Mareko 7 - Samoan Contemporary New Testament

O le A‘oa‘oga a Tamā ‘ua Mavae

¹ ‘Ona potopoto mai ai lea ‘iā Iesu o faresaio ma nisi a‘oa‘o tulafono mai Ierusalema.

² Sa iloa e i latou nisi o ona so‘o ‘ua ‘a‘ai ma o latou lima ‘ele‘elea, o lona uiga, e le‘i fafano.

³ Auā o faresaio ma tagata Iutaia sa tāofi i a‘oa‘oga a o latou tamā ‘ua mavae; e lē mafai ‘ona ‘a‘ai i latou vaganā ‘ua fafano o latou lima,

⁴ e lē mafai fo‘i ‘ona ‘a‘ai i latou i ni mea‘ai mai le maketi vaganā ‘ua fa‘amamāina muamua o latou tino. Sa tausia fo‘i e i latou nisi a‘oa‘oga e pei o le fufuluina o ipu ma ‘ulo ma ipu ‘apamemea ma moega.

⁵ ‘Ona fesili ane lea o faresaio ma a‘oa‘o tulafono ‘iā Iesu, “ ‘Ua le tausia aiseā e ou so‘o a‘oa‘oga na tu‘uina mai e tamā ‘ua mavae, a ‘ua ‘a‘ai i latou ma lima e le‘i fafanoina?”

⁶ ‘Ona tali atu lea o Iesu ‘iā te i latou, “ ‘Ua fetaui lelei le valo‘aga a Isaia ‘iā te ‘outou tagata pepelo, e pei ‘ona tusia: ‘ ‘Ua vivi‘i mai lenei nu‘u ‘iā te a‘u i o latou laugutu, a o latou loto ‘ua mamao ma a‘u.

⁷ E leai se aogā e tapua‘i mai ai i latou ‘iā te a‘u, auā ‘ua ‘avea e i latou a‘oa‘oga a tagata, e pei o ni a‘oa‘oga a le Atua.’

⁸ “ ‘Ua ‘outou lafoa‘i le poloa‘iga a le Atua ‘ae tāofi mau a‘oa‘oga a tagata.”

⁹ ‘Ua fetalai atu fo‘i o ia ‘iā te i latou, “O se faiga poto tele lea ‘ua ‘outou faia, o le tete‘e atu lea i le poloa‘iga a le Atua ‘ae tausia a ‘outou lava a‘oa‘oga.

¹⁰ Auā ‘ua poloa‘i mai Mose, ‘ ‘Ia e āva i lou tamā ma lou tinā, i le ma lea, ia fasiotia so o se isi e tautala lē mafaufau i le tamā po o le tinā.’

¹¹ A ‘ua ‘outou fai mai, a fai atu se tagata i lona tamā po o lona tinā, o mea na tu‘u e tausi ai ‘oulua ‘ua kopano (o lona uiga ‘ua fa‘asāina mo le Atua),

¹² ‘ona lē afaina ai lea o ia i lona lē tausia o ona matua.

¹³ O lona uiga, ‘ua ‘outou fa‘asili a ‘outou lava a‘oa‘oga i lo le ‘upu a le Atua. E le gata i lenā, a ‘ua tele fo‘i nisi mea fa‘apenā ‘ua ‘outou faia.”

O Mea e Leaga ai le Tagata

¹⁴ ‘Ona toe vala‘au lea o Iesu i tagata e to‘atele ma fetalai atu ‘iā te i latou, “Fa‘alogo mai ia ‘iā te a‘u ‘outou uma ma ‘ia ‘outou iloa le mea lenei:

¹⁵ E lē o mea e alu atu mai fafo i totonu o le tagata, a o mea e sau mai totonu ‘iā te ia e leaga ai o ia.

¹⁶ O lē ‘ua i ai taliga e fa‘alogo ai, fa‘alogo lelei mai ia.”

¹⁷ ‘Ina ‘ua tu‘ua e ia tagata e to‘atele ‘ae alu atu i le fale, sa fesili mai ona so‘o ‘iā te ia i le uiga o le tala fa‘atusa.

¹⁸ ‘Ona fetalai atu lea o Iesu ‘iā te i latou, “E o‘o fo‘i ‘iā te ‘outou, tou te le malamalama ‘ea? Tou te le iloa ‘ea e leai se mea e alu atu mai i fafo i totonu o le tagata e leaga ai o ia?

¹⁹ O mea e alu atu i totonu e alu i le manava ma toe sau i fafo; ‘ae le o‘o i le loto.”

²⁰ ‘Ua toe fetalai atu o ia, “O mea e sau mai totonu o le tagata e leaga ai o ia.

²¹ Auā e sau mai totonu o le loto o le tagata manatu leaga e pei o le faita‘aga ma le gaoi ma le fasioti tagata,

²² o le mulilua, o le manumanu, o le amioleaga, o le taufa‘a‘ole‘ole, o le matāitu, o le ‘upuleaga, o le fa‘amaualuga ma le lē mafaufau;

²³ o mea leaga uma nei e sau mai totonu o le tagata, ma o mea na e leaga ai o ia.”

O le Fa‘atuatua o le Fafine

²⁴ ‘Ona tu‘ua lea e Iesu o lea mea ‘ae maliu atu i le itūmālō o Turo ma Saitonu. ‘Ua ulu atu o ia i le fale; sa le finagalo o ia ‘ina ‘ia iloa o ia e nisi, peita‘i sa le mafai ‘ona lilo.

²⁵ E i ai le tinā na fa‘alogo ‘ua i ai Iesu i le ‘āiga lea, ‘ona alu ane lea ma fa‘apa‘ū i ona luma ‘ona o si ana tama teine sa i ai le agaga leaga.

²⁶ O le fafine lenei o le fafine Eleni, na fānau i Foinie i Suria. ‘Ua ‘ai‘oi mai o ia ‘iā Iesu ‘ina ‘ia tuli‘esea le temoni mai lana tama teine.

²⁷ A ‘ua tali atu Iesu, “E tatau ‘ona fafaga muamua le fānau ia mā‘o‘ona; auā e le se mea tatau le fafaga o ta‘ifau i mea‘ai a le fānau.”

²⁸ ‘Ua tali atu o ia ‘iā te ia, “E moni lava a oe, peita‘i o ta‘ifau i lalo o le laulau e ‘a‘ai i latou i fasi mea‘ai a le fānau e pa‘u‘ū i lalo.”

²⁹ ‘Ona fetalai atu lea o Iesu ‘iā te ia, “ ‘Ona o lau tali lenā, fo‘i ia oe, ‘ua alu ‘ese le temoni sa i lau tama teine.”

³⁰ ‘Ona toe fo‘i lea o ia i lona ‘āiga, ‘ua maua atu lana tama teine o ta‘oto‘oto i le moega, ‘ua alu ‘ese le temoni nai ‘iā te ia.

‘Ua Fa‘amālōlōina e Iesu le Tagata Tutuli ma Gūgū

³¹ ‘Ona tu‘ua lea o Turo e Iesu ‘ae ui atu i Saitonu aga‘i i le vaituloto o Kalilaia sa ui atu fo‘i o ia i Tekapoli.

³² ‘Ona avane lea e nisi tagata ‘iā te ia le tagata tutuli ma gūgū, ‘ua ōle ane i latou ‘iā te ia ‘ina ‘ia fa‘ae‘e ona ‘a‘ao i luga ‘iā te ia.

³³ ‘Ua ta‘ita‘i ‘ese o ia e Iesu mai tagata e to‘atele ma tu‘u ona tamatama‘ilima i ona taliga; ‘ua feanu fo‘i ma pa‘i atu i lona laulaufaiva.

³⁴ ‘Ona tepa a‘e lea o Iesu i le lagi, ‘ua tatalo; ‘ona fetalai atu lea i le tagata, “Efata,” o lona uiga, “ ‘Ia avanoa ou taliga.”

³⁵ Na avanoa loa lava ona taliga, ma ‘ua matala fo‘i lona laulaufaiva; ‘ona tautala manino loa lea o ia.

³⁶ ‘Ona vavao atu lea e Iesu tagata uma, e ‘aua ne‘i ta‘u atu e i latou i se isi; a ‘ua atili ai ‘ona tāla‘i e i latou.

³⁷ O i latou uma na fa‘alogo ai sa matuā ofo ma fa‘apea ane, “ ‘Ua matuā lelei lava mea uma ‘ua na faia. ‘Ua faia e ia ‘ia fa‘alogo lē sa tutuli ma tautala lē sa gūgū.”