Mataio 17 - Samoan Contemporary New Testament

‘Ua Liua Foliga o Iesu

¹ ‘Ua mavae aso e ono, ‘ona ‘ave lea e Iesu o Peteru, ma Iakopo ma Ioane lona uso, ma ‘ua o na o i latou lava i luga o le mauga maualuga.

² A o fa‘atasi i latou, sa liua foliga o Iesu; ‘ua susulu atu ona fofoga e pei o le la, a o ona ‘ofu ‘ua pa‘epa‘e e pei o le malamalama.

³ ‘Ua va‘aia fo‘i Mose ma Elia o lo‘o talanoa ma ia.

⁴ ‘Ona fai atu lea o Peteru ‘iā Iesu, “Le Ali‘i e, e lelei pe a tatou nonofo ‘i‘inei; ‘āfai ‘e te finagalo i ai, o le a ‘ou faia ni fale ‘ie se tolu mo ‘outou ma Mose ma Elia.”

⁵ A o tautala atu Peteru, sa o‘o mai loa le ao pupula ma ‘ua ufitia ai i latou, ma ‘ua fa‘alogoina fo‘i se leo mai i le ao, “O lo‘u Atali‘i pele lenā, o lē ‘ua ‘ou fiafia i ai; ‘ia ‘outou fa‘alogo ‘iā te ia.”

⁶ ‘Ua fa‘alogo atu so‘o i le leo, ‘ona matuā matata‘u ai lea o i latou ma faō i le ‘ele‘ele.

⁷ ‘Ua maliu ane Iesu, ‘ua pa‘i atu ‘iā te i latou, ma fetalai atu, “Tutū ia i luga, ‘aua tou te matata‘u.”

⁸ ‘Ona ‘ea a‘e lea o i latou i luga ma va‘ai atu, ‘ua leai lava se isi a ‘ua na o i latou lava ma Iesu.

⁹ ‘Ua ō ifo i latou mai le mauga, ‘ona vavaoina lea o i latou e Iesu e ‘aua ne‘i ta‘uina atu i se isi le mea na va‘aia e i latou, se‘ia toe fa‘atūina le Atali‘i o le Tagata mai ē ‘ua oti.

¹⁰ ‘Ona fesili atu lea o so‘o ‘iā Iesu, “Aiseā ‘ua fai mai ai a‘oa‘o tulafono e tatau ‘ona sau muamua Elia?”

¹¹ ‘Ua tali atu Iesu, “E moni, e sau muamua Elia e sauni mea uma.

¹² A ‘ou te fai atu, ‘ua leva ‘ona sau Elia, ‘ae le‘i iloa o ia e tagata. Na faia fo‘i e i latou ‘iā te ia mea uma lava na loto i ai latou. O la latou faiga fo‘i lea o le a fai i le Atali‘i o le Tagata.”

¹³ ‘Ona iloa lea e so‘o, o Ioane le Papatiso e fa‘atatau i ai ana fetalaiga.

‘Ua Fa‘amālōlōina e Iesu le Tama ‘ua Uluitinoina e le Temoni

¹⁴ ‘Ua fo‘i atu i latou i le mea sa tumu ai tagata, ‘ona alu ane lea o le isi tagata ma to‘otuli ane i luma o Iesu, ma fai atu,

¹⁵ “Le Ali‘i e, alofa mai i si o‘u atali‘i i lona ma‘i māliu. E masani ‘ona pa‘ū so‘o o ia i le afi ma le vai.

¹⁶ Na ‘ou ‘aumaia fo‘i i ou so‘o, a ‘ua lē mafai ‘ona fa‘amālōlō e i latou lona ma‘i.”

¹⁷ ‘Ua tali atu Iesu, “Le tupulaga lē fa‘atuatua e, ma le amioleaga! O a fea e mafai ai ‘ona ‘ou tu‘ua ‘outou? O afea e uma ai lo‘u fa‘apalepale atu ‘iā te ‘outou. Aumai le tama ‘iā te a‘u.”

¹⁸ ‘Ua fa‘atonuina e Iesu le temoni e alu i fafo, ‘ona toe malosi ai lea o le tama i lea lava taimi.

¹⁹ ‘Ona ō ane lea o so‘o ‘iā Iesu ‘ina ‘ua na o i latou, ma fesili i ai pe aiseā na lē mafaia ai e i latou ‘ona tuli i fafo le temoni.

²⁰ ‘Ua tali atu Iesu, “O le lē lava o lo ‘outou fa‘atuatua. O le ‘upu moni ‘ou te ta‘u atu ‘iā te ‘outou, e tusa lava pe pei o le itiiti o le fua o le sinapi lo ‘outou fa‘atuatua, e mafai lava ‘ona ‘outou fai atu i le mauga lenei, e alu atu ma tu i se isi mea, ‘ona alu lava lea. Tou te mafaia fo‘i mea uma!”

‘Ua Toe fetalai Iesu e Uiga i Lona Maliu

²² ‘Ua potopoto uma mai so‘o i Kalilaia, ‘ona fetalai atu lea o Iesu ‘iā te i latou, “O le a tu‘uina atu le Atali‘i o le Tagata i lima o tagata,

²³ e fasiotia fo‘i o ia e i latou, ‘ae toe fa‘atūina mai lava o ia i lona tolu o aso.” ‘Ona matuā fa‘anoanoa ai lea o i latou.

O le Totogiina o Lafoga mo le Malumalu

²⁴ ‘Ina ‘ua o‘o atu Iesu ma ona so‘o i Kapanaumi, sa ō ane tagata e aoina le lafoga o le malumalu ma fesili atu ‘iā Peteru, “E lē faia ‘ea le lafoga o le malumalu e lo ‘outou a‘oa‘o?”

²⁵ A ‘ua fai mai o ia, “E fai.” ‘Ua muamua atu fo‘i Iesu ‘iā te ia i totonu o le fale. ‘Ua fetalai atu o ia, “O le ā sou manatu Simona, o ai tagata e faia lafoga ma taulaga i tupu o le lalolagi? O tagata moni o le atunu‘u, po o tagata ‘ese?”

²⁶ ‘Ua tali atu Peteru, “O tagata ‘ese.” ‘Ona toe fetalai atu lea o Iesu, “O lona uiga la, e sa‘oloto tagata moni o le atunu‘u e lē fai lafoga.

²⁷ ‘Ae lē aogā fo‘i ‘ona tatou fa‘atigā i nei tagata. Alu e lafo lau matau i le vaituloto. O lau i‘a muamua lava e maua, tago e vavane le gutu, o le a e maua ai le tupe, ‘ona ‘ave loa lea e fai ma a ta lafoga.”