Ioane 9 - Samoan Contemporary New Testament

‘Ua Fa‘amālōlōina e Iesu le Tagata na Fānau mai o Tauaso

¹ A o maliu atu Iesu, na silafia e ia le tagata na fānau mai o tauaso.

² Sa fesili atu ona so‘o ‘iā te ia, “Le A‘oa‘o e, o ai ‘ea na agasala, ‘ua pogai ai ‘ona fānau mai o ia o tauaso? O ona mātua ‘ea po o ia?”

³ ‘Ua tali atu Iesu, “E le‘i agasala o ia, po o ona mātua; a ‘ua faia lea mea ‘ina ‘ia fa‘aalia ai galuega a le Atua ‘iā te ia.

⁴ E tatau ‘ona tatou faia galuega a lē na ‘auina mai a‘u a o ao; a o‘o mai le po, e lē mafai e se isi ‘ona galue ai.

⁵ O aso uma lava ‘ou te i ai i le lalolagi, o a‘u o le malamalama o le lalolagi.”

⁶ ‘Ua uma ‘ona fetalai atu Iesu i lenā ‘upu, ‘ona feanu lea o ia i le ‘ele‘ele, ma faia le palapala i feanuga, ma ‘ua nini ai mata o le tagata,

⁷ ma fetalai atu ‘iā te ia, “Alu e fufulu ou mata i le Ta‘elega o Seloa.” (O le uiga o lea igoa, o le “ ‘Auina.”) Na alu o ia ma fufulu ona mata, ‘ua fo‘i mai ‘ua va‘ai.

⁸ ‘Ona fesili ane lea o ē na latou tuā‘oi, ‘atoa ma tagata o ē na va‘ai muamua ‘iā te ia o ‘aisi, “E lē o ia ‘ea lenei sa masani ‘ona nofo ma ‘aisi atu i tagata?”

⁹ ‘Ua fai ane nisi, “O ia lenā,” a ‘ua fai mai isi, “Leai, e lē o ia, ‘ae foliga ‘iā te ia.” A ‘ua fai mai o ia, “O a‘u lava lenei.”

¹⁰ ‘Ona fesili atu lea o i latou ‘iā te ia, “Na fa‘apefea ‘ona pupula ou mata?”

¹¹ ‘Ua tali mai o ia, “O le tagata e igoa ‘iā Iesu na faia e ia le palapala, ma nini ai o‘u mata, ma fai mai ‘iā te a‘u, ‘Alu i Seloa ma fufulu ai ou mata.’ Sa ‘ou alu ma fufulu, ma ‘ua mafai ‘ona ‘ou va‘ai.”

¹² ‘Ua fesili atu i latou, “O fea o i ai o ia?” ‘Ua tali mai o ia, “ ‘Ou te lē iloa.”

‘Ua Su‘esu‘e e Faresaio Lē na Fa‘amālōlōina

¹³ ‘Ona ‘ave lea e i latou o le tagata na tauaso i faresaio.

¹⁴ O le aso Sapati na fai ai e Iesu le palapala, ma fa‘apupula ai ona mata.

¹⁵ ‘Ona toe fai atu lea o faresaio i le tagata pe na fa‘apefea ‘ona toe va‘ai. ‘Ua fai atu o ia ‘iā te i latou, “Na tu‘u e ia palapala i o‘u mata, ‘ona ‘ou fufuluina lea ma ‘ua mafai ai nei ‘ona ‘ou va‘ai.”

¹⁶ ‘Ua fai mai nisi o faresaio, “E lē mai le Atua le tagata na faia lenei mea, auā ‘ua lē usita‘i o ia i le tulafono o le Sapati.” A ‘ua fai ane isi, “E mafai fa‘apefea e se tagata agasala ‘ona fai o ni fa‘ailoga fa‘apenei?” ‘Ona fevaevaea‘i lea o i latou.

¹⁷ ‘Ona toe fesili atu lea o faresaio i le tagata, “O le ā sau ‘upu e uiga ‘iā te ia, auā ‘ua fa‘apupulaina e ia ou mata?” ‘Ua tali mai o ia, “O le perofeta o ia.”

¹⁸ E le‘i talitonu tagata Iutaia na tauaso o ia, ma ‘ua mafai nei ‘ona va‘ai; o lea ‘ua vala‘auina ai e i latou mātua o le tagata,

¹⁹ ma fesili atu ‘iā te i lā‘ua, “O la ‘oulua tama ‘ea lenei? O le ā la ‘oulua ‘upu, na fānau mai ‘ea o ia o tauaso? Na fa‘apefea ‘ona toe va‘ai nei o ia?”

²⁰ ‘Ua tali atu ona mātua, “ ‘Ua ma iloa o la ma tama lava lenei, ‘ua ma iloa fo‘i na fānau mai o ia o tauaso.

²¹ ‘Ae ma te lē iloa pe na fa‘apefea ‘ona mafai ‘ona va‘ai, ma te lē iloa fo‘i po o ai na fa‘apupulaina ona mata. Fesili atu ‘iā te ia; ‘ua matua lava o ia, e mafai lava e ia ‘ona tali mai.”

²² Na fai e ona mātua lenā ‘upu ‘ona ‘ua fefefe i lā‘ua i tagata Iutaia; auā ‘ua uma ‘ona lotogatasi tagata Iutaia, ‘āfai e ta‘utino e se isi o Iesu o le Keriso, o le a tuli‘esea mai le sunako.

²³ O le pogai lea na fai ane ai ona mātua, “ ‘Ua matua o ia; fesili ‘iā te ia!”

²⁴ ‘Ua toe vala‘auina fa‘alua e i latou le tagata na fānau mai o tauaso, ma fai atu ‘iā te ia, “Folafola mai nei i luma o le Atua o le a e fa‘aali mai le ‘upu moni. ‘Ua matou iloa o le tagata agasala lenā tagata.”

²⁵ ‘Ua tali mai le tagata, “ ‘Ou te lē iloa po o ia o se tagata agasala pe leai. E tasi le mea ‘ua ‘ou mautinoa: sa ‘ou tauaso, a o lenei ‘ua ‘ou va‘ai.”

²⁶ ‘Ua fesili atu i latou, “O le ā le mea na faia e ia ‘iā te oe? Na fa‘apefea ‘ona fa‘apupulaina e ia ou mata?”

²⁷ ‘Ua tali mai o ia, “ ‘Ua uma ‘ona ‘ou ta‘u atu ‘iā te ‘outou, ‘ae tou te le‘i fa‘alogo mai lava. O le ā la le mea ‘ua ‘outou toe fia fa‘alogo mai ai? ‘Ua ‘outou manana‘o ‘ea ia ‘avea fo‘i ‘outou ma ona so‘o?”

²⁸ ‘Ona fetu‘uina lea o ia e i latou: “O oe o lona so‘o; a o i matou nei o so‘o o Mose.

²⁹ ‘Ua matou iloa na fetalai le Atua ia Mose; a o lenei tagata, matou te lē iloa le mea na sau ai o ia.”

³⁰ ‘Ua tali mai le tagata, “O se mea matuā uiga ‘ese lenei mea! Tou te lē iloa le mea na sau ai o ia, ‘ae na fa‘apupulaina e ia o‘u mata!

³¹ ‘Ua matou iloa fo‘i e lē fa‘afofoga le Atua i tagata agasala; a o lē e tapua‘i i le Atua ma faia lona finagalo, e fa‘afofoga mai le Atua ‘iā te ia.

³² Talu mai le amataga o le lalolagi, e le‘i fa‘alogoina lava se isi ‘ua na fa‘apupulaina mata o se tagata na fānau mai o tauaso;

³³ ana lē mai le Atua lenei tagata, e lē mafaia e ia ‘ona fai se mea.”

³⁴ ‘Ua toe tali atu i latou ‘iā te ia, “Na fānaua oe i le agasala tele, a o le a e a‘oa‘o mai ‘ea i matou?” ‘Ona tuli lea o ia e i latou i fafo mai le sunako.

Tauaso Fa‘aleagaga

³⁵ ‘Ua fa‘alogo Iesu ‘ua tulia o ia e i latou, ma ‘ua maua fo‘i o ia e Iesu, ‘ona fetalai atu lea o ia, “Po ‘ua e fa‘atuatua ‘ea i le Atali‘i o le Tagata?”

³⁶ ‘Ua tali mai o ia, “Le Ali‘i e, se‘i e fa‘aali mai ‘iā te a‘u po o ai o ia, ‘ina ‘ia ‘ou talitonu ai ‘iā te ia.”

³⁷ ‘Ua fetalai atu Iesu ‘iā te ia, “ ‘Ua uma ‘ona e iloa o ia, ma o ia fo‘i lea o lo‘o tautala atu nei ‘iā te oe.”

³⁸ ‘Ua fai mai le tagata, “Le Ali‘i e, ‘ua ‘ou fa‘atuatua.” ‘Ona ifo lea o ia ‘iā Iesu.

³⁹ ‘Ua fetalai atu Iesu, “ ‘Ua ‘ou sau e fa‘amasino le lalolagi lenei, ‘ina ‘ia va‘ai ē e tauaso, ma ‘ia fa‘atauasoina i latou o lo‘o va‘ai.”

⁴⁰ ‘Ua fa‘alogo ai nisi faresaio sa fa‘atasi ma ia, ‘ona fai ane lea o i latou ‘iā te ia, “Po ‘ua tauaso ‘ea fo‘i i matou?”

⁴¹ ‘Ua tali atu Iesu, “ ‘Ana ‘outou tauaso, po ‘ua leai sa ‘outou agasala; ‘ae peita‘i ‘ona ‘ua ‘outou fai mai, ‘ ‘Ua matou va‘ai,’ o le mea lea ‘ua tumau ai pea la ‘outou agasala.”