Kolose 2 - Samoan Contemporary New Testament

¹ Auā ‘ou te mana‘o ‘ina ‘ia ‘outou iloa lo‘u matuā finau mo ‘outou, ma i latou o i Laotikaia, ‘atoa ma i latou uma o ē ‘ua va‘ai mai ‘iā te a‘u,

² ‘ina ‘ia fa‘amafanafanaina o latou loto, a o fa‘afeso‘ota‘i e le alofa, ‘ina ‘ia maua ai le ‘oloa uma o le mautinoa i le loto matala ma le poto, e iloa lelei ai le mea lilo a le Atua, o Keriso lea,

³ o lo‘o i ai ‘iā te ia le ‘oloa uma o le atamai ma le poto ‘ua natia ai.

⁴ ‘Ua ‘ou fai atu lea ‘upu ‘ina ne‘i fa‘asesēina ‘outou e se isi i ‘upu fa‘a‘ole‘ole.

⁵ Auā e ui lava ‘ina ‘ou lē fa‘atasi ma ‘outou i le tino, a o lo‘o ‘ou i ai ‘iā te ‘outou i le agaga, o lo‘o ‘ou fiafia e va‘ai atu i lo ‘outou nofo lelei, ma le mautū o lo ‘outou fa‘atuatua ‘iā Keriso.

O le ‘Ato‘atoa o le Ola ‘iā Keriso

⁶ O lenei, fa‘apei ‘ona ‘outou talia le Ali‘i o Keriso Iesu, ia fa‘apea ‘ona ‘outou ola ai ‘iā te ia;

⁷ ia maua‘a ‘outou ma ‘ia atiina a‘e ‘iā te ia, ma ‘ia fa‘atumauina i le fa‘atuatua, e pei lava ‘ona a‘oa‘oina ai o ‘outou, ia saga fa‘ateleina fo‘i la ‘outou fa‘afetai.

⁸ ‘Ia ‘outou fa‘aeteete, ‘ina ne‘i fa‘apologaina ‘outou e se isi i le poto lē aogā e fa‘asesēina ai, e tusa ma le ‘uputu‘u a tagata, e tusa fo‘i ma agaga leaga o le lagi ma le lalolagi, ‘ae lē tusa ma le finagalo o Keriso.

⁹ Auā o lo‘o mau i totonu ‘iā te ia le tumu uma lava o le uiga Atua ‘ua i lona tino.

¹⁰ ‘Ua fa‘a‘ato‘atoaina fo‘i ‘outou ‘iā te ia; o le ulu o ia o ali‘i sili uma lava ‘atoa ma faipule.

¹¹ ‘Ua fa‘aperitomeina fo‘i ‘outou ‘iā te ia i le peritomega e le‘i faia e lima, i le ‘ave‘esea o le tino fa‘aletino i le peritomega mai ‘iā Keriso.

¹² ‘Ua tanumia ‘outou fa‘atasi ma ia i le papatisoga, o lea fo‘i ‘ua ‘outou toe tutū mai ai fa‘atasi ma ia i le fa‘atuatua i le mana o le Atua, o lē na fa‘atūina mai o ia nai ē ‘ua oti.

¹³ O ‘outou fo‘i sa oti i amioleaga ma le lē peritomeina o ‘outou tino, ‘ua fa‘aolaina mai ‘outou e le Atua fa‘atasi ma Keriso, ‘ina ‘ua fa‘amāgaloina e le Atua a tatou agasala uma.

¹⁴ ‘Ua sōloia fo‘i e ia le feagaiga sa tatou nofo ‘aitalafu ai e tusa ma le tulafono sa tete‘e mai ‘iā te i tatou, ‘ua ‘ave‘eseina ai fo‘i e ia, ma ‘ua tu‘itu‘i i fao i le satauro.

¹⁵ ‘Ua tu‘u‘eseina e ia o ali‘i sili ma faipule, ‘ona fa‘aalia mai lea o i latou ‘ia iloa uma, ‘ua manumālō fo‘i o ia ‘iā i latou i lea lava mea.

¹⁶ O lenei, ‘aua ne‘i fa‘amasinoina ‘outou e se isi i mea tou te ‘a‘ai ai, po o mea tou te feinu ai, po o tausamiga i aso fa‘apitoa, po o masina fa‘ato‘ā va‘aia, po o Sapati.

¹⁷ O nei mea uma ‘ua na o ni ata ia o mea o le a o‘o mai, peita‘i o Keriso e ona le tino.

¹⁸ ‘Aua lava ne‘i ta‘ulēaogāina ‘outou e se tagata, ‘ona ‘ua sili i lea tagata le fa‘amaulalo ma ifo atu i agelu, ma ‘ua fa‘alagolago fo‘i i mea e va‘aia, ma ‘ua fa‘afefeteina ai fua lona lava mafaufau fa‘aletino.

¹⁹ ‘Ua lē tāofi mau atu fo‘i o ia i le ulu, o lē ‘ua tausia ai ma fa‘amalosia ai le tino ‘atoa, i mea e fa‘afeso‘ota‘i ai, ma so‘oga uma, o lo‘o ola ai fo‘i, ‘ina ‘ua fa‘atupuina mai e le Atua.

Oti ma Ola Fa‘atasi ma Keriso

²⁰ O lenei, ‘āfai ‘ua ‘outou oti fa‘atasi ma Keriso i agaga leaga o le lagi ma le lalolagi, ‘ua ‘outou savavali aiseā peiseaī ‘ua ‘outou nonofo pea i le lalolagi? ‘Ua ‘outou usiusita‘i aiseā i fa‘atonuga:

²¹ “ ‘Aua ne‘i pa‘i atu i ai,” “ ‘Aua ne‘i tofo,” “ ‘Aua ne‘i tago”

²² (o mea uma ia e fano ai pe a tago i ai), e tusa ma poloa‘iga ma mea e a‘oa‘o atu e tagata?

²³ O mea ia e foliga i le poto, ‘ona o le fa‘atagā amio atua, fa‘atagā loto maulalo, ma le fa‘asaunoa fua i le tino, ‘ae lē aogā ia mea mo le tāofia ai o tu‘inanau.