Mataio 25 - Samoan Contemporary New Testament

O le Tala Fa‘atusa i Teine e To‘asefulu

¹ “O aso ia e fa‘atusaina ai le Mālō o le lagi i teine e to‘asefulu, na o ma a latou molī e fa‘atali le fa‘ato‘āfaiavā.

² E to‘alima ē e vālea, ‘ae popoto le isi to‘alima.

³ Na ‘ave e teine vālea a latou molī, ‘ae le‘i ‘avea ni suāu‘u fa‘aleoleo.

⁴ A o teine popoto na ‘ave a latou molī ma fagu suāu‘u fa‘aleoleo.

⁵ ‘Ua tuai mai le fa‘ato‘āfaiavā, ‘ona tulemomoe ai lea o teine, ma ‘ua o‘o lava ‘ina momoe.

⁶ “O le tulua o po ma ao na fa‘alogoina ai le ‘alaga, ‘ ‘Ua sau le fa‘ato‘afaiavā inā o ia e feiloa‘i ma ia!’

⁷ ‘Ona ala lea o teine ma teuteu a latou molī.

⁸ ‘Ona fai atu lea o teine valea i teine popoto, ‘Se‘i aumai sina a ‘outou suāu‘u ma matou; auā ‘ua toeitiiti pepē a matou molī.’

⁹ A ‘ua tali atu teine popoto, ‘ ‘Ina ne‘i lē lava le suāu‘u mo ‘outou ma matou, ‘ae sili ‘ona ‘outou o i le fale‘oloa e fa‘atau mai ai ni a ‘outou suāu‘u.’

¹⁰ ‘Ona ō ai lea o teine valea i le fale‘oloa e fa‘atau mai ni a latou suāu‘u. E ō atu i latou ‘ae taunu‘u le fa‘ato‘āfaiavā. ‘Ona ō ai lea o teine popoto sa nonofo sauni fa‘atasi ma le fa‘ato‘āfaiavā i le ‘aiga o le fa‘aipoipoga, ma ‘ua tapunia fo‘i le faitoto‘a.

¹¹ “ ‘Ua taunu‘u mai teine valea, ‘ona vala‘au atu lea o i latou, ‘Ali‘i e, Ali‘i e, tatala mai le faitoto‘a ‘iā te i matou.’

¹² A ‘ua tali atu le fa‘ato‘āfaiavā, ‘O le ‘upu moni ‘ou te ta‘u atu ‘iā te ‘outou, ‘ou te lē iloa ‘outou.’

¹³ “O lea, ‘ia ‘outou mataala ai, auā tou te lē iloa le aso ma le itūlā.

O le Tala Fa‘atusa i ‘Au‘auna e To‘atolu

¹⁴ “E pei fo‘i o le tagata na sauni e malaga ‘ese mai lona ‘āiga, ‘ona vala‘auina lea e ia ana ‘au‘auna ma tu‘u atu i ai le tausiga o ana mea.

¹⁵ Na tu‘u atu e ia i ‘au‘auna ta‘ito‘atasi e fa‘atatau i le mea ‘ua na mafaia. O le isi na tu‘u i ai tupe ‘aulo e lima afe; o le isi, o tupe ‘aulo e lua afe; o le isi o tupe ‘aulo e tasi le afe. ‘Ona alu ai lea o le malaga a lea tagata.

¹⁶ ‘Ua alu loa le ‘au‘auna na tu‘u i ai tupe ‘aulo e lima afe, ma fa‘aaogā ia tupe i ana fefa‘ataua‘iga, ma ‘ua maua ai le isi lima afe.

¹⁷ Na fa‘apea fo‘i le ‘au‘auna na i ai tupe ‘aulo e lua afe, ‘ua maua mai ai le isi lua afe.

¹⁸ A o le ‘au‘auna na tu‘u i ai le tupe ‘aulo e tasi le afe, ‘ua alu ‘ua ‘eli le pū, ma tanu ai le tupe a lona matai.

¹⁹ “ ‘Ua mavae aso e tele, ‘ona toe fo‘i mai lea o le matai o ia ‘au‘auna, ma fai le su‘ega o ana ‘oloa.

²⁰ ‘Ua sau le ‘au‘auna na tu‘u i ai tupe ‘aulo e lima afe, ‘ua tu‘u atu ma isi tupe e lima afe i le matai. ‘Ua fai atu o ia, ‘Ali‘i e, na e tu‘u mai ‘iā te a‘u tupe ‘aulo e lima afe. O isi ia tupe ‘aulo e lima afe na ‘ou maua i le fefa‘ataua‘iga.’

²¹ ‘Ua fai atu le matai, ‘Mālō lava! O oe o le ‘au‘auna lelei ma le fa‘amaoni. ‘Ua e fa‘amaoni i le tausiga o nai mea itiiti, o lea ‘ou te tofia ai oe e pule i mea e tele. Ulufale mai ia e fiafia fa‘atasi ma lou matai.’

²² “ ‘Ona sau ai lea o le ‘au‘auna na tu‘u i ai tupe ‘aulo e lua afe ma fai atu, ‘Ali‘i e, na e tu‘u mai ‘iā te a‘u tupe ‘aulo e lua afe. O isi ia tupe ‘aulo e lua afe, na ‘ou maua i le fefa‘ataua‘iga.’

²³ ‘Ua fai atu le matai, ‘Mālō lava! O oe o le ‘au‘auna lelei ma le fa‘amaoni. ‘Ua e fa‘amaoni i le tausiga o nei mea itiiti, o lea ‘ou te tofia ai oe e pule i mea e tele. Ulufale mai ia e fiafia fa‘atasi ma lou matai.’

²⁴ “ ‘Ona sau ai lea o le ‘au‘auna na tu‘u i ai tupe ‘aulo e tasi le afe ma fai atu, ‘Ali‘i e, ‘ua ‘ou iloa o oe o se tagata faigatā, ‘e te seleseleina mea ‘e te le‘i totōina.

²⁵ O lea na ‘ou fefe ai ma nanā lau tupe i le ‘ele‘ele. O lau tupe lenei ‘ua toe fa‘afo‘i atu.’

²⁶ “ ‘Ua fai atu le matai, ‘O oe o le ‘au‘auna leaga ma le paiē! ‘Ua e iloa lava ‘ou te seleseleina mea ‘ou te le‘i totōina, ma fa‘apotopotoina i le mea ‘ou te le‘i fa‘ata‘ape‘apeina ai mea,

²⁷ aiseā na e lē avatua ai la‘u tupe i ē e fefa‘ataua‘i, ‘ina ‘ia ‘ou toe maua mai la‘u tupe fa‘atasi ma lona tului pe a ‘ou fo‘i mai?

²⁸ O lea la, ia ‘ave ‘ese le tupe mai ‘iā te ia, ma avatu i lē ‘ua i ai tupe ‘aulo e sefulu afe.

²⁹ Auā o lē ‘ua na maua ni mea, e toe fa‘aopoopoina i ai isi mea ‘ina ‘ia atili tele ai ana mea; a o lē e leai sana mea, e o‘o lava i sina mea itiiti ‘ua ‘iā te ia e ‘ave‘esea.

³⁰ A o lenei ‘au‘auna lē aogā, ‘ia ‘outou tuli i fafo i le pouliuli, i le mea e i ai le tagiauē ma le lilivau o nifo.’

O le Fa‘amasinoga Mulimuli

³¹ “A sau le Atali‘i o le Tagata i lona mamalu fa‘atasi ma agelu, ‘ona nofo lea o ia i lona nofoāli‘i mamalu.

³² E fa‘apotopotoina fo‘i tagata uma o le lalolagi i ona luma, ‘ona tu‘u ‘ese‘ese lea e ia o i latou i vaega e lua e pei ‘ona tu‘u‘ese‘eseina mamoe ma ‘oti e le leoleo mamoe.

³³ E fa‘apotopotoina e ia mamoe i le itū taumatau, ma ‘oti i le itū tauagavale.

³⁴ ‘Ona fai atu lea o le tupu ia i latou i lona itū taumatau, ‘O mai ia, ‘outou o ē ‘ua fa‘amanuiaina e lo‘u Tamā, e fai mo ‘outou le mālō ‘ua saunia mo ‘outou talu mai le amataga o le lalolagi.

³⁵ Auā sa ‘ou fia ‘ai ‘ona ‘outou fafagaina lea o a‘u; na ‘ou fia inu fo‘i ‘ona ‘outou fa‘ainuina lea o a‘u; sa ‘ou tagata ‘ese ‘ona ‘outou talileleia lea o a‘u i o ‘outou ‘āiga;

³⁶ sa ‘ou lē lavalavā ‘ona ‘outou fa‘a‘ofuina lea o a‘u; sa ‘ou ma‘i ‘ona ‘outou tausia lea o a‘u; sa ‘ou i le falepuipui ‘ona ‘outou asiasi mai lea ‘iā te a‘u.’

³⁷ “ ‘Ona tali atu lea o tagata amiotonu ‘iā te ia, ‘Le Ali‘i e, o anafea na matou va‘aia ai oe o e fia taumafa, ‘ona matou fafaga ai lea ‘iā te oe; po o e fia inu, ‘ona matou fa‘ainu ai lea ‘iā te oe?

³⁸ O anafea na matou va‘aia ai oe o e tagata ‘ese, ‘ona matou talileleia ai lea o oe i o matou ‘āiga, po o e lē lavalavā ‘ona matou fa‘a‘ofuina ai lea o oe?

³⁹ O anafea na matou va‘aia ai oe o e ma‘i, po o i le falepuipui, ‘ona matou asiasi atu ai lea ‘iā te oe?’

⁴⁰ ‘Ona tali atu ai lea o le tupu, ‘O le ‘upu moni ‘ou te ta‘u atu ‘iā te ‘outou, e fa‘apei ‘ona ‘outou faia i se tasi o o‘u uso nei e aupito itiiti, o a‘u lava lea ‘ua ‘outou faia i ai.’

⁴¹ “ ‘Ona fai atu lea o le Tupu ia i latou o i lona itū tauagavale, ‘Ō ‘ese atu ia ‘outou na o ē ‘ua fa‘amalaiaina i le afi e fa‘avavau, ‘ua saunia mo le tiapolo ma ana agelu.

⁴² Auā na ‘ou fia ‘ai, ‘ae tou te le‘i fafagaina a‘u;

⁴³ sa ‘ou tagata ‘ese, ‘ae tou te le‘i talileleia a‘u i o ‘outou ‘āiga; sa ‘ou lē lavalavā ‘ae tou te le‘i fa‘a‘ofuina a‘u; sa ‘ou ma‘i, sa ‘ou i le falepuipui fo‘i, tou te le‘i asiasi mai ‘iā te a‘u.’

⁴⁴ “ ‘Ona tali atu lea o i latou, ‘Le Ali‘i e, o anafea na matou va‘aia ai oe o e fia ‘ai po o e fia inu, po o e tagata ‘ese, po o e lē lavalavā, po o e ma‘i, po o e i le falepuipui, ‘ae matou te le‘i asiasi atu ‘iā te oe?’

⁴⁵ ‘Ua tali atu fo‘i le Tupu ‘iā te i latou, ‘O le ‘upu moni ‘ou te ta‘u atu ‘iā te ‘outou, fa‘apei ‘ona ‘outou lē faia i se isi e aupito itiiti o i latou nei, o a‘u lava lea ‘ua ‘outou lē faia i ai.’

⁴⁶ ‘Ona ō atu ai lea o i latou na i le fa‘asalaga e fa‘avavau; ‘ae ō atu tagata amiotonu i le ola e fa‘avavau.”