Mareko 16 - Samoan Contemporary New Testament

O le Toetū

¹ ‘Ua mavae le Sapati, ‘ona fa‘atau ai lea e Maria le Makatala ma Maria le tinā o Iakopo, ma Salome mea manogi ‘ina ‘ia ō atu ma i latou e u‘u ai le tino o Iesu.

² O le taeao lava o le aso Sa, i le oso a‘e o le la, na ō atu ai i latou i le tu‘ugamau.

³ Sa fetautalatala‘i i latou ma fai ane, “O ai o le ā na fuli‘esea le ma‘a i le gutu o le tu‘ugamau mo i tatou?”

⁴ A o va‘ava‘ai atu i latou, na iloa e i latou ‘ua uma ‘ona fuli‘esea le ma‘a; auā o le ma‘a tele lava.

⁵ ‘Ua ulu atu i latou i totonu o le tu‘ugamau ‘ona va‘aia ai lea e i latou le taule‘ale‘a o nofo i le itū taumatau, ‘ua ‘ofu fo‘i o ia i ‘ofu talaloapa‘epa‘e; ‘ona matuā matata‘u ai lea o i latou.

⁶ A ‘ua fai mai o ia ‘iā te i latou, “ ‘Aua tou te matata‘u. O lo‘o ‘outou sā‘ilia Iesu le Nasareta, o lē na fa‘asatauroina; e lē o ‘i‘inei o ia, a ‘ua toetū mai; inā matamata ia i le mea na tu‘uina ai o ia e i latou.

⁷ ‘Ia ‘outou ō atu ma ta‘u atu i ona so‘o ‘atoa ma Peteru, ‘E muamua atu o ia ‘iā te ‘outou i Kalilaia; o le ā ‘outou iloa ai o ia i lea mea e pei lava ‘ona fetalai atu ai o ia ‘iā te ‘outou.’ ”

⁸ ‘Ona ō ‘ese lea o i latou mai le tu‘ugamau; ‘ua maua fo‘i i latou i le gatete ma le ofo tele; e le‘i ta‘uina atu fo‘i e i latou se mea e tasi i se isi; auā ‘ua matata‘u.

‘Ua Fa‘aali Iesu ‘iā Maria le Makatala

⁹ ‘Ua mavae le toetū mai o Iesu i le taeao o le aso Sa ‘ona fa‘aali muamua lea o ia ‘iā Maria le Makatala o le na tuli‘esea ai e ia temoni e to‘afitu.

¹⁰ Na alu fo‘i Maria ma ta‘u atu i ana uō a o fa‘anoanoa ma fētāgisi pea i latou.

¹¹ ‘Ina ‘ua fa‘alogo i latou i le tala fa‘apea na va‘aia e ‘iā Iesu ‘ua toetū mai, sa le‘i talitonu i latou.

‘Ua Fa‘aali Iesu i So‘o e To‘alua

¹² Sa toe fa‘aali mai Iesu i le isi to‘alua o i latou, ‘ua ‘ese lona tino mai, a o savavali atu i lā‘ua i le fāoa ‘a‘ai.

¹³ ‘Ona toe fo‘i mai lea o i lā‘ua ma ta‘u atu i isi, ‘ae sa lē talitonu fo‘i i latou.

‘Ua Fa‘aali Iesu i le To‘asefulu ma le Tasi

¹⁴ Sa toe fa‘aali mulimuli ane o ia i le to‘asefulu ma le tasi o i latou a o ‘a‘ai. ‘Ona a‘oa‘i lea o i latou e ia ‘ona o lo latou le fa‘atuatua ma le faigatā o latou loto, e ui lava ‘ina va‘aia o ia e i latou ‘ua toetū mai ‘ae sa le‘i talitonu lava.

¹⁵ ‘Ua fetalai atu fo‘i o ia ‘iā te i latou, “Ō atu ia ‘outou i le lalolagi uma ma folafola atu le Tala Lelei i tagata uma.

¹⁶ O lē e fa‘atuatua ma papatisoina e fa‘aolaina o ia; a o lē e lē fa‘atuatua, e fa‘asalaina ia.

¹⁷ O le ā tu‘uina atu fo‘i fa‘ailoga nei e iloa ai; e tuli‘esea e i latou temoni i lo‘u igoa; e tautala fo‘i i latou i gagana fou;

¹⁸ e fetāgofi fo‘i i latou i gata, ma ‘āfai e inu e i latou se mea ‘o‘ona o le ā le afaina i latou; e fa‘ae‘e atu fo‘i o latou lima i ē e mama‘i, ‘ona fa‘amālōlōina ai lea o i latou.”

‘Ua Afio A‘e Iesu i le Lagi

¹⁹ ‘Ua uma ‘ona fetalai atu le Ali‘i o Iesu ‘iā te i latou, ‘ona ‘aveina a‘e lea o ia i le lagi ma ‘ua nofo ai i le itū taumatau o le Atua.

²⁰ A ‘ua ō atu so‘o ma folafola le Tala Lelei i nu‘u uma lava; ‘ua galue fo‘i le Ali‘i fa‘atasi ma i latou, ma ‘ua fa‘amaonia le ‘upu na folafolaina i fa‘ailoga na faia e i latou.