Luka 3 - Samoan Contemporary New Testament

O le Tala‘iga a Ioane le Papatiso

¹ O lona sefulu ma le lima o tausaga o le nofoa‘iga a Tiperio Kaisara, a o ‘avea Ponotio Pilato ma kovana i Iutaia, o Herota fo‘i o le pule i Kalilaia, ma Filipo lona uso o le pule i Ituraia ma le nu‘u o Terekoniti. O aso lava fo‘i ia sa pule ai Lusanio i Apilene;

² a o ‘avea Ana ma Kaiafa ma ositaulaga sili, na o‘o mai ai le afioga a le Atua ‘iā Ioane le atali‘i o Sakaria, i le vao tu‘ufua.

³ ‘Ona alu atu ai lea o Ioane i nu‘u uma i tafatafa o Ioritana, ma tāla‘i atu i ai le papatisoga o le salamō, ‘ina ‘ia fa‘amāgaloina agasala.

⁴ E pei ‘ona tusia i le tusi a le perofeta o Isaia e fa‘apea: “O le leo o lē o lo‘o ‘alaga i le vao tu‘ufua: ‘Sauni le ala mo le Ali‘i, teuteu ia lelei lona ala.

⁵ ‘Ia fa‘atūtūmu vanu uma, ia fa‘alaugatasia fo‘i mauga ma mea maupu‘epu‘e uma, ia fa‘asa‘osa‘oina ogāala pi‘opi‘o, ma mea gaoā ia fa‘alauleleia.

⁶ E va‘aia fo‘i e tagata uma le fa‘aolataga mai le Atua.’ ”

⁷ E to‘atele tagata na ō ane ‘iā Ioane ‘ina ‘ia papatisoina. A ‘ua fai atu o ia ‘iā te i latou, “O ‘outou o fānau a gata fe‘ai! O ai na fai atu ‘iā te ‘outou e mafai ‘ona ‘outou sosola ‘ese i le to‘asā o le Atua o le ā o‘o mai?

⁸ ‘Ia fa‘aalia mai ia ‘outou amio ‘ua ‘outou salamō; a e ‘aua tou te fa‘apea ifo i o ‘outou loto, ‘O Aperaamo o lo matou tamā,’ auā ‘ou te ta‘u atu ‘iā te ‘outou, e mafai lava e le Atua ‘ona fa‘atupuina mai ma‘a nei ni fānau ma Aperaamo.

⁹ ‘Ua uma nei ‘ona saunia le mātau e tātu‘u ai la‘au mai o latou tafu‘e; o la‘au uma e lē fua mai i fua lelei, e tātu‘uina ma lafo i le afi.”

¹⁰ ‘Ua fesili mai tagata ‘iā te ia, “O le ā la le mea e ao ‘ona matou faia?”

¹¹ ‘Ua tali atu o ia, “O le tagata e lua ‘ona ‘ofutino, avatu le isi i le tagata e leai sona ‘ofu; o lē ‘ua ‘iā te ia mea‘ai, fa‘asoasoa atu i nisi o lo‘o fia ‘a‘ai.”

¹² ‘Ua ō mai fo‘i ‘iā te ia nisi o ē e aolafoga ‘ina ‘ia papatisoina. ‘Ua fesili mai i latou ‘iā te ia, “Le A‘oa‘o e, o le ā se mea a matou faia?”

¹³ ‘Ona tali atu lea o ia ‘iā te i latou, “ ‘Aua tou te aoina se mea e sili atu i le mea ‘ua fa‘atonuina.”

¹⁴ ‘Ua fesili ane fo‘i fitafita ‘iā te ia, “A o matou, o le ā sa matou mea a fai?” ‘Ona tali atu lea o ia ‘iā te i latou, “ ‘Aua tou te fao fua mea a se isi, ‘aua fo‘i tou te tu‘ua‘i fua se isi, a ‘ia malilie ‘outou i o ‘outou totogi.”

¹⁵ O ia a‘oa‘oga a Ioane, na tau manatunatu ai i latou, pe lē o ia lea o le Keriso.

¹⁶ A ‘ua fai atu Ioane ‘iā te i latou, “O a‘u nei ‘ou te papatiso atu ‘iā te ‘outou i le vai, a o lo‘o mulimuli mai le isi e sili lona tāua ‘iā te a‘u, e o‘o lava i nonoa o ona se‘evae e lē tatau ‘ona ‘ou tatalaina. O ia lea o le ā na papatisoina ‘outou i le Agaga Pa‘ia ma le afi.

¹⁷ ‘Ua ‘iā te ia lana asu fa‘amamā e sasaina ai lana fa‘aputugā saito; na te fa‘apotopotoina fo‘i le saito i lona fale saito, ‘ae susunuina le otaota i le afi e lē ma matineia.”

¹⁸ E tele fo‘i nisi a‘oa‘oga sa fa‘amalosi atu ai Ioane i le nu‘u, ma folafola atu ai le Tala Lelei ‘iā te i latou.

¹⁹ Na a‘oa‘oina e ia le kovana o Herota, ‘ina ‘ua faiavā o ia ‘iā Herotia le avā a lona uso, ‘atoa fo‘i ma isi mea leaga e tele na faia e ia.

²⁰ A ‘ua toe faia fo‘i e Herota ma se isi mea e sili atu ‘ona leaga, o le tu‘uina atu lea o Ioane i le falepuipui.

O le Papatisoga o Iesu

²¹ ‘Ua mae‘a ‘ona papatisoina o le nu‘u uma, ‘ona papatisoina ai loa lea o Iesu. A o tatalo o ia, na fa‘aavanoaina le lagi,

²² ‘ona afio ifo lea o le Agaga Pa‘ia i ona luga, ‘ua tino mai e pei se lupe. ‘Ua o‘o mai fo‘i le si‘ufofoga mai le lagi, ‘ua fa‘apea mai, “O lo‘u Atali‘i pele oe, ‘ua ‘ou fiafia lava ‘iā te oe.”

O le Gafa o Iesu Keriso

²³ Na amata e Iesu lana galuega ‘ina ‘ua tusa ma le tolusefulu ona tausaga, sa manatu fo‘i tagata, o ia o le atali‘i o Iosefa, o Iosefa o le atali‘i o Heli,

²⁴ o Heli o le atali‘i o Matata, o Matata o le atali‘i o Levi, o Levi o le atali‘i o Melekei, o Melekei o le atali‘i o Ianai, o Ianai o le atali‘i o Iosefa,

²⁵ o Iosefa o le atali‘i o Matatia, o Matatia o le atali‘i o Amosa, o Amosa o le atali‘i o Nauma, o Nauma o le atali‘i o Eseli, o Eseli o le atali‘i o Nagae,

²⁶ o Nagae o le atali‘i o Maato, o Maato o le atali‘i o Matatia, o Matatia o le atali‘i o Semeina, o Semeina o le atali‘i o Ioseka, o Ioseka o le atali‘i o Iota,

²⁷ o Iota o le atali‘i o Ioanana, o Ioanana o le atali‘i o Resa, o Resa o le atali‘i o Serupapelu, o Serupapelu o le atali‘i o Salatielu, o Salatielu o le atali‘i o Nerei,

²⁸ o Nerei o le atali‘i o Melekei, o Melekei o le atali‘i o Atei, o Atei o le atali‘i o Kosamo, o Kosamo o le atali‘i o Elematamo, o Elematamo o le atali‘i o Eru,

²⁹ o Eru o le atali‘i o Iosua, o Iosua o le atali‘i o Elisara, o Elisara o le atali‘i o Iorimo, o Iorimo o le atali‘i o Matata, o Matata o le atali‘i o Levi,

³⁰ o Levi o le atali‘i o Simeona, o Simeona o le atali‘i o Iuta, o Iuta o le atali‘i o Iosefa, o Iosefa o le atali‘i o Ionamo, o Ionamo o le atali‘i o Eliakimo,

³¹ o Eliakimo o le atali‘i o Melea, o Melea o le atali‘i o Mena, o Mena o le atali‘i o Matata, o Matata o le atali‘i o Natano, o Natano o le atali‘i o Tavita,

³² o Tavita o le atali‘i o Iese, o Iese o le atali‘i o Opeta, o Opeta o le atali‘i o Poasa, o Poasa o le atali‘i o Sala, o Sala o le atali‘i o Naasona,

³³ o Naasona o le atali‘i o Aminatapu, o Aminatapu o le atali‘i o Atamina, o Atamina o le atali‘i o Areni, o Areni o le atali‘i o Eserona, o Eserona o le atali‘i o Faresa, o Faresa o le atali‘i o Iuta,

³⁴ o Iuta o le atali‘i o Iakopo, o Iakopo o le atali‘i o Isaako, o Isaako o le atali‘i o Aperaamo, o Aperaamo o le atali‘i o Tara, o Tara o le atali‘i o Nakori,

³⁵ o Nakori o le atali‘i o Seruka, o Seruka o le atali‘i o Reu, o Reu o le atali‘i o Peleko, o Peleko o le atali‘i o Eperu, o Eperu o le atali‘i o Selaa,

³⁶ o Selaa o le atali‘i o Kainano, o Kainano o le atali‘i o Afasata, o Afasata o le atali‘i o Semu, o Semu o le atali‘i o Noa, o Noa o le atali‘i o Lameko,

³⁷ o Lameko o le atali‘i o Metusela, o Metusela o le atali‘i o Enoka, o Enoka o le atali‘i o Iareto, o Iareto o le atali‘i o Maalaelu, o Maalaelu o le atali‘i o Kainano,

³⁸ o Kainano o le atali‘i o Enosa, o Enosa o le atali‘i o Setu, o Setu o le atali‘i o Atamu, o Atamu o le atali‘i o le Atua.