Mareko 4 - Samoan Contemporary New Testament

O le Tala Fa‘atusa i le Faifa‘ato‘aga

¹ ‘Ona maliu atu lea o Iesu i tafatafa o le vaituloto o Kalilaia, ma toe a‘oa‘o atu i tagata e to‘atele o ē na potopoto ane ‘iā te ia. O lea na maliu a‘e ai o ia i le va‘a, a o tagata sa tutū mai i le ‘auvai.

² Sa a‘oa‘o atu o ia ‘iā te i latou i mea e tele e ala i tala fa‘atusa. ‘Ua fetalai atu o ia,

³ “Fa‘alogo mai ia: Na alu atu le tagata faifa‘ato‘aga e lūlū ana fatu la‘au.

⁴ A o faia lana galuega, na pa‘u‘ū nisi fatu i le auala ma sa ‘aina e manu felelei.

⁵ O nisi na pa‘u‘ū i le mea gaoā, e fa‘alētele ai se ‘ele‘ele, na vave ‘ona tutupu;

⁶ peita‘i ‘ona o le leai o ni o latou aa, na velasia ai ma mamate uma ‘ina ‘ua oso a‘e le la.

⁷ O nisi fatu na pa‘u‘ū i totonu o le vaotuitui, na tutupu a‘e, a ‘ona ‘ua filia e le vaotuitui ‘ona lē fua ai lea.

⁸ A o nisi fatu na pa‘u‘ū i le ‘ele‘ele lelei, ‘ua tutupu olaola ma fua mai e ta‘itolusefulu o nisi e ta‘ionosefulu, a o nisi e ta‘iselau.”

⁹ ‘Ua fetalai atu o ia, “O lē ‘ua i ai taliga e fa‘alogo ai, fa‘alogo lelei mai ia.”

O le Mafua‘aga na Fa‘aaogā ai Tala Fa‘atusa

¹⁰ A o nofonofo to‘atasi o ia, na ō ane nisi tagata o ē sa fa‘alogologo ‘iā te ia fa‘atasi ma ona so‘o e to‘asefulu ma le lua ma fai atu ‘iā te ia e fa‘amalamalama ane tala fa‘atusa.

¹¹ ‘Ua tali atu Iesu, “O mea lilo o le Mālō o le Atua ‘ua uma ‘ona ta‘u atu ‘iā te ‘outou. A o ē e ‘ese ai ‘ua fa‘aali i ai e ala i tala fa‘atusa.

¹² ‘Ua fa‘apea ‘ona fai, ‘ ‘Ina ia fiu i latou e va‘ai ‘ae le iloa, ia fiu fo‘i e fa‘alogo ‘ae le lagona, ne‘i toe liliu atu i latou i le Atua ‘ona fa‘amāgaloina lea o a latou agasala.’ ”

‘Ua Fa‘amalamalama e Iesu le Tala Fa‘atusa i le Faifa‘ato‘aga

¹³ ‘Ona fesili atu lea o Iesu ‘iā te i latou, “Tou te le‘i malamalama lava i lenei tala fa‘atusa? ‘Āfai e leai, o lona uiga la e leai lava se tala fa‘atusa tou te malamalama ai.

¹⁴ ‘Ua lūlūina e le faita‘ato‘aga le afioga a le Atua.

¹⁵ O nisi taimi o le ā pa‘ū atu ai lenei afioga i le alatele; e fa‘apenā tagata ‘ua fa‘alogo i le ‘upu, a ‘ua alu ane Satani ma ‘ave‘ese lenei ‘upu mai ‘iā te i latou.

¹⁶ O isi tagata ‘ua pei o fatu ‘ua pa‘u‘ū i le ‘ele‘ele gaoā. Na fa‘alogo loa lava i le ‘upu talia loa ma le fiafia.

¹⁷ Peita‘i e le‘i loloto lo latou taliaina o le ‘upu, o le mea lea e vave ai ‘ona pa‘u‘ū. E o‘o mai loa lava fa‘alavelave ma puapuagā ‘ona o le ‘upu, ‘ona ō ‘ese loa lea o i latou.

¹⁸ O nisi fo‘i tagata ‘ua pei o fatu na pa‘u‘ū i totonu o le vaotuitui. ‘Ua fa‘alogo i latou i le ‘upu,

¹⁹ a o le popole i mea o le olaga nei, e pei o le mana‘o i le ‘oloa ‘atoa ma le tu‘inanau i nisi mea ‘ua fa‘atūmulia ai o latou loto, ‘ua filia ai le ‘upu ma ‘ua le fua mai.

²⁰ A o isi la tagata ‘ua pei o fatu na pa‘u‘ū i le ‘ele‘ele lelei. ‘Ua fa‘alogo i le ‘upu ma tāofi mau i ai, ‘ona fua mai ai lea, e ta‘itolusefulu i nisi, e ta‘ionosefulu i nisi, ‘ae ta‘iselau i nisi.”

O le Molī i Lalo o le Tanoa

²¹ ‘Ua fa‘aauau pea e Iesu ana a‘oa‘oga, ‘ua fetalai atu, “O fea ‘ea e tatau ‘ona tutu le molī ma tu‘u ai? E fa‘apulou ‘ea i le tanoa po o lalo o le moega, pe tu‘u i luga o le laulau?

²² So o se mea e faia fa‘alilo o le ā fa‘aalia, so o se mea fo‘i e natia o le ā iloa lava.

²³ O lē ‘ua i ai taliga e fa‘alogo ai fa‘alogo lelei mai ia.”

²⁴ ‘Ua fetalai atu fo‘i o ia ‘iā te i latou, “Se‘i o ‘outou matuā fa‘alogo mai lava i le mea lenei ‘ou te fai atu ai: O le fua o lo‘o ‘outou fuaina ai isi e toe fuaina ai ‘outou, ma e o‘o ‘ina fa‘amamafaina atili.

²⁵ Auā fo‘i o lē o lo‘o i ai mea, o le ā saga fa‘ateleina ana mea; a o lē e itiiti sina mea o i ai e o‘o lava ‘ina ‘ave‘eseina.”

O le Tala Fa‘atusa i le Fatu La‘au ‘ua Ola

²⁶ ‘Ua toe fetalai atu fo‘i Iesu: “O le Mālō o le Atua ‘ua fa‘apei o le tagata o lo‘o lūlū fatu la‘au i lona fanua;

²⁷ e moe o ia i le po ma ala a‘e i le taeao ‘ae na te le iloa pe na fa‘apefea ‘ona tutupu ma ola ia fatu.

²⁸ E tutupu a‘e lava i latou i le ‘ele‘ele ma fua mai; e muamua o latou lau, ‘ona fuga mai ai lea ma o‘o ai lava ‘ina fua tele ma taufuifui.

²⁹ A o‘o ‘ina matua le fuata, ‘ua o‘o mai fo‘i le seleselega, ‘ona fa‘aaogāina lea e le faifa‘ato‘aga lana mea faigaluega e tau ai fua.”

O le Tala Fa‘atusa i le Fua o le Sinapi

³⁰ ‘Ua fetalai atu Iesu, “O le ā se mea tatou te fa‘atusaina i ai le Mālō o le Atua? O le ā fo‘i se tala fa‘atusa tatou te fa‘aaogāina e fa‘amatala ai?

³¹ E fa‘atusaina i le fua o le Sinapi, o se fatu e sili ‘ona la‘itiiti i lo o fatu totō uma i le taimi e totō ai i le ‘ele‘ele.

³² Peita‘i a o‘o ‘ina tupu a‘e ‘ona ‘avea lea ma la‘au aupito sili ‘ona tele i la‘au iti uma; e fai fo‘i le paolo o ona lālā lauolaola ma moega o manu felelei.”

³³ O le tele la o tala fa‘atusa fa‘apenei sa fa‘aaogā e Iesu ‘ina ‘ia fetaui ma lo latou malamalama.

³⁴ O taimi uma lava e a‘oa‘o atu ai o ia ‘iā te i latou, sa fa‘aaogāina ai e ia tala fa‘atusa; peita‘i a na o ia loa ma ona so‘o ‘ona fa‘amalamalama atu lea e ia mea uma ‘iā te i latou.

‘Ua Fa‘afilemū e Iesu le Afā

³⁵ ‘Ua o‘o i le afiafi o lea lava aso, ‘ona fetalai atu lea o Iesu i ona so‘o, “Tatou o ia i le isi itū o le vaituloto.”

³⁶ Na tu‘ua loa e i latou tagata e to‘atele, a ‘ua ‘ave o ia e i latou i le va‘a. Sa i ai fo‘i i inā isi va‘a.

³⁷ Na agi mai fo‘i le matagi malosi, ma ‘ua fati mai galu i le va‘a, toeitiiti a tumu ai.

³⁸ A o Iesu sa i ai lava i le va‘a, na tofā o ia i le taumuli i le aluga. Na fafagu o ia e so‘o ma fai atu, “Le A‘oa‘o e, a tu‘u ‘ea i matou ia feoti?”

³⁹ ‘Ona tula‘i lea e Iesu ma vavao atu i le matagi; ‘ua fai atu fo‘i i le sami, “Filemū ia; inā malū ia.” ‘Ona pe ai lea o le matagi, ‘ua matuā malū.

⁴⁰ ‘Ona fetalai atu lea o Iesu ‘iā te i latou, “ ‘Ua ‘outou fefefe aiseā? ‘Ua leai ‘ea so ‘outou fa‘atuatua?”

⁴¹ ‘Ua tūtūmu i latou i le fefe, ‘ua femusua‘i ma fai ane, “O ai ‘ea lenei tagata? E o‘o lava i le matagi ma le sami ‘ua usiusita‘i ‘iā te ia!”