Luka 22 - Samoan Contemporary New Testament

O le Taupulepulega e Fasioti Iesu

¹ ‘Ua latalata i le taimi o le Tausamiga o Areto e lē Fa‘afefeteina, e ta‘ua o le Paseka.

² ‘Ona sā‘ili lea e ositaulaga sili, ma a‘oa‘o tulafono, se ala e mafai ai ‘ona fasiotia Iesu e i latou; auā na matata‘u i latou o le nu‘u.

‘Ua Loto Iuta e Fa‘alata Iesu

³ ‘Ona uluitino lea o Satani ‘iā Iuta, e ta‘ua o le Sekara, o le isi lea o le to‘asefulu ma le lua.

⁴ ‘Ua alu loa Iuta talanoa ma ositaulaga sili, ma ta‘ita‘i o leoleo o le malumalu, i se auala e tu‘uina atu ai e ‘iā Iesu ‘iā te i latou.

⁵ ‘Ua fiafia lava i latou, ma ‘ua ofoina atu loa le tupe e totogi atu ‘iā te ia.

⁶ ‘Ua lelei lea tonu ‘iā Iuta, ma ‘ua amata loa ‘ona lamalama e ia se itūlā e faigofie ai ‘ona tu‘uina atu Iesu ‘iā te i latou, e aunoa ma le iloa e tagata o le nu‘u.

‘Ua Sauniuni Iesu e Taumafa i le Paseka

⁷ ‘Ua o‘o i le aso o Areto e lē Fa‘afefeteina, o le aso fo‘i lea e tatau ‘ona fasia ai o mamoe mo le Paseka.

⁸ ‘Ona ‘auina atu lea e Iesu Peteru ma Ioane, ma fai atu, “Inā o ia ‘oulua e sauni le Paseka mo i tatou, tatou te ‘a‘ai ai.”

⁹ ‘Ona fai mai lea o i lā‘ua ‘iā te ia, “O fea ‘e te finagalo ma te o e sauniuni ai?”

¹⁰ ‘Ona fetalai atu lea o ia ‘iā te i lā‘ua. “Fa‘alogo lelei mai: A ‘oulua o‘o atu i totonu o le ‘a‘ai, tou te fetaia‘i ma le tagata o lo‘o ‘ave le fagu vai ‘omea. ‘Ia ‘oulua mulimuli ‘iā te ia se‘ia o‘o i le fale e ulu atu i ai o ia.

¹¹ ‘Ia ‘oulua fai atu i le matai: ‘Fai mai le A‘oa‘o, po o fea le potu talimālō se‘i ‘a‘ai ai o ia ma ona so‘o i le Paseka?’

¹² O le a fa‘asino atu loa e ia ‘iā te ‘oulua le potu tele i le falealuga ‘ua uma ona teu; o ‘ina ‘ia ‘oulua sauni ai le ‘aiga o le Paseka.”

¹³ ‘Ua o i lā‘ua, ‘ona la maua ai lea o mea uma lava e pei ‘ona ta‘uina atu e Iesu ‘iā te i lā‘ua. ‘Ona sauni ai lea e i lā‘ua o le ‘aiga o le Paseka.

O le Talisuaga a le Ali‘i

¹⁴ ‘Ua o‘o i le taimi o le talisuaga, ‘ona nofo lea o Iesu i le laulau fa‘atasi ma ‘aposetolo.

¹⁵ ‘Ona fetalai atu lea o Iesu ‘iā te i latou, “ ‘Ua ‘ou matuā naunau tele lava e ‘ai i lenei Paseka fa‘atasi ma ‘outou, a o le‘i o‘o i lo‘u puapuagā.

¹⁶ Auā ‘ou te fai atu ‘iā te ‘outou, ‘ou te lē toe ‘ai ai lava se‘ia o‘o ‘ina fa‘ataunu‘uina i le Mālō o le Atua.”

¹⁷ ‘Ona tago ai lea o Iesu i le ipu, ‘ua fa‘afetai i le Atua, ma fetalai atu, “Tago ia i lenei ipu, ma tufatufa ane ‘iā te ‘outou;

¹⁸ auā ‘ou te fai atu ‘iā te ‘outou, ‘ou te lē toe inu lava i le fua o le vine, e āfua atu i le taimi nei se‘ia o‘o ‘ina o‘o mai le Mālō o le Atua.”

¹⁹ ‘Ua tago fo‘i o ia i le areto, ‘ua fa‘afetai i le Atua, ‘ona tofitofi ai lea, ma avatu ‘iā te i latou, ‘ua fetalai atu, “O lo‘u tino lenei ‘ua foa‘iina atu mo ‘outou. ‘Ia ‘outou faia lenei mea ma fa‘amanatuga ‘iā te a‘u.”

²⁰ Sa fa‘apea fo‘i i le ipu ‘ina ‘ua uma ‘ona ‘a‘ai; ‘ua fetalai atu, “O le ipu lenei, o le feagaiga fou lea i lo‘u toto, ‘ua fa‘amaligiina mo ‘outou.

²¹ “ ‘Ae va‘ai fo‘i: O lo‘o ‘i‘inei i le laulau fa‘atasi ma a‘u lē na te fa‘alataina a‘u.

²² E alu atu lava le Atali‘i o le Tagata e pei ‘ona tofia; a e talofa i lea tagata na te fa‘alataina o ia!”

²³ ‘Ona tu‘ufesilisili lea o i latou, o le tasi i le isi, po o ai o i latou o le a na faia lea mea.

O le Fefinaua‘iga po o ai e Sili

²⁴ Sa fefinaua‘i ona so‘o po o ai o latou e sili.

²⁵ ‘Ona fetalai atu lea o Iesu ‘iā te i latou, “O tupu o Nu‘u ‘ese ‘ua pule i o latou tagata; o ē e pule fo‘i ‘ua ta‘ua e i latou o ali‘i.

²⁶ ‘Ae lē fa‘apenā ‘outou; auā o lē e sili ‘iā te ‘outou, ia ‘avea o ia ma lē e aupito itiiti; o lē e pule fo‘i, ia fa‘apei o le ‘au‘auna.

²⁷ Auā, o ai ‘ea e sili; o lē ‘ua nofo ‘ea i le laulau e taumafa, po o lē o lo‘o ‘au‘auna ane ‘iā te ia? E lē o ia ‘ea lea o lo‘o nofo e taumafa? A o a‘u nei, ‘ua ‘ou i ai ‘iā te ‘outou e pei lava o le ‘au‘auna.

²⁸ “O ‘outou fo‘i, ‘ua ‘outou tumau ‘iā te a‘u i o‘u tofotofoga uma lava;

²⁹ ma e fa‘apei ‘ona tu‘uina mai e lo‘u Tamā le Mālō ‘iā te a‘u, fa‘apea fo‘i ‘ona ‘ou tu‘uina atu ai ‘iā te ‘outou,

³⁰ ‘ina ‘ia ‘outou ‘a‘ai ma feinu i la‘u la‘o‘ai i lo‘u Mālō, ma ‘ia ‘outou nonofo i nofoāli‘i e fa‘amasino ai itū‘āiga e sefulu ma le lua o Isaraelu.

‘Ua Ta‘u atu e Iesu o le a Fa‘afiti Peteru

³¹ “Simona e, Simona e, ‘ua mana‘o tele Satani e lūlū ‘iā te ‘outou e pei o le saito.

³² A ‘ua ‘ou tatalo mo oe, ‘ina ‘ia lē mavae lou fa‘atuatua. A o‘o fo‘i ‘ina e toe liliu mai ‘iā te a‘u, ‘ona e fa‘amalosi lea i ou uso.”

³³ ‘Ua tali atu Peteru ‘iā te ia, “Le Ali‘i e, ‘ua ‘ou sauni e o fa‘atasi ma oe i le falepuipui ‘atoa ma le oti.”

³⁴ ‘Ona fetalai atu lea o Iesu, “Peteru e, ‘ou te fai atu ‘iā te oe, e lē vivini moa i le po nei, se‘ia e fa‘afiti fa‘atolu mai ‘e te lē iloaina lava a‘u.”

O le ‘Atotupe, o le Taga, ma le Pelu

³⁵ ‘Ona fetalai atu lea o Iesu ‘iā te i latou, “O le taimi lea na ‘ou ‘auina atu ai ‘outou e aunoa ma se ‘atotupe, po o se taga po o ni se‘evae, sa ‘outou matitiva ‘ea i se mea e tasi?” ‘Ua fai mai i latou, “E leai lava.”

³⁶ ‘Ona fetalai atu lea o Iesu ‘iā te i latou, “O lenei la, o le tagata o i ai se ‘atotupe po o se taga, inā tago ia i ai; o se isi fo‘i e lē o i ai se pelu, ia fa‘atau atu lona peleue e fa‘atau mai ai se pelu.

³⁷ Auā ‘ou te fai atu ‘iā te ‘outou, e ao ‘ina taunu‘u ‘iā te a‘u mea ‘ua tusia, e pei ‘ona fai mai, ‘Na faitauina fo‘i o ia fa‘atasi ma ē e pagotatā.’ Auā e ao lava ‘ona fa‘ataunu‘uina o mea ‘ua tusia e uiga ‘iā te a‘u.”

³⁸ ‘Ua fai ane ona so‘o, “Le Ali‘i e, ‘ua ‘i‘inei pelu e lua!” ‘Ona fetalai atu lea o ia ‘iā te i latou, “ ‘Ua lava lea!”

‘Ua Tatalo Iesu

³⁹ ‘Ua maliu atu Iesu i fafo, ma aga‘i atu i le Mauga o Olive, e pei o lana masani; ‘ua mulimuli atu fo‘i ona so‘o ‘iā te ia.

⁴⁰ ‘Ua o‘o atu o ia i lea mea, ‘ona fetalai atu lea o ia ‘iā te i latou, “ ‘Ia ‘outou tatalo ‘ina ‘ia lē o‘o mai le fa‘aosoosoga ‘iā te ‘outou.”

⁴¹ ‘Ona maliu ‘ese lea o ia mai ‘iā te i latou i le mamao e pei o le togi o le ma‘a; ‘ona to‘otuli ai lea o ia ma tatalo,

⁴² “Lo‘u Tamā e, ‘āfai ‘e te finagalo i ai, ia ‘ave‘ese lenei ipu ‘iā te a‘u. ‘Ae ‘aua ne‘i faia lo‘u loto, a o lou finagalo, ‘ia faia lea.”

⁴³ ‘Ona fa‘aali mai lea ‘iā te ia o le agelu mai le lagi, ‘ua fa‘amalosi ‘iā te ia.

⁴⁴ ‘Ua tigāina tele lava o ia; ‘ua atili ai ‘ona tatalo naunauta‘i o ia; o lona afu fo‘i ‘ua pei o ‘alu‘alu toto ‘ua pa‘u‘ū ifo i le ‘ele‘ele.

⁴⁵ ‘Ua tula‘i o ia mai lana tatalo, ‘ona maliu atu lea i ona so‘o ma maua atu i latou o momoe; auā ‘ua mafatia i latou i le fa‘anoanoa.

⁴⁶ ‘Ona fetalai atu lea o ia ‘iā te i latou, “ ‘Ua ‘outou momoe aiseā? Tutū ia i luga ma tatalo, ‘ina ne‘i o‘o mai le fa‘aosoosoga ‘iā te ‘outou.”

O le Pu‘eina o Iesu

⁴⁷ A o fetalai atu o ia, ‘ae taunu‘u loa le ‘au o lo‘o ta‘ita‘iina mai e Iuta, o le tasi o le to‘asefulu ma le lua; ‘ua fa‘alatalata o ia ‘iā Iesu e sogi atu ‘iā te ia.

⁴⁸ A ‘ua fetalai atu Iesu ‘iā te ia, “Iuta e, ‘e te fa‘alataina ‘ea le Atali‘i o le Tagata i le sogi?”

⁴⁹ ‘Ua iloa e so‘o o ē sa fa‘atasi ma Iesu le mea ‘ua tupu, ‘ona fai ane lea o i latou ‘iā te ia, “Le Ali‘i e, a matou taia ‘ea i le pelu?”

⁵⁰ ‘Ua taia loa e le tasi o i latou le ‘au‘auna a le ositaulaga sili, ‘ua tipi‘esea ai lona taliga taumatau.

⁵¹ ‘Ona fetalai atu lea o Iesu, “ ‘Aua ne‘i toe faia se mea fa‘apea.” ‘Ona tago ai lea o ia i lona taliga ma fa‘amālōlō ‘iā te ia.

⁵² ‘Ona fetalai atu lea o Iesu i ositaulaga sili, ma ta‘ita‘i o leoleo o le malumalu, ‘atoa ma toeaina o ē na ō ane e pu‘e ‘iā te ia, “ ‘Ua ‘outou ō mai ‘ea ma pelu ma uatogi e peiseaī o a‘u o se faomea.

⁵³ Sa ‘ou i ai fa‘atasi ma ‘outou i le malumalu i aso faiso‘o, ‘ae tou te le‘i pu‘eina lava a‘u; ‘ae ‘ona o le itūlā lenei e fa‘atino ai lo tou mana‘o, ‘ia faia loa auā ‘ua pulea ‘outou e le pouliuli.”

‘Ua Fa‘afitia Iesu e Peteru

⁵⁴ ‘Ona pu‘eina lea o Iesu e i latou, ma ta‘ita‘i atu ‘iā te ia i le fale o le ositaulaga sili. A ‘ua mulimuli mamao atu Peteru.

⁵⁵ ‘Ua tafu e i latou le afi i totonu o le lotoā o le maota. ‘Ona nonofo ai lea o i latou i lalo, ‘ua nofo fo‘i Peteru fa‘atasi ma i latou.

⁵⁶ ‘Ua iloa atu o ia e le ‘au‘auna teine o lo‘o nofo mai i tafatafa o le afi, ‘ona pulato‘a lea ‘iā te ia, ma fai ane, “O le isi fo‘i lenei tagata sa fa‘atasi ma ia!”

⁵⁷ A ‘ua fa‘afiti Peteru ma fai ane, “Tama‘ita‘i e, ‘ou te lē iloa o ia!”

⁵⁸ ‘Ua toeitiiti ane, ‘ona va‘ai mai lea o le isi fo‘i tagata ‘iā te ia, ma fai mai, “O oe fo‘i le isi o i latou!” A ‘ua tali atu Peteru, “Ali‘i e, e lē o a‘u!”

⁵⁹ Pe tusa ‘ua ‘atoa le itūlā talu ai, ‘ona toe fai mai lea o le isi tagata ‘iā te ia, “E moni lava o le tagata lenei sa fa‘atasi ma ia auā o ia fo‘i o le Kalilaia.”

⁶⁰ A ‘ua tali atu Peteru, “Ali‘i e, ‘ou te lē iloa lea mea ‘e te fai mai ai.” ‘Ona vivini loa lea o moa a o tautala pea o ia.

⁶¹ ‘Ua fāliu le Ali‘i ma silasila lelei atu ‘iā Peteru. ‘Ona manatua ai lea e Peteru o le fetalaiga a le Ali‘i na fai ane ‘iā te ia, “E lē vivini moa se‘ia e fa‘afiti fa‘atolu mai ‘iā te a‘u.”

⁶² ‘Ona alu ai lea i fafo o Peteru, ‘ua tagi lotulotu.

‘Ua Tauemuina Iesu ma Sasaina

⁶³ O tagata na leoleoina Iesu, ‘ua tauemu i latou ma sasa ‘iā te ia.

⁶⁴ ‘Ua ufitia ona fofoga e i latou, ‘ona po mai ai lea ma ‘ua fesili mai ‘iā te ia, “Vavalo mai ia, po o ai na po atu ‘iā te oe?”

⁶⁵ E tele fo‘i isi ‘upuleaga na latou fāifāi ai ‘iā te ia.

O Iesu i Luma o le Fono

⁶⁶ ‘Ua ao, ‘ona fa‘apotopoto ai lea o toeaina o le nu‘u, ma ositaulaga sili, ‘atoa ma a‘oa‘o tulafono, ‘ua ta‘ita‘iina atu fo‘i o ia e i latou i luma o la latou fono, ma ‘ua fai atu,

⁶⁷ “Ta‘u mai ia ‘iā i matou po o oe lava o le Keriso?” ‘Ona fetalai atu lea o ia ‘iā te i latou, “ ‘Āfai ‘ou te ta‘uina atu ‘iā te ‘outou, tou te lē talitonu mai lava;

⁶⁸ ‘āfai fo‘i ‘ou te fesili atu ‘iā te ‘outou, tou te lē tali mai fo‘i ‘iā te a‘u.

⁶⁹ ‘Ae amata atu nei lava ‘ona nofo o le Atali‘i o le Tagata i le itū taumatau o le Atua e ona le malosi uma lava.”

⁷⁰ ‘Ona fai ane lea o i latou uma, “O oe ‘ea la o le Alo o le Atua?” ‘Ua fetalai atu o ia ‘iā te i latou, “O lea lava ‘ua ‘outou fai mai ai.”

⁷¹ ‘Ona fai ane lea o i latou, “O le ā se isi molimau tatou te mana‘omia, a o lea ‘ua tatou fa‘alogo atu ‘ua ta‘utino mai e ia lenā lava ‘upu?”