Mataio 16 - Samoan Contemporary New Testament

O le Mana‘o i se Vāvega

¹ Sa ō ane nisi faresaio ma satukaio ‘iā Iesu e tau lamalama ‘iā te ia. ‘Ua fai atu i latou ‘iā te ia e fa‘aali mai se fa‘ailoga mai le lagi.

² A ‘ua fetalai atu Iesu, “A mūmū le lagi i le taimi e goto ai le la, ‘ona ‘outou fai ane lea, o le a laofie.

³ A e ā mūmū le lagi i le taimi e oso a‘e ai le la, ‘ona ‘outou fai ane lea, o le a timu. ‘Ua ‘outou popoto tele e faitautulaga o le tau i lo ‘outou va‘ava‘ai i le lagi, ‘ae ‘ua ‘outou lē iloa fa‘auiga fa‘ailoga o nei aso.

⁴ O le tupulaga leaga ma le mulilua e fia va‘ai i se fa‘ailoga; ‘ae lē foa‘iina atu i ai se fa‘ailoga vaganā le fa‘ailoga o Iona.” ‘Ona tu‘ua lea e ia o i latou, ‘ae maliu ‘ese.

O le Mea Fa‘afefete a Faresaio ma Satukaio

⁵ Na galo i so‘o ‘ona ‘ave ni areto ‘ina ‘ua latou o‘o atu i le isi itū o le vaituloto.

⁶ ‘Ua fetalai atu fo‘i Iesu ‘iā te i latou, “ ‘Ia ‘outou fa‘aeteete lava i le mea fa‘afefete a faresaio ma satukaio.”

⁷ ‘Ona femusua‘i ai lea o i latou, ma fai atu, “Ai ‘ona ‘ua galo ‘ona aumai o ni areto ‘ua fetalai ai fa‘apea o ia.”

⁸ ‘Ua silafia e Iesu a latou ‘upu, ‘ona fetalai atu lea o ia, “ ‘Ua ‘outou femusua‘i aiseā le leai o ni areto? Matuā itiiti tele lo ‘outou fa‘atuatua!

⁹ Tou te le‘i ‘au malamalama lava? Tou te lē manatua ‘ea le lima afe tagata na ‘ou fafagaina i areto e lima? E fia ‘ato na tūtūmu i mea na totoe?

¹⁰ ‘Ae fa‘apefea le fa afe na fafagaina i areto e fitu? E fia ‘ato na tūtūmu i mea na totoe?

¹¹ E fa‘apefea ‘ona ‘outou lē malamalama ‘ou te le‘i fai atu i ni areto? ‘Ia ‘outou fa‘aeteete i le mea fa‘afefete a faresaio ma satukaio.”

¹² ‘Ona malamalama lea o so‘o, e le‘i fetalai atu o ia ‘ina ‘ia latou fa‘aeteete i le mea fa‘afefete ‘ua fa‘aaogāina i areto, a ‘ia fa‘aeteete i a‘oa‘oga a faresaio ma satukaio.

O le Ta‘utinoga a Peteru e Uiga ‘iā Iesu

¹³ A o maliu atu Iesu i nu‘u latalata i le ‘a‘ai o Kaisareia Filipo, sa fesili atu o ia i ona so‘o, “Fai mai o le ā tagata, o ai le Atali‘i o le Tagata?”

¹⁴ ‘Ua tali mai i latou, “Fai mai isi o Ioane le Papatiso; o isi fo‘i fai mai o Elia; a o isi fai mai o Ieremia, po o se isi lava o perofeta.”

¹⁵ ‘Ua fesili atu Iesu, “ ‘Ae fa‘apefea la ‘outou, o le ā sa ‘outou ‘upu, o ai a‘u?”

¹⁶ ‘Ua tali atu Simona Peteru, “O oe o le Keriso, le Alo o le Atua soifua.”

¹⁷ ‘Ona fetalai atu lea o Iesu, “ ‘Amu‘ia oe Simona, le atali‘i o Iona, auā ‘e te le‘i iloa mai se tagata lenā mea ‘ua e tali mai ai, a ‘ua ta‘uina atu ‘iā te oe e lo‘u Tamā o i le lagi.

¹⁸ O lea fo‘i ‘ou te fai atu ai ‘iā te oe: O oe o Peteru, ma o luga o lenei papa ‘ou te atia‘e ai la‘u ekalesia. E o‘o lava i faitoto‘a o Seoli e lē mafai ‘ona manumālō i ai.

¹⁹ ‘Ou te tu‘uina atu ‘iā te oe ki o le Mālō o le lagi: o mea ‘e te fa‘asāina i le lalolagi, o le a fa‘asāina fo‘i i le lagi; o mea fo‘i ‘e te fa‘atagaina i le lalolagi, o le a fa‘atagaina i le lagi.”

²⁰ ‘Ona lapata‘iina lea e Iesu ona so‘o e ‘aua ne‘i ta‘uina atu e i latou i se isi o ia o le Keriso.

‘Ua Fetalai Iesu e Uiga i Ona Puapuagā ma Lona Maliu

²¹ Na amata mai i lea taimi, e le‘i toe fa‘a‘alo‘alo fetalaiga a Iesu i ona so‘o. ‘Ua ta‘utino atu lava e ia ā te i latou, “E tatau lava ‘ona ‘ou alu i Ierusalema ‘ina ‘ia matuā fa‘asauāina a‘u e toeaina, ma ositaulaga sili, ma a‘oa‘o tulafono. O le a fasiotia a‘u, ma toe fa‘atūina mai i lona tolu o aso.”

²² A ‘ua ta‘ita‘iina o ia i tua e Peteru ‘ua vavao atu ‘iā te ia, ma fai atu, “Le Ali‘i e, ‘aua lava ne‘i o‘o lenā mea ‘iā te oe.”

²³ ‘Ona liliu atu lea o Iesu ‘iā Peteru, ma fetalai atu, “Alu ‘ese ia oe i o‘u tua, Satani; ‘ua fai oe ma fa‘alavelave, auā e fa‘alē tagata ou manatu, ‘ae lē o le finagalo lea o le Atua.”

²⁴ ‘Ona fetalai atu lea o Iesu i ona so‘o, “A i ai se isi e fia mulimuli mai ‘iā te a‘u, ‘aua le manatu ifo o ia ‘iā te ia lava, a ‘ia amo e ia lona satauro ma mulimuli mai ‘iā te a‘u.

²⁵ Auā o le tagata e fia fa‘asao i lona ola e maumau; a o lē e fa‘amaumau lona lava ola ‘ona o a‘u, e maua e ia.

²⁶ E i ai ‘ea se aogā mo le tagata pe ‘āfai na te maua le lalolagi uma, ‘ae maumau ai lona ola? O le ā fo‘i se mea e mafai e ia ‘ona toe fa‘atau mai ai lona ola?

²⁷ Auā e sau le Atali‘i o le Tagata fa‘atasi ma ana agelu i le mamalu o lona Tamā, ‘ona tauia lea e ia tagata ta‘ito‘atasi e tusa ma a latou galuega.

²⁸ O le ‘upu moni ‘ou te ta‘u atu ‘iā te ‘outou, e i ai nisi o lo‘o ola mai nei e lē oti se‘ia va‘aia e i latou le Atali‘i o le Tagata ‘ua sau i lona Mālō.”