Kolose 3 - Samoan Contemporary New Testament

¹ O lenei, ‘āfai ‘ua toe fa‘atūina mai ‘outou fa‘atasi ma Keriso, ‘ia ‘outou sā‘ili i mea o i lugā, o lo‘o i ai Keriso, o lo‘o ti‘eti‘e o ia i le itū taumatau o le Atua.

² ‘Ia ‘outou loto atu i mea i lugā, ‘ae lē o mea i le lalolagi.

³ Auā ‘ua oti ‘outou, ‘ua lilo fo‘i lo ‘outou ola fa‘atasi ma Keriso i le Atua.

⁴ A o‘o ‘ina fa‘aali mai Keriso lo tatou ola, ‘ona iloa ai lea o ‘outou fa‘atasi ma ia i le mamalu.

O Le Ola Fou ‘iā Keriso

⁵ O lenei, ‘ia ‘outou fasiotia o ‘outou itūtino o i le lalolagi, o le faita‘aga, o le amioleaga, o le matāitu, o le tu‘inanau leaga ma le matape‘ape‘a, o le ifo i tupua lava lea.

⁶ O mea ia e o‘o mai ai le to‘asā o le Atua.

⁷ O ‘outou fo‘i na ‘outou savavali ai anamua, a o ‘outou nonofo ai.

⁸ Peita‘i, o aso nei, ‘ia ‘outou tu‘u‘eseina nei mea uma; o le ita, o le lotoa, o le lotoleaga, o le fai‘upu leaga, ‘atoa ma ‘upu matagā mai o ‘outou gutu.

⁹ ‘Aua le pepelo le isi tagata i le isi tagata, auā ‘ua ‘outou iloa ‘ua tu‘u‘esea le tagata tuai mai ‘iā te ‘outou ‘atoa ma ana galuega,

¹⁰ a ‘ua ‘o‘ofu i le tagata fou, o lē ‘ua fa‘afouina i le iloa, e fa‘atatau ia foliga i lē na faoa o ia.

¹¹ E lē fa‘a‘ese‘eseina ai le tagata Eleni ma le tagata Iutaia, po o le tagata ‘ua peritomeina ma le tagata e le‘i peritomeina, po o le tagata o Nu‘u ‘ese ma le tagata Sekutia, po o le tagata pologa ma le tagata sa‘oloto; a ‘ua ‘iā Keriso mea uma, o lo‘o i ai fo‘i o ia i mea uma lava.

¹² O lenei, ‘ia ‘outou ‘o‘ofu i le alofa mutimutivale, ma le agalelei, ma le loto maulalo, ma le agamalū, ma le ‘onosa‘i, fa‘apei o ē ‘ua filifilia e le Atua, o ē ‘ua pa‘ia ma ‘ua alofaina.

¹³ ‘Ua ‘outou fefa‘apalepalea‘i ma fefa‘amāgaloa‘i, pe ‘āfai ‘ua agaleaga atu se tagata i le isi tagata; fa‘apei ‘ona fa‘amāgaloina ‘outou e le Ali‘i, ia fa‘apea fo‘i ‘ona ‘outou faia.

¹⁴ A ‘ia fa‘asilisili le alofa i nei mea uma; o le fusi lenā e ‘ato‘atoa ai ona lelei.

¹⁵ ‘Ia pule fo‘i le filemū mai ‘iā Keriso i o ‘outou loto, o le mea lea ‘ua vala‘auina ai ‘outou e fai ma tino e tasi; ma ‘ia ‘outou saga fa‘afetai pea lava.

¹⁶ ‘Ia nofo mau ma olaola le afioga a Keriso i totonu ‘iā te ‘outou, a o ‘outou a‘oa‘o ma apoapoa‘i le isi i le isi i le poto uma lava, a o ‘outou pepese fo‘i i salāmo, ma pese, ma vi‘iga fa‘aleagaga, fa‘atasi ma le fa‘afetai i le Atua i o ‘outou loto.

¹⁷ O mea uma fo‘i tou te faia, po‘o le tautala atu po o le galuega e fa‘atinoina ai, ‘ia ‘outou faia ia mea uma lava i le suafa o le Ali‘i o Iesu, ma ‘ia fa‘afetai atu i le Atua le Tamā e ala ‘iā te ia.

O So‘otaga i le Vā Fealoa‘i i le Ola Fou

¹⁸ O ‘outou fafine, ‘ia ‘outou usiusita‘i ia ‘outou lava tane, pei ‘ona tatau i le Ali‘i.

¹⁹ O ‘outou tane, ‘ia ‘outou alolofa atu ia ‘outou avā, ‘aua fo‘i nei ‘outou sauā atu ‘iā te i latou.

²⁰ O ‘outou le fānau, ‘ia ‘outou usiusita‘i i o ‘outou matua i mea uma lava; auā o le mea lea e fiafia i ai le Ali‘i.

²¹ O ‘outou tamā, ‘aua le fa‘aitaina a ‘outou fānau, ‘ina ne‘i fa‘avaivai i latou.

²² O ‘outou tagata pologa, ‘ia ‘outou usiusita‘i i o ‘outou matai fa‘aletino i mea uma lava; ‘aua ne‘i ‘outou fa‘atagā ‘au‘auna e pei o ē e fa‘afiafia i tagata, a ‘ia faia mea uma ma le loto fa‘amaoni ma le mata‘u i le Ali‘i.

²³ O mea uma lava tou te faia, ia fai ma le loto i ai, e pei lava o lo‘o faia mo le Ali‘i ‘ae lē o tagata;

²⁴ auā ‘ua ‘outou iloa, e maua e ‘outou mai le Ali‘i le taui, o le tofi lea; auā ‘ua ‘outou ‘au‘auna i le Ali‘i o Keriso.

²⁵ O lē e amiolētonu, e maua lava e ia le taui o lana amiolētonu; e lē fa‘ailogaina fo‘i e ia se tagata.