Luka 17 - Samoan Contemporary New Testament

O le Agasala

¹ ‘Ua fetalai atu Iesu i ona so‘o, “E tutupu mai pea lava mea e fa‘asesēina ai tagata; ‘ae talofa lava i lē e mafua ai ia mea!

² E sili pe ana nonoa se ma‘a tele i le ‘ua o lea tagata, ma lafoina i le sami, nai lo le faia e ia o se mea e fa‘asesēina ai se tasi o i latou nei e vaivai.

³ ‘Ia ‘outou fa‘aeteete: ‘āfai ‘ua sesē mai lou uso ‘iā te oe, a‘oa‘o ‘iā te ia; ‘āfai e salamō o ia, ia e fa‘amāgalo ‘iā te ia.

⁴ ‘Āfai e fa‘afitu i le aso ‘ona sesē mai o ia ‘iā te oe, ma fa‘afitu fo‘i i le aso ‘ona liliu mai o ia ‘iā te oe ma fai mai, ‘ ‘Ua ‘ou salamō,’ e ao ‘ina e fa‘amāgaloina pea lava o ia.”

O le Fa‘atuatua

⁵ ‘Ona fai ane lea o le ‘aposetolo i le Ali‘i, “ ‘Ia e fa‘atuputeleina lo matou fa‘atuatua.”

⁶ ‘Ua fetalai atu le Ali‘i: “ ‘Āfai e maua e ‘outou le fa‘atuatua e pei o le fatu la‘au itiiti o le sinapi, e mafai ‘ona ‘outou fai atu i lenei la‘au, ‘ ‘Ia lia‘iina oe ma totōina i le sami,’ ‘ona faia lava lea fa‘apenā.

O le Galuega a le ‘Au‘auna

⁷ “O ai o ‘outou e mafai ‘ona fai atu i lana ‘au‘auna ‘ua fo‘i mai i le vao, sa suatia ai e ia le ‘ele‘ele, pe sa leoleo ai fo‘i mamoe, ‘Sau loa ‘ina fai lau mea‘ai’?

⁸ E lē fai atu ‘ea ‘iā te ia, ‘Sauni mai loa la‘u mea‘ai; sui ou lavalava ma laulau mai loa la‘u mea‘ai se‘i ‘ou ‘ai, ma inu; a mae‘a ‘ona e ‘ai ai lea’?

⁹ E fa‘afetai atu ‘ea le matai i lea ‘au‘auna, e tusa i lona faia o mea uma na fa‘atonuina ai o ia e fai? Ailoga e fa‘apea.

¹⁰ E fa‘apenā fo‘i ‘outou; a uma ‘ona ‘outou faia o mea uma na poloa‘iina ai ‘outou, ‘ona ‘outou fai ane ai lea, ‘O ‘au‘auna lē aogā i matou nei; o mea uma ‘ua matou faia, o la matou galuega lava lenā.’ ”

‘Ua Fa‘amālōlō e Iesu e To‘asefulu

¹¹ ‘Ina ‘ua maliu atu Iesu i Ierusalema, sa ui atu o ia i Samaria ma Kalilaia.

¹² ‘Ua o‘o atu o ia i le isi ‘a‘ai, ‘ona fetaia‘i lea o ia ma lepela e to‘asefulu o lo‘o tutū mamao mai.

¹³ ‘Ua ‘alalaga mai i latou, “Le Ali‘i e Iesu, ia e alofa mai ‘iā te i matou!”

¹⁴ ‘Ua silafia i latou e Iesu, ‘ona fetalai atu lea o ia, “ō ia ma fa‘aali ‘outou i ositaulaga.” ‘Ona ō ai lea o i latou, ma sa fa‘amālōlōina loa.

¹⁵ ‘Ua iloa e le tasi o i latou ‘ua fa‘amālōlōina, ‘ona toe fo‘i mai ai lea, ‘ua vivi‘i atu i le Atua ma le leotele.

¹⁶ ‘Ua fa‘apa‘ū faō o ia i vae o Iesu, ma fa‘afetai atu ‘iā te ia; o le Samaria fo‘i o ia.

¹⁷ ‘Ona fetalai atu lea o Iesu, “E lē to‘asefulu ‘ea i latou na fa‘amālōlōina? A o fea le to‘aiva?

¹⁸ Aiseā ‘ua fo‘i mai ai na o lenei tagata ‘ese e fa‘afetai atu i le Atua?”

¹⁹ ‘Ona fetalai atu lea o Iesu ‘iā te ia, “Tu ia i luga ma alu, ‘ua fa‘amālōlōina oe i lou fa‘atuatua.”

O le o‘o mai o le Mālō

²⁰ ‘Ua fesiligia Iesu e faresaio pe o‘o mai afea le Mālō o le Atua. ‘Ona tali atu lea o ia ‘iā te i latou, “E lē o‘o mai le Mālō o le Atua ma ni fa‘ailoga va‘aia.

²¹ E lē fai ane fo‘i tagata, ‘O lea ‘ua ‘i‘inei!’ pe fai ane, ‘O la ‘ua i ilā!’ auā ‘ua i totonu lava ‘iā te ‘outou le Mālō o le Atua.”

²² ‘Ona fetalai atu lea o Iesu i ona so‘o: “E o‘o mai aso tou te manana‘o tele ai ‘ia iloa se aso e tasi o le Atali‘i o le Tagata, ‘ae tou te lē iloa.

²³ O le a fai ane fo‘i nisi ‘iā te ‘outou, ‘O lea ‘ua ‘i‘inei!’ pe fai ane, ‘O la ‘ua i ilā!’ ‘Aua tou te ō atu i ai, pe mulimuli ‘iā te i latou.

²⁴ Auā e pei ‘ona ‘emo mai o le uila mai le isi itūlagi, ma malamalama atu i le isi itūlagi, o le a fa‘apea lava le fa‘aalia mai o le Atali‘i o le Tagata i lona aso.

²⁵ ‘Ae tatau ‘ona mua‘i tigāina o ia i mea e tele, ma lafoa‘iina e tagata o lenei tupulaga.

²⁶ ‘Ae pei lava ‘ona faia i aso o Noa, e fa‘apea fo‘i ‘ona faia i aso o le Atali‘i o le Tagata.

²⁷ ‘Ua ‘a‘ai i latou ma feinu, ‘ua faiavā fo‘i i latou ma nofotane, e o‘o lava i le aso na ulu atu ai Noa i le va‘a; sa o‘o mai loa le lolo ma fano ai i latou uma.

²⁸ E pei fo‘i ‘ona faia i aso o Lota; ‘ua ‘a‘ai i latou ma feinu, ‘ua fa‘atau mai ma fa‘atau atu, ‘ua totō mea ma fausia fale;

²⁹ a o le aso lava na tu‘ua ai e Lota Sotoma, na to fa‘aua mai ai le afi ma le teiō mai le lagi, ma fano ai i latou uma.

³⁰ O le a fa‘apenā lava ‘ona faia i le aso e fa‘aalia mai ai le Atali‘i o le Tagata.

³¹ “O le tagata o lo‘o i luga o lona fale i lenā aso, ‘aua ne‘i toe alu ifo e ‘ave ni ana mea o i totonu o le fale; e fa‘apea fo‘i le tagata o lo‘o i le fanua, ‘aua le toe fo‘i mai o ia.

³² ‘Ia ‘outou manatua le avā a Lota!

³³ O lē e fia fa‘asao i lona lava ola, e maumau ai ‘iā te ia; a o lē e fa‘amāumāu i lona ola, e fa‘asaoina ai e ia.

³⁴ ‘Ou te fai atu ‘iā te ‘outou, o lenā po, e i ai ali‘i e to‘alua i le moega e tasi; e ‘ave‘esea le to‘atasi ‘ae tu‘ua le isi.

³⁵ E galulue fa‘atasi fo‘i fafine e to‘alua; e ‘ave‘esea le to‘atasi, ‘ae tu‘ua le isi.”

³⁷ ‘Ona fesili ane lea o ona so‘o ‘iā te ia, “Le Ali‘i e, o fea e taunu‘u ai na mea?” ‘Ua fetalai atu Iesu ‘iā te i latou, “O le mea e i ai le tino mate, e fa‘apotopoto i ai aeto.”