Mataio 20 - Samoan Contemporary New Testament

O Tagata Faigaluega i le Fa‘ato‘aga Vine

¹ “ ‘Ua fa‘atusaina le Mālō o le lagi i le tagata na ala usu i le taeao, e sā‘ili mai ni tagata faigaluega e galulue i lana fa‘a-to‘aga vine.

² ‘Ua faia e ia le feagaiga ma tagata faigaluega e totogi i ai le tupe e masani ai, o le tenari e tasi i le aso; ‘ona ‘auina atu lea e ia nei tagata e galulue i lana fa‘ato‘aga vine.

³ E tusa o le itūlā e iva i le taeao na toe alu atu ai o ia i le malae, ma maua ai nisi tagata o nofonofo vale ai;

⁴ ‘ua fai atu fo‘i o ia i nei tagata, ‘Ō atu ia i la‘u fa‘ato‘aga vine e galulue ai, ‘ae ‘ou te avatua ‘iā te ‘outou se totogi e tatau ai.’ ‘Ona ō ai lea o i latou.

⁵ Na fa‘apea fo‘i ‘ona faia e ia i le itūlā e sefulu ma le lua, ma le itūlā e tolu i le aoauli.

⁶ E tusa o le itūlā e lima i le afiafi na toe alu atu ai lea tagata i le malae, ma maua ai fo‘i isi o nofonofo ai. ‘Ua fesili atu o ia ‘iā te i latou, ‘O le ā le mea ‘ua ‘outou nofonofo ai ma fa‘amaumau le aso ‘i‘inei?’

⁷ ‘Ua tali atu i latou, ‘E leai se isi na fai mai ‘iā te i matou ‘ia matou ō e galulue.’ ‘Ona fai atu lea o ia ‘iā te i latou, ‘Ō atu ia fo‘i ma ‘outou e galulue i la‘u fa‘ato‘aga vine.’

⁸ “ ‘Ua o‘o i le afiafi, ‘ona fai atu lea o le tagata e ona le fa‘ato‘aga vine i lana ‘au‘auna pule, ‘Fa‘apotopoto mai le ‘aufaigaluega ma ‘ave i ai o latou totogi. Amata i tagata na ō mai mulimuli, ‘ae fa‘ai‘u i ē na galulue muamua.’

⁹ O tagata na amata ‘ona galulue i le lima i le afiafi, na totogi i ai tenari ta‘itasi.

¹⁰ ‘Ua o‘o atu i tagata na galulue muamua, na fa‘apea lava a latou o le a sili atu so latou totogi, ‘ae peita‘i ‘ua avatu fo‘i i ai tenari e ta‘itasi.

¹¹ ‘Ona muimui ai lea o i latou i lē e ana le fa‘ato‘aga vine, ma fai ane,

¹² ‘O tagata ia na ō mai mulimuli na o le tasi le itūlā na galulue ai, a ‘ua e fa‘atutusaina lo latou totogi ma i matou nei na galulue i le aso ‘atoa i le vevela o le la.’

¹³ “A ‘ua tali atu o ia i le isi o i latou, ‘La‘u uō e, e leai se mea leaga ‘ua ‘ou faia ‘iā te oe. Ta te le‘i fai feagaiga ‘ea e totogi atu le tenari e tasi ‘iā te oe?

¹⁴ Tago lā‘ia i lou totogi ma alu loa; o lo‘u lava malie ‘ua ‘ou avatu ai i lenei tagata na sau mulimuli le totogi e tutusa ma lou totogi.

¹⁵ E lē pule ‘ea a‘u i a‘u lava mea? ‘Ua e loto leaga ‘ea ‘ina ‘ua ‘ou agalelei atu?’

¹⁶ “O le mea lea e ‘avea ai ma muamua ē na mulimuli, e ‘avea fo‘i ē na mulimuli ma muamua.”

O Lona Fa‘atolu ‘ona Fetalai Iesu e Uiga i Lona Maliu

¹⁷ A o malaga a‘e Iesu i Ierusalema, sa fetalai atu o ia i ona so‘o ‘ina ‘ua na o i latou i le ala,

¹⁸ “O le a tatou o a‘e nei i Ierusalema, ‘ona tu‘uina atu lea o le Atali‘i o le Tagata i ositaulaga sili ma a‘oa‘o tulafono; e fa‘asalaina fo‘i o ia i le oti e i latou.

¹⁹ E tu‘uina atu o ia e i latou i Nu‘u ‘ese, ‘ina ‘ia tauemuina ma sasaina ma fa‘asatauroina; a o lona tolu o aso e toe fa‘atūina ai o ia.”

O le olega a le Tinā

²⁰ ‘Ua alu ane fo‘i le tinā o atali‘i o Sepetaio ma avane ana tama ‘iā Iesu, ma ifo ane ‘iā te ia, ‘ua ōle atu fo‘i ‘iā Iesu ‘ina ‘ia talia le mea o lo‘o mana‘o ai.

²¹ ‘Ua fesili atu Iesu ‘iā te ia, “O le ā le mea ‘e te mana‘o i ai?” ‘Ua tali atu le fafine, “ ‘Ia e folafola mai nei, o le ā nonofo ta‘itupito a‘u tama nei e to‘alua, i lou itū taumatau ma lou itū tauagavale i lou mālō.

²² ‘Ua fetalai atu Iesu ‘iā te i lā‘ua, “Lua te lē o malamalama i le uiga moni o le mea o lo‘o ‘oulua manana‘o i ai. Lua te mafaia ‘ea ‘ona inu i le ipu o le a ‘ou inu ai?” ‘Ua tali mai i lā‘ua, “Ma te mafaia.”

²³ ‘Ua fetalai atu Iesu, “Ioe, lua te inu lava i la‘u ipu. Peita‘i, o ē e nonofo i lo‘u itū taumatau ma lo‘u itū tauagavale e lē o a‘u ‘ou te avatua, ‘ae tau lava o ē ‘ua saunia mo i latou lea mea e lo‘u Tamā.”

²⁴ ‘Ua fa‘alogo isi so‘o e to‘asefulu i le mea na faia e lea au uso, ‘ona ita tele ai lea o i latou ‘iā te i lā‘ua.

²⁵ ‘Ona fa‘apotopoto ai lea e Iesu o i latou ma fetalai atu i ai, “ ‘Ua ‘outou iloa o tagata e pule i mālō o le lalolagi, e pule sauā i latou i tagata; o ali‘i maualuluga fo‘i e pule i tagata.

²⁶ ‘Ae lē fa‘apea ‘outou; so o se isi o ‘outou e manatu o ia e sili, ia ‘avea lea tagata ma a ‘outou ‘au‘auna;

²⁷ so o se isi fo‘i o ‘outou e fia muamua, ia ‘avea o ia ma a ‘outou tautua.

²⁸ ‘Ia ‘outou fa‘aa‘oa‘o i le Atali‘i o le Tagata; e le‘i sau o ia ‘ina ‘ia ‘au‘auna mai tagata ‘iā te ia, a ‘ia ‘au‘auna atu o ia, ma tu‘uina atu lona ola e ‘avea ma ala e fa‘aolaina ai tagata e to‘atele.”

‘Ua Fa‘amālōlōina e Iesu Tagata Tauaso e To‘alua

²⁹ A o malaga ‘ese atu i latou mai Ieriko, na mulimuli atu ‘iā Iesu tagata e to‘atele.

³⁰ Sa nonofo tagata tauaso e to‘alua i tafatafa o le auala. ‘Ua fa‘alogo i lā‘ua ‘ua maliu ane Iesu, ‘ona tauvala‘au atu lea, “Le Ali‘i e, le Alo o Tavita, alofa mai ‘iā te i mā‘ua.

³¹ A ‘ua vaoia i lā‘ua e tagata e ‘aua le pisa; peita‘i ‘ua atili ai ‘ona ‘alalaga atu i lā‘ua, “Le Ali‘i e, le Alo o Tavita, alofa mai ‘iā te i mā‘ua!”

³² ‘Ona tu lea o Iesu ma vala‘au atu ‘iā te i lā‘ua, “O le ā le mea lua te manana‘o i ai?”

³³ ‘Ua tali atu i lā‘ua, “Le Ali‘i e, ia pupula o ma mata!”

³⁴ Na alofagia e Iesu i lā‘ua, ma ‘ua pa‘i atu i o la mata; o lea lava taimi na mafai ai loa ‘ona va‘ai lelei i lā‘ua, ma ‘ua mulimuli atu ‘iā te ia.