Mareko 11 - Samoan Contemporary New Testament

O le Afio atu ma le Manumālō i Ierusalema

¹ ‘Ua latalata atu i latou i Ierusalema, i ‘a‘ai o Petefake ma Petania, ‘ua o‘o i le Mauga o Olive. ‘Ona ‘auina atu lea e Iesu ona so‘o e to‘alua;

² ‘ua fa‘atonu atu fo‘i e ia, “A ‘oulua o‘o atu i le nu‘u o lo‘o lumana‘i lua te va‘aia se tama‘i asini e le‘i ti‘eti‘e ai lava se isi, o lo‘o nonoa; ia ‘oulua tatalaina ma aumai.

³ ‘Āfai e fesili ane se isi, ‘ ‘Ua ‘oulua faia aiseā lenei mea?’ Fai i ai, ‘E mana‘o i ai le Ali‘i; ma o le ā toe fa‘afo‘i vave mai.’ ”

⁴ ‘Ona ō lea o i lā‘ua ma ‘ua tau atu i le tama‘i asini i le ala, o lo‘o nonoa i le faitoto‘a ‘ona la tatalaina loa lea.

⁵ ‘Ona fesili ane lea ‘iā te i lā‘ua o nisi sa tutū ai, “A tatala i fea le asini?”

⁶ ‘Ua tali atu i lā‘ua e pei lava ‘ona fetalai atu ai Iesu ‘iā te i lā‘ua, ‘ona tu‘uina atu loa lea o i lā‘ua e i latou e o.

⁷ ‘Ua la ‘aumaia le tama‘i asini ‘iā Iesu, ma ‘ua lafo e i latou o latou ‘ofu i luga o le asini, ma fa‘ati‘eti‘e ai Iesu.

⁸ E to‘atele fo‘i tagata ‘ua fola o latou ‘ofu i le ala, a o isi ‘ua sala lālā ma lau o la‘au ma ‘ua fola ai le ala.

⁹ ‘Ua ‘alalaga fo‘i e na muamua ma e na mulimuli, “Osana ia manuia lē o lo‘o maliu mai i le suafa o le Ali‘i.

¹⁰ ‘Ia manuia le Mālō o lo tatou tamā o Tavita, o le a o‘o mai. Osana i mea aupitoaluga.”

¹¹ ‘Ua o‘o atu Iesu i Ierusalema, ‘ona ulufale lea i le malumalu ma silasila solo i mea uma. ‘Ua o‘o i le afiafi, ‘ona maliu atu lea o ia i Petania fa‘atasi ma le to‘asefulu ma le lua.

‘Ua Fetu‘u e Iesu le Mati

¹² O le aso na soso‘o ai, na toe fo‘i mai ai i latou mai Petania, sa fia taumafa Iesu.

¹³ Na silafia mamao atu e ia le mati ‘ua lauolaola mai, o lea sa maliu atu i ai o ia pe maua ai sina mea‘ai; peita‘i e leai se fua na o lau auā e le‘i o‘o i le taimi e fua ai mati.

¹⁴ ‘Ua fetalai atu Iesu i le mati, “E leai lava se tagata na te toe ‘aina sou fua.” Sa fa‘alogo ai ona so‘o uma.

‘Ua Ulufale Iesu i le Malumalu

¹⁵ ‘Ua o‘o i latou i Ierusalema, ‘ona ulufale lea o Iesu i le malumalu ma amata loa ‘ona tutuli i fafo i latou uma o ē sa fefa‘ataua‘i ai i le malumalu. ‘Ua tafuli i lalo e ia laulau a i latou o ē na fa‘afesuia‘i tupe ma nofoa o ē na fa‘atau lupe,

¹⁶ ma sa le fa‘atagaina fo‘i e ia nisi e ui atu i le malumalu ma ni a latou avega.

¹⁷ ‘Ona a‘oa‘o atu lea e ia i tagata: “E le o tusia ‘ea, ‘E ta‘ua lo‘u fale o le fale tatalo mo tagata uma.’ A o lenei ‘ua faia e ‘outou ma nofoaga o ē e faomea.”

¹⁸ ‘Ua fa‘alogo ai ositaulaga sili ma a‘oa‘o tulafono ‘ona amata lea ‘ona sā‘ili e i latou se ala e fasiotia ai Iesu. ‘Ua matata‘u i latou ‘iā te ia auā sa matuā ofo tagata e to‘atele i lana a‘oa‘oga.

¹⁹ ‘Ua o‘o i le afiafi ‘ona ō atu lea o Iesu ma ona so‘o i tua o le ‘a‘ai.

O le A‘oa‘oga mai le Mati

²⁰ A o savavali ane i latou i le taeao o le aso na soso‘o ai, sa va‘aia e i latou le mati ‘ua matuā pe lava.

²¹ ‘Ona manatua lea e Peteru le mea na tupu ma ‘ua fai atu ‘iā Iesu, “Le A‘oa‘o e, va‘ai i le mati na e fetu‘u ‘ua pe!”

²² ‘Ua tali atu Iesu ‘iā te i latou, “ ‘Ia ‘outou fa‘atuatua i le Atua.

²³ O le ‘upu moni ‘ou te ta‘u atu ‘iā te ‘outou, so o se isi e fai atu i lenei mauga: ‘ ‘Ia lia‘iina oe ma lafoina i le sami,’ e aunoa ma le māsalosalo o lona loto ‘ae talitonu o ia e taunu‘u lava, ‘ona faia lava lea fa‘apea ‘iā te ia.

²⁴ O le mea lea ‘ou te fai atu ai ‘iā te ‘outou, so o se mea tou te tatalo atu ai ma le fa‘atuatua e faia lea mo ‘outou.

²⁵ So o se taimi tou te tutū ai i luga e tatalo, ia muamua ‘ona ‘outou fa‘amāgaloina nisi o lo‘o ‘outou tigā i ai ‘ina ‘ia fa‘amāgaloina fo‘i e lo ‘outou Tamā o i le lagi a ‘outou agasala.”

O le Fesili e Uiga I le Pule a Iesu

²⁷ ‘Ua toe fo‘i i latou i Ierusalema. A o maliu atu Iesu i le malumalu, ‘ona ō mai lea ‘iā te ia o ositaulaga sili, o a‘oa‘o tulafono ma toeaina,

²⁸ ‘ua fai atu ‘iā te ia, “O le ā le pule a o ai fo‘i nā na avatua ‘iā te oe lea pule e fai ai nei mea?”

²⁹ ‘Ona tali atu lea o Iesu ‘iā te i latou, “ ‘Ia ‘outou tali mai i la‘u fesili nei e tasi ‘ona ‘ou fa‘amatalaina atu ai lea o le pule o lo‘o ‘ou faia ai nei mea.

³⁰ O le papatisoga ‘ea a Ioane e mai le Atua pe mai tagata?”

³¹ ‘Ona fefinaua‘i lea o i latou lava: “O le ā sa tatou tali? ‘Āfai tatou te tali atu, ‘Mai le Atua,’ o le ā fesili mai loa o ia ‘iā te i tatou, ‘Na ‘outou le talitonu la o le ā ‘iā te ia?’

³² ‘Āfai fo‘i tatou te fai atu, ‘Mai tagata;’ ‘ua fefefe i latou i tagata; auā ‘ua talitonu i latou uma o Ioane o le perofeta moni o ia.”

³³ ‘Ona tali atu lea o i latou ‘iā Iesu, “Matou te le iloa.” ‘Ua fetalai atu Iesu ‘iā te i latou, “O le ā ‘ou le ta‘uina atu fo‘i la ‘iā te ‘outou le pule ‘ua ‘ou faia ai nei mea.”