenā fo‘i ‘ona susulu atu lo ‘outou malamalama i luma o tagata; ‘ina ‘ia va‘aia e i latou a ‘outou galuega lelei, ma vivi‘i atu ai i lo ‘outou Tamā o i le lagi.

O le A‘oa‘oga e Uiga i le Tulafono

¹⁷ “ ‘Aua ne‘i ‘outou manatu na ‘ou sau e tatalaina le Tulafono a Mose, ma le a‘oa‘oga a perofeta. ‘Ou te le‘i sau e tatalaina, a ‘ia fa‘ataunu‘uina.

¹⁸ Auā o le ‘upu moni ‘ou te ta‘u atu ‘iā te ‘outou, e mavae atu le lagi ma le lalolagi, ‘ae leai se mata‘itusi aupito itiiti po‘o se fasi mata‘itusi o le tulafono e mavae atu, se‘ia fa‘ataunu‘uina mea uma.

¹⁹ ‘Āfai e i ai se tagata e sōloia sina mea itiiti o nei tulafono, pe fai atu fo‘i i nisi ‘ina ‘ia sōloia e i latou, e ‘avea o ia ma tagata aupito fa‘atauva‘a i le Mālō o le lagi. A o le tagata e usita‘i i le tulafono, ma a‘oa‘oina fo‘i isi tagata ‘ina ‘ia usiusita‘i, e ‘avea o ia ma tagata sili i le Mālō o le lagi.

²⁰ O lea ‘ou te fai atu ai ‘iā te ‘outou, ‘āfai e lē sili atu la ‘outou amiotonu i lo o a‘oa‘o tulafono ma faresaio, tou te lē sao atu lava i le Mālō o le lagi.

O le A‘oa‘oga e Uiga i le Ita

²¹ “ ‘Ua ‘outou fa‘alogo na fai mai tagata i aso ‘ua mavae, ‘ ‘Aua ‘e te fasioti tagata; o lē e fasioti tagata e molia i le fa‘amasinoga.’

²² ‘Ae ‘ou te fai atu ‘iā te ‘outou, so o se isi e ita i lona uso, e molia i le fa‘amasinoga; o se tagata fo‘i e fai atu i lona uso, ‘Isa!’ e molia o ia i le fono, ‘O oe o le vale!’ e fa‘asalaina i le afi i Kena.

²³ O lea, ‘āfai ‘e te avatu sau taulaga i le fatafaitaulaga, a ‘ua e toe manatua o lo‘o i ai se mea e lē o malie ai lou uso ‘iā te oe,

²⁴ tu‘u ai lau meaalofa i luma o le fatafaitaulaga, ‘ae alu muamua e fa‘alelei ma lou uso, ‘ona e fa‘ato‘ā sau ai lea e fai lau taulaga.

²⁵ “ ‘Ia vave ‘ona ‘oulua lelei ma lē o lo‘o tagi atu i ana mea ‘ua ‘iā te oe manū o ‘oulua i le ala, ‘ina ne‘i tu‘u atu oe e lenā tagata i le fa‘amasino, e tu‘u atu fo‘i oe e le fa‘amasino i le pule o le falepuipui, ‘ona tu‘uina atu lea o oe e ia i le falepuipui.

²⁶ O le ‘upu moni ‘ou te ta‘u atu ‘iā te oe, e lē mafai ‘ona e toe ulufafo mai ai vaganā ‘ua uma ‘ona e totogi atu le ‘aitalafu ‘atoa.

O le A‘oa‘oga e Uiga i le Mulilua

²⁷ “ ‘Ua ‘outou fa‘alogo o le poloa‘iga i tagata i aso ‘ua mavae, ‘ ‘Aua ‘e te mulilua.’

²⁸ A ‘ou te fai atu a‘u ‘iā te ‘outou, so o se isi lava e va‘ai atu i se fafine a tu‘inanau i ai, ‘ua uma ‘ona mulilua ma ia i lona loto.

²⁹ ‘Āfai e tosina oe i le agasala i lou mata taumatau, e sili la ‘ona sali ‘ese ma lafoa‘i. Auā e lelei pe a lafoa‘i se vaega o lou tino, ‘ae leaga pe a lafoa‘iina lou tino ‘atoa i Kena.

³⁰ ‘Āfai fo‘i e tosina oe i le agasala i lou lima taumatau, e sili ‘ona tipi ‘ese ma lafoa‘i; auā e lelei pe a lafoa‘i se vaega o lou tino, ‘ae leaga pe a lafoa‘iina lou tino ‘atoa i Kena.

O le A‘oa‘oga e Uiga i Ulugali‘i Tete‘a

³¹ “Na fai mai fo‘i, ‘O le tagata na te fa‘ate‘aina lana avā, ‘ia avatu e ia i lana avā se tusi fa‘amaoni o la la tete‘aga.’

³² A ‘ou te fai atu a‘u ‘iā te ‘outou, o se tagata na te fa‘ate‘aina lana avā ‘ae le‘i mulilua o ia, ‘ua fa‘aosoosoina e ia lana avā ia mulilua; o se tagata fo‘i e faiavā i le fafine ‘ua fa‘ate‘aina, ‘ua mulilua fo‘i o ia.

O le A‘oa‘oga e Uiga i Tautoga

³³ “ ‘Ua ‘outou fa‘alogo fo‘i o le poloa‘iga i tagata i aso ‘ua mavae, ‘ ‘Aua ne‘i e tautō pepelo, a ‘ia e avatu i le Ali‘i mea na e tautō ai.’

³⁴ A ‘ou te fai atu a‘u ‘iā te ‘outou, ‘aua le tautō; ‘aua ‘e te tautō i le lagi, auā o le nofoāli‘i lea o le Atua.

³⁵ ‘Aua fo‘i ‘e te tautō i le lalolagi; auā o le mea lea e tu ai ona ‘a‘ao. ‘Aua ‘e te tautō i Ierusalema; auā o le ‘a‘ai lea a le Tupu Silisili.

³⁶ ‘Aua fo‘i ‘e te tautō i lou ulu, auā ‘e te lē mafaia ‘ona fa‘asinasina pe fa‘auliuli se lauulu e tasi.

³⁷ Peita‘i, ‘āfai o lau tali o le ioe, fai atu, ‘Ioe.’ ‘Āfai fo‘i o lau tali o le leai, fai atu, ‘Leai.’ O nisi ‘upu e toe fa‘aopoopo atu i ai, o ‘upu ia e tupu mai i manatu leaga.

O le A‘oa‘oga e Uiga i le Taui ma sui

³⁸ “ ‘Ua ‘outou fa‘alogo fo‘i na fai mai, ‘E taui le mata i le mata, ma le nifo i le nifo.’

³⁹ A ‘ou te fai atu ‘iā te ‘outou, ‘aua tou te tete‘e atu i le leaga. ‘Āfai ‘ua po e se isi lou alāfau taumatau, ia liliu atu fo‘i i ai ma le isi alāfau.

⁴⁰ ‘Āfai e tagi se isi i le tulafono ‘ina ‘ia maua e ia lou ‘ofu tino, ‘ia avatu fo‘i i ai ma lou peleue.

⁴¹ ‘Āfai e poloa‘iina fa‘amalosi oe e se isi ‘ina ‘ia ‘oulua savavali i se maila e tasi, ia ‘oulua savavali ma ia i ni maila se lua.

⁴² Foa‘i atu mea ‘ua tagi mai ai se tagata ‘iā te oe, ma ‘aua ‘e te mata‘ū i le tagata ‘ua fia ‘aitalafu mai ‘iā te oe.

Alofa atu i ē ‘ua ‘avea ma Fili

⁴³ “ ‘Ua ‘outou fa‘alogo na fai mai, ‘ ‘Ia e alofa atu i lē lua te tuā‘oi, ‘ae ‘ino‘ino i lou fili.’

⁴⁴ A ‘ou te fai atu a‘u ‘iā te ‘outou, ‘ia ‘outou alolofa i o ‘outou fili, ma tatalo mo ē o lo‘o fa‘asauā ‘iā te ‘outou,

⁴⁵ ‘ina ‘ia ‘avea ‘outou ma fānau moni a lo ‘outou Tamā o i le lagi, auā na te fa‘aosoina lona la i tagata leaga ‘atoa ma tagata lelei; na te fa‘atotō ifo fo‘i le timu i luga o tagata leaga ‘atoa ma tagata lelei.

⁴⁶ ‘Āfai tou te alolofa atu tau o ē o lo‘o alolofa mai ‘iā te ‘outou, o le ā la se taui tou te maua? E lē faia ‘ea fo‘i fa‘apenā e tagata aolafoga?

⁴⁷ ‘Āfai fo‘i na o ‘outou uso lava tou te tali leleia, o le ā ‘ea se mea ‘ua sili ai ‘outou i lo isi tagata? E lē o le faiga ‘ea lenā e faia e tagata aolafoga?

⁴⁸ O lenei, ia ‘ato‘atoa lo ‘outou lelei, ia pei o lo ‘outou Tamā o i le lagi e ‘ato‘atoa ‘ona lelei o ia.