Mataio 3 - Samoan Contemporary New Testament

O le Tala‘iga a Ioane le Papatiso

¹ O aso ia na amata ai le tala‘iga a Ioane le Papatiso i le vao o Iutaia,

² na tāla‘i atu ai e ia: “Inā salamō ia, auā ‘ua latalata mai le Mālō o le lagi.”

³ O Ioane lenei na fa‘asino i ai le valo‘aga a le perofeta o Isaia: “O le leo o lē o lo‘o ‘alaga i le vao tu‘ufua, ‘ ‘Inā teuteu ia e ‘outou le ala o le Ali‘i, ma fa‘alaulelei ona ala.’ ”

⁴ Sa ‘ofu Ioane i ‘ofu fulufulu kamela, ma le fusipa‘u i lona sulugātiti. Sa ‘ai fo‘i o ia i sē akerise ma le meli vao.

⁵ ‘Ona ō atu ai lea ‘iā te ia tagata mai Ierusalema, ma Iutaia ‘atoa, fa‘apea fo‘i ma nu‘u o lo‘o si‘omia ai le vaitafe o Ioritana.

⁶ ‘Ua fa‘aali atu e i latou a latou agasala, ma ‘ua papatisoina i latou i le Ioritana.

⁷ ‘Ina ‘ua va‘ai atu Ioane i faresaio ma satukaio e to‘atele, o lo‘o ō mai ‘ina ‘ia papatisoina i latou e ia, ‘ona fai atu lea o ia, “O ‘outou o fānau a gata fe‘ai! O ai na fai atu ‘iā te ‘outou e sosola ‘ese mai le to‘asā o le a o‘o mai?

⁸ ‘Ia fa‘aali mai ia ‘outou amio ‘ua ‘outou salamō.

⁹ ‘Aua ne‘i ‘outou fai ifo i o ‘outou loto, ‘O matou o fānau a Aperaamo,’ ‘ou te fai atu ‘iā te ‘outou, e mafai lava e le Atua ‘ona fa‘atupuina mai i ma‘a nei ni fānau ma Aperaamo.

¹⁰ O lo‘o tu nei le matau i tafu‘e o la‘au; o le mea lea, o la‘au uma lava e lē fua mai i fua lelei e tātu‘uina i lalo ma lafo i le afi.

¹¹ ‘Ou te papatisoina ‘outou i le vai e fai ma fa‘ailoga o lo ‘outou salamō, ‘ae i ai le isi tagata o lo‘o mulimuli mai, e sili atu o ia ‘iā te a‘u, e o‘o lava i ona se‘evae e lē tatau ‘ona ‘ou tago i ai e ‘ave. O ia lenā na te papatisoina ‘outou i le Agaga Pa‘ia ma le afi.

¹² O lo‘o i lona ‘a‘ao lana asu fa‘amamā na te fa‘amamāina ai lana fa‘aputugā saito; e fa‘apotopotoina e ia ana saito i le fale saito, ‘ae susunuina le otaota i le afi e lē pe.”

O le Papatisoga o Iesu

¹³ ‘Ona maliu atu ai lea o Iesu mai Kalilaia i le Ioritana, ‘ina ‘ia papatisoina o ia e Ioane.

¹⁴ A ‘ua vavao o ia e Ioane ma fai atu, “E tatau ‘ona e papatisoina a‘u; a fa‘apefea la ‘ona e maliu mai ‘iā te a‘u?”

¹⁵ A ‘ua tali atu Iesu ‘iā te ia, “Papatiso mai ia o a‘u; auā e tatau lava ‘iā i tatou ‘ona fa‘ataunu‘u mea tonu uma.” ‘Ona papatisoina ai lea o ia e Ioane.

¹⁶ Na uma loa ‘ona papatisoina Iesu, ‘ona maliu a‘e lea o ia nai le vai; ‘ona avanoa ai lea o le lagi ‘iā te ia, ma ‘ua va‘aia e ia le Agaga o le Atua ‘ua afio ifo e pei se lupe, ma fa‘apepepepe i ona luga.

¹⁷ Na fa‘alogoina fo‘i le si‘ufofoga mai le lagi ‘ua fa‘apea mai, “O lo‘u Atali‘i pele lenei, ‘ua ‘ou fiafia lava ‘iā te ia.”