Mataio 23 - Samoan Contemporary New Testament

O le Lapata‘iga a Iesu e Fa‘atatau i A‘oa‘o Tulafono ma Faresaio

¹ ‘Ona fetalai atu lea o Iesu i tagata ‘atoa ma ona so‘o,

² “O a‘oa‘o tulafono ma faresaio ‘ua tofia e fa‘amatalaina le tulafono a Mose.

³ O lea, ‘ia ‘outou usiusita‘i i ai ma fai mea uma latou te fa‘atonuina ai ‘outou; ‘ae ‘aua tou te fa‘ata‘ita‘i ‘iā latou amioga; auā e ‘ese a latou a‘oa‘oga, ‘ese a latou amioga.

⁴ ‘Ua saunia e i latou ni avega mamafa e fa‘ae‘e i ‘ua o tagata, a ‘ua leai lava ma se isi o i latou e fa‘agaoioi sona tamatama‘ilima, e fesoasoani atu ai i le tau‘aveina o ia avega.

⁵ ‘Ua faia e i latou mea uma ‘ina ‘ia va‘aia e tagata, ‘ua fa‘atetele mea e tusi ai ‘upu mai le tusi e tusi i o latou muaulu ma lima, ma ‘ua fa‘alautetele pito i lalo o latou ‘ofu.

⁶ E sā‘ili lava e i latou nofoaga pito mamalu i faiga‘ai, ma nofoaga sili fa‘apitoa i sunako.

⁷ E manana‘o fo‘i ia fa‘aaloaloina i latou i mea e potopoto ai tagata, ma ‘ia ta‘ua i latou o a‘oa‘o.

⁸ ‘Ae peita‘i ‘aua ne‘i ta‘ua se isi o ‘outou o le a‘oa‘o, auā o uso uma ‘outou; e tasi fo‘i lo ‘outou a‘oa‘o.

⁹ ‘Aua fo‘i ne‘i fa‘aigoaina e ‘outou se isi i le lalolagi lenei o le Tamā, auā e to‘atasi lo ‘outou Tamā i le lagi.

¹⁰ ‘Aua fo‘i ne‘i ta‘ua se isi o ‘outou o le faia‘oga; auā na o le Keriso e to‘atasi lo ‘outou faia‘oga.

¹¹ O le tagata o ‘outou ‘ua sili lona mamalu, ia ‘avea o ia ma a ‘outou ‘au‘auna.

¹² O lē e fia sili e fa‘amaualaloina, a o lē e fa‘amaualalo e fa‘aeaina.

‘Ua Ta‘uleagaina e Iesu Uiga Pepelo o A‘oa‘o Tulafono ma Faresaio

¹³ “Talofa ‘iā te ‘outou, a‘oa‘o tulafono ma faresaio! O ‘outou o tagata pepelo! ‘Ua ‘outou tāofia tagata mai le Mālō o le lagi. ‘Ua lē gata ‘ina lē ulu atu ‘outou i lea mālō, a ‘ua tāofia fo‘i e ‘outou i latou o lo‘o fia ulu atu i ai!

¹⁵ “Talofa ‘iā te ‘outou a‘oa‘o tulafono ma faresaio! O ‘outou o tagata pepelo! ‘Ua ‘outou la‘asia le vasa, ma femalagaa‘i i le lau‘ele‘ele, ‘ina ‘ia liliu mai se tagata ‘iā te ‘outou. ‘Ae a liliu mai o ia, ‘ona ‘outou faia lea o ia ma tagata o Kena e sili atu ‘ona leaga i lo ‘outou.

¹⁶ “Talofa ‘iā te ‘outou ta‘ita‘i tauaso! ‘Ua tou a‘oa‘o atu, a tautō se isi i le malumalu, e lē sāisāitia o ia i lana tautoga; ‘ae a tautō o ia i le auro i totonu o le malumalu, ‘ua sāisāitia o ia.

¹⁷ Tagata valea e, ma le tauaso! O le ā le mea e sili lona tāua, o le auro po o le malumalu ‘ua fa‘apa‘iaina ai le auro?

¹⁸ ‘Ua ‘outou a‘oa‘o atu fo‘i, ‘A tautō se isi i le fatafaitaulaga e lē sāisāitia o ia i lana tautoga; ‘ae a tautō o ia i meaalofa i luga o le fatafaitaulaga, ‘ua sāisāitia.’

¹⁹ Tagata tauaso e, o lē fea e sili ‘ona tāua, o le meaalofa po o le fatafaitaulaga ‘ua fa‘apa‘iaina ai le meaalofa?

²⁰ A tautō se tagata i le fatafaitaulaga, e lē gata ‘ina tautō o ia i le fatafaitaulaga, a ‘ua tautō fo‘i o ia i meaalofa uma o i luga o le fatafaitaulaga.

²¹ A tautō fo‘i se tagata i le malumalu, e lē gata ‘ina tautō o ia i le malumalu, a ‘ua tautō lava ia i le Atua o lo‘o afio i le malumalu.

²² A tautō se tagata i le lagi, ‘ua tautō o ia i le nofoāli‘i o le Atua ma lē o lo‘o afio ai.

²³ “Talofa ‘iā te ‘outou, a‘oa‘o tulafono ma faresaio! O ‘outou o tagata pepelo! ‘Ua ‘outou foa‘i atu i le Atua le tasi o vaesefulu o a ‘outou mea, e o‘o lava i laula‘au ‘aina e pei o le mili, ma le aneto, ma le kumina, a ‘ua lē tausia e ‘outou a‘oa‘ogapito tāua o le tulafono, e pei o le fai mea tonu, ma le alofa, ma le fa‘amaoni. O mea ia ‘ona faia e ‘outou fa‘atasi ma mea ‘ua ‘outou faia nei.

²⁴ O ‘outou ta‘ita‘i tauaso! ‘Ua ‘outou fa‘amamā ‘ese mai a ‘outou mea inu le namu, a ‘ua ‘outou folo ‘atoa le kamela.

²⁵ “Talofa ‘iā te ‘outou, a‘oa‘o tulafono ma faresaio! O ‘outou o tagata pepelo! ‘Ua fa‘amamāina e ‘outou tua o le ipu inu ma le ipu mafolafola, a o totonu ‘ua tumu i mea na ‘outou fāoa fa‘amalosi i lo ‘outou manatu fa‘apito ‘iā te ‘outou lava.

²⁶ Faresaio tauaso e, fa‘amamā muamua mea o lo‘o i totonu o le ipu, ‘ona mamā ai fo‘i lea ma tua o le ipu.

²⁷ “Talofa ‘iā te ‘outou, a‘oa‘o tulafono ma faresaio! O ‘outou o tagata pepelo! ‘Ua fa‘apei ‘outou o ni tu‘ugamau. ‘Ua manaia ‘ona vali pa‘epa‘e fafo, a o totonu ‘ua tumu i ivi o tagata oti ma mea pala.

²⁸ ‘Ua fa‘apea lava ‘outou; a va‘ai atu i fafo tou te foliga lelei mai, a o totonu ‘ua tumu ‘outou i le pepelo ma le agasala.

‘Ua Fetalai Iesu e Uiga i lo Latou Fa‘asalaga

²⁹ “Talofa ‘iā te ‘outou, a‘oa‘o tulafono ma faresaio! O ‘outou o tagata pepelo! ‘Ua faia e ‘outou ni tu‘ugamau mananaia mo perofeta, ma teuteu ma‘a fa‘amanatu o tagata amiotonu.

³⁰ ‘Ua ‘outou fai ane fo‘i, ‘ ‘Ana matou ola i aso o matou tamā, semanū matou te lē faia mea na faia e i latou; o le fasiotia lea o perofeta.’

³¹ O lenā ‘ua ‘outou ta‘utino mai lava, o ‘outou o fānau a i latou na fasiotia perofeta!

³² Fa‘auma la e ‘outou le galuega na amata e o ‘outou tamā!

³³ O ‘outou o gata, o fānau a gata fe‘ai! E fa‘apefea ‘ona ‘outou sosola ‘ese mai le fa‘asalaga o Kena?

³⁴ ‘Ou te fai atu, ‘ou te ‘auina atu ‘iā te ‘outou perofeta, ma tagata popoto, ma a‘oa‘o; ‘ae tou te fasiotia nisi ma fa‘asatauro isi ‘ae sasaina isi i o ‘outou sunako, ma tuli solo i latou mai lea nu‘u i lea nu‘u.

³⁵ O lona i‘uga, e pa‘ū i luga o ‘outou le fa‘asalaga o le fasiotiga o tagata amiotonu uma na fasiotia fua, e amata mai le fasiotiga o Apelu le tagata amiotonu se‘ia o‘o mai i le fasiotiga o Sakaria le atali‘i o Parakaio, na ‘outou fasiotia i le vā o le malumalu ma le fatafaitaulaga.

³⁶ O le ‘upu moni ‘ou te ta‘u atu ‘iā te ‘outou, e pa‘ū uma le fa‘asalaga o ia fasioti tagata i luga o tagata o le tupulaga lenei!

O le Alofa o Iesu ia Ierusalema

³⁷ “Ierusalema e, Ierusalema e, o lē e fasiotia perofeta, ma fetogi i ma‘a ē na ‘auina atu ‘iā te oe! Po ‘ua fa‘afia ‘ona ‘ou taumafai e fa‘apotopoto lau fānau, e pei o le moa ‘ona ofaofata‘i lana toloa‘i i lalo o ona ‘apa‘au, ‘ae lē mafafai ‘outou!

³⁸ O lenei la, o le a lafoa‘iina lou fale.

³⁹ Auā, ‘ou te ta‘u atu ‘iā te ‘outou, tou te lē toe va‘ai mai lava ‘iā te a‘u se‘ia o‘o ‘ina ‘outou fai ane, ‘ ‘Ia manuia lē ‘ua maliu mai i le suafa o le Ali‘i.’ ”