Kolose 1 - Samoan Contemporary New Testament

O ‘Upu Fa‘afeiloa‘i

¹ O a‘u o Paulo, le ‘aposetolo a Keriso Iesu e tusa ma le finagalo o le Atua, ma Timoteo lo tatou uso.

² ‘Ua ‘ou tusi atu i le au pa‘ia i Kolose, o le au uso fa‘amaoni o lo‘o ‘iā Keriso: ‘Ia ‘iā te ‘outou le alofa tunoa ma le manuia mai le Atua lo tatou Tamā.

O le Tatalo Fa‘afetai

³ Ma te fa‘afetai e lē aunoa i le Atua, le Tamā o lo tatou Ali‘i o Iesu Keriso, ia ma talosaga mo ‘outou,

⁴ auā ‘ua ma fa‘alogo i le tala i lo ‘outou fa‘atuatua ‘iā Keriso Iesu, ma lo ‘outou alofa i le au pa‘ia uma;

⁵ ‘ona o le fa‘amoemoe ‘ua teuina mo ‘outou i le lagi. O le fa‘amoemoe lea na ‘outou fa‘alogo ai anamuā i le ‘upu moni o lo‘o i le Tala Lelei,

⁶ ‘ua i ai nei lea ‘iā te ‘outou e pei ‘ona i ai i le lalolagi uma. O lo‘o fua mai ai fo‘i e pei ‘ona faia ‘iā te ‘outou talu mai le aso na ‘outou fa‘alogo ai, ma iloa lelei ai ma le fa‘amaoni le alofa tunoa o le Atua,

⁷ e pei lava ‘ona a‘oa‘oina ai ‘outou e Epafara. O le fesoasoani pele o ia ‘iā te i mā‘ua. O le ‘au‘auna fa‘amaoni fo‘i o ia a Keriso mo i matou,

⁸ ma o ia fo‘i lea na fa‘ailoa mai ‘iā te i mā‘ua lo ‘outou alofa mai i le Agaga.

⁹ O le mea lea, ‘ua lē mapu ai la ma tatalo mo ‘outou talu mai le aso na ma fa‘alogo ai i lea tala. ‘Ua ma tatalo atu fo‘i ‘ina ‘ia ‘ato‘atoa ‘ona ‘outou iloa lelei lona finagalo, i le poto uma ‘atoa ma le mafaufau fa‘aleagaga;

¹⁰ ‘ina ‘ia ‘outou savavali ai e tusa ma le Ali‘i, ‘ina ‘ia fiafia mai o ia ‘iā te ‘outou i mea uma, ma ‘ia ‘outou fua mai i galuega lelei uma lava, ma ‘ia saga fa‘ateleina pea lo ‘outou iloa lelei o le Atua.

¹¹ ‘Ia fa‘amalosia ‘outou i le malosi uma lava, e tusa ma lona malosi silisili, e i‘u ai i le tumau ma le ‘onosa‘i ‘atoa ma le ‘oli‘oli,

¹² ma fa‘afetai atu i le Tamā, o lē na saunia i tatou ‘ina ‘ia mafai ‘ona tatou ‘auai i le tofi o le au pa‘ia o i le malamalama.

¹³ O ia ‘ua na lavea‘iina i tatou mai le pule a le pouliuli, ma ‘aumaia i tatou i le mālō o lona lava Alo pele;

¹⁴ o ia ‘ua tatou maua ai le togiola, o le fa‘amāgaloina lea o agasala.

O le Silisili ‘Ese o Keriso

¹⁵ O Keriso o le fa‘atusa o le Atua e lē va‘aia, ma o le ulumatua fo‘i o ia o mea uma lava na faia.

¹⁶ Auā na faia e ia mea uma lava, o mea i le lagi ma mea i le lalolagi, o mea e va‘aia ma mea e lē va‘aia, o nofoāli‘i, ma ali‘i, ma ali‘i sili, ma faipule. Na faia e ia mea uma lava, na faia fo‘i mo ia.

¹⁷ O ia fo‘i o lē na muamua i lo mea uma lava, ma o lo‘o fa‘atumauina mea uma lava ‘iā te ia.

¹⁸ O ia o le ulu o le tino, o le ekalesia lea. O ia fo‘i o le amataga, o le ulumatua o ē ‘ua oti, ‘ina ‘ia ‘avea o ia ma lē e silisili i mea uma lava.

¹⁹ Auā ‘ua finagalo le Atua ia mau i totonu ‘iā Keriso lona tumu ‘ato‘atoa;

²⁰ ‘ina ‘ia fa‘aleleia e le Atua mea uma lava ‘iā te ia e ala ‘iā Keriso; ‘ina ‘ia fa‘aleleia i le toto o lona satauro, mea i le lalolagi ‘atoa ma mea o i le lagi.

²¹ O ‘outou fo‘i, o ē sa tagata ‘ese anamua, ma sa ‘avea o ia ma o ‘outou fili i o ‘outou loto, i lo ‘outou faia o mea leaga.

²² ‘Ua fa‘aleleia nei ‘outou ma ia i lona tino tagata, ‘ina ‘ua maliu, ‘ina ‘ia tu‘uina atu ‘outou e ia, o le au pa‘ia e lē ta‘uleagaina, e leai fo‘i se mea e fa‘asalaina ai i ona lava luma.

²³ Pe ‘āfai tou te tumau pea i le fa‘atuatua, ‘ia tumau e lē maluelueina, ‘ia lē fa‘ate‘a‘eseina fo‘i ‘outou mai le fa‘amoemoe o i le Tala Lelei na ‘outou fa‘alogo ai, sa tala‘iina atu fo‘i i tagata uma lava i le lalolagi. O a‘u o Paulo, ‘ua ‘avea a‘u ma ‘au‘auna ‘ona o lea lava Tala Lelei.

O le Galuega a Paulo i le Ekalesia

²⁴ ‘Ou te ‘oli‘oli nei i o‘u puapuagā ‘ona o ‘outou, ‘ou te fa‘a‘atoa fo‘i i lo‘u tino mea ‘ua totoe i puapuagā o Keriso ‘ona o lona tino, o le ekalesia lea.

²⁵ ‘Ua fai fo‘i a‘u ma ‘au‘auna i ai e tusa ma le tofiga mai le Atua, ‘ua tu‘uina mai ai ‘iā te a‘u mo ‘outou, ‘ina ‘ia matuā folafolaina le afioga a le Atua.

²⁶ O le mea lilo lea sa natia talu mai anamuā i augā tupulaga ‘ua mavae, a ‘ua fa‘aalia mai i aso nei i ona tagata pa‘ia.

²⁷ Na finagalo fo‘i le Atua e fa‘ailoa atu ia i latou le silisili ‘ona lelei o lenei mea lilo o i Nu‘u ‘ese, o Keriso lava lea o lo‘o ‘iā te ‘outou, o le fa‘amoemoe i le manuia.

²⁸ O ia lava o lo‘o matou tala‘iina atu, ma apoapoa‘i atu i tagata uma, ma a‘oa‘o atu ai i tagata uma i le poto uma lava, ‘ina ‘ia matou tu‘uina atu tagata uma ‘ua matutua ‘iā Keriso.

²⁹ O le mea lea ‘ou te galue ai, ma tauivi pea lava e tusa ma le malosi uma o lo‘o fa‘agae‘etia e ia i totonu ‘iā te a‘u.