Ioane 8 - Samoan Contemporary New Testament

O le Fafine Mulilua

¹ A ‘ua maliu atu Iesu i le Mauga o Olive.

² O le taeao o le aso na soso‘o ai, na toe maliu atu ai o ia i le malumalu. Sa fa‘apotopoto ane tagata e to‘atele ‘iā te ia, ‘ona nofo lea o ia i lalo, ma amata ‘ona a‘oa‘o ‘iā te i latou.

³ Na avane e a‘oa‘o tulafono ma faresaio le fafine ‘ua maua o mulilua, ma ‘ua fa‘atū i o latou luma.

⁴ ‘Ua fai atu i latou ‘iā Iesu, “Le A‘oa‘o e, ‘ua maua lenei fafine o mulilua.

⁵ ‘Ua fa‘atonuina e Mose i matou i le tulafono, e tatau ‘ona fa‘asala i fafine fa‘apenei, i le fetogi i ma‘a ‘ia oti. O le ā sau ‘upu?”

⁶ ‘Ua fesili atu i latou ‘iā te ia, ‘ina ‘ia maileia ai ma molia o ia e i latou. ‘Ae peita‘i, sa punou Iesu ma tusitusi i lona tamatama‘ilima i le ‘ele‘ele.

⁷ A o fesilisili ane pea i latou ‘iā te ia, sa tu loa Iesu ma fetalai atu ‘iā te i latou, “A i ai se isi o ‘outou e leai sana agasala, ‘ia muamua togi sana ma‘a ‘iā te ia.”

⁸ ‘Ona toe punou lea o ia ma tusitusi i le ‘ele‘ele.

⁹ ‘Ua fa‘alogo atu i latou i lenā ‘upu, ‘ona ō atu ai lea o i latou ta‘ito‘atasi i fafo, na muamua ē e matutua. ‘Ua tu‘ua na o Iesu lava, ma le fafine o lo‘o tu i totonu.

¹⁰ Na toetū o ia ma fetalai atu ‘iā te ia, “Funa e, o fea o i ai i latou? ‘Ua leai ‘ea se isi o totoe e fa‘asala ‘iā te oe?”

¹¹ ‘Ua tali mai o ia, “Le Ali‘i e, ‘ua leai se isi.” ‘Ua fetalai atu Iesu, “ ‘Ou te lē fa‘asalaina fo‘i oe. Alu ia oe, ‘aua ‘e te toe agasala.”

O Iesu o le Malamalama o le Lalolagi

¹² ‘Ua toe fetalai atu Iesu ‘iā te i latou, “O a‘u o le malamalama o le lalolagi. O lē e mulimuli mai ‘iā te a‘u, e lē savali o ia i le pouliuli; ‘ae ‘iā te ia le malamalama o le ola.”

¹³ ‘Ua fai mai faresaio ‘iā te ia, “ ‘Ua e molimau oe ‘iā te oe lava, e lē fa‘amaoni lau molimau.”

¹⁴ ‘Ua tali atu Iesu, “E leai, e ui lava ‘ina ‘ou molimau a‘u ‘iā te a‘u; e fa‘amaoni lava la‘u molimau, auā ‘ua ‘ou iloa le mea na ‘ou sau ai, ma le mea ‘ou te alu atu i ai.

¹⁵ ‘Ua ‘outou fa‘amasino fa‘aletagata; ‘ou te lē fa‘amasinoina se isi.

¹⁶ ‘Ae peita‘i, ‘āfai ‘ou te fa‘amasino atu, e fa‘amaoni la‘u fa‘amasinoga; auā ‘ou te lē to‘atasi a‘u, a o lo‘o fa‘atasi pea a‘u ma le Tamā na ‘auina mai a‘u.

¹⁷ O lo‘o tusia i la ‘outou tulafono, e fa‘amaoni le molimau a tagata e to‘alua.

¹⁸ ‘Ou te molimau a‘u ‘iā te a‘u, o le Tamā fo‘i na ‘auina mai a‘u, o lo‘o molimau ‘iā te a‘u.”

¹⁹ ‘Ona fesili ane lea o i latou, “O fea o i ai lou tamā?” ‘Ua tali atu Iesu, “Tou te lē iloa a‘u po o lo‘u Tamā. ‘Ana ‘outou iloa a‘u, po ‘ua ‘outou iloa fo‘i lo‘u Tamā.”

²⁰ Na fetalai atu o ia i nei ‘upu, a o a‘oa‘o ia i le malumalu i le mea e tali ai taulaga. E le‘i pu‘eina fo‘i o ia e se isi, auā e le‘i o‘o i lona taimi.

Tou te lē Mafai ‘ona ō i le Mea ‘Ou te Alu i ai

²¹ ‘Ua toe fetalai atu Iesu ‘iā te i latou, “O le a ‘ou alu ‘ese, ‘ona ‘outou sā‘ilia lea o a‘u; ‘ae oti ‘outou ia ‘outou lava agasala. E lē mafai e ‘outou ‘ona ō i le mea ‘ou te alu i ai.”

²² ‘Ona fai ane lea o tagata Iutaia, “Fai mai o ia, ‘Tou te lē mafaia ‘ona ō i le mea ‘ou te alu atu i ai.’ O lona uiga ‘ea o le a fasioti o ia e ia lava?”

²³ ‘Ua tali atu Iesu, “E mai le lalolagi nei ‘outou, ‘ae ‘ou te sau mai lugā; e mai le lalolagi ‘outou, ‘ae lē mai le lalolagi a‘u.

²⁴ O le pogai lea na ‘ou fai atu ai e oti ‘outou ia ‘outou agasala; auā ‘āfai tou te lē talitonu mai o a‘u o ia, e oti ‘outou ia ‘outou agasala.”

²⁵ ‘Ona fesili mai lea o i latou ‘iā te ia, “O ai ‘ea oe?” ‘Ua tali atu Iesu, “O a‘u lē na ‘ou fai atu ai ‘iā te ‘outou mai le amataga.

²⁶ E tele mea ‘ou te fia tautala atu ai e uiga ‘iā te ‘outou. O lē na ‘auina mai a‘u e fa‘amaoni, ‘ou te fa‘aali atu fo‘i i le lalolagi mea na ‘ou fa‘alogo ai ‘iā te ia.”

²⁷ Sa lē malamalama i latou ‘ina ‘ua fetalai atu o ia e uiga i le Tamā.

²⁸ O lea na fetalai atu ai Iesu ‘iā te i latou, “Pe a ‘outou si‘itia i luga le Atali‘i o le Tagata, ‘ona ‘outou iloa ai lea o a‘u lava o ia; ‘ona ‘outou iloa ai fo‘i lea ‘ou te lē o faia se mea e a‘u lava, ‘ae ‘ou te faia na o mea e a‘oa‘o mai e le Tamā ‘iā te a‘u.

²⁹ O lo‘o ma fa‘atasi fo‘i ma lē na ‘auina mai a‘u; na te lē tu‘ua to‘atasi a‘u, auā ‘ou te faia pea mea e fiafia ai o ia.”

³⁰ E to‘atele nisi na fa‘alogo i nei mea ‘iā Iesu, ‘ona fa‘atuatua ai lea o i latou ‘iā te ia.

O Tagata Sa‘oloto ma Tagata Pologa

³¹ ‘Ua fetalai atu Iesu i tagata Iutaia, o ē na fa‘atuatua ‘iā te ia, “ ‘Āfai tou te usiusita‘i i a‘u a‘oa‘oga, o o‘u so‘o moni ‘outou;

³² o le a ‘outou iloa le ‘upu moni, o le a fa‘asa‘olotoina fo‘i ‘outou e le ‘upu moni.”

³³ ‘Ua tali mai i latou, “O fānau a Aperaamo i matou, ma e lē mafai ‘ona ‘avea i matou ma pologa a so o se isi. O le ā le uiga o le ‘upu ‘ua e fai mai ai, ‘O le a fa‘asa‘olotoina ‘outou’?”

³⁴ ‘Ua fetalai atu Iesu ‘iā te i latou, “ ‘Ou te fa‘aali atu ‘iā te ‘outou le ‘upu moni, so o se isi e agasala, o le pologa ia a le agasala.

³⁵ O le pologa e lē tumau pea o ia i le ‘āiga; a o le atali‘i e i ai pea o ia i le ‘āiga e fa‘avavau.

³⁶ ‘Āfai e fa‘asa‘olotoina ‘outou e le Atali‘i, ‘ona ‘outou sa‘oloto moni ai lea.

³⁷ ‘Ua ‘ou iloa o ‘outou o fānau a Aperaamo. ‘Ae peita‘i ‘ua ‘outou taumafai e fasioti ‘iā te a‘u, auā ‘ua ‘outou lē talia la‘u a‘oa‘oga.

³⁸ ‘Ou te tautala i mea ‘ua fa‘aali mai e lo‘u Tamā ‘iā te a‘u, a ‘ua ‘outou faia mea na fai atu ai lo ‘outou tamā ‘iā te ‘outou.”

³⁹ ‘Ua tali mai i latou ‘iā te ia, “O Aperaamo lo matou tamā.” ‘Ua tali atu Iesu, “ ‘Ana ni fānau moni ‘outou a Aperaamo, tou te faia galuega na faia e ia.

⁴⁰ ‘Ae peita‘i o mea ‘ou te faia, o le fa‘aali atu lea ‘iā te ‘outou o le ‘upu moni na ‘ou fa‘alogo ai mai le Atua. Peita‘i ‘ua ‘outou taumafai lava e fasioti ‘iā te a‘u. E le‘i faia e Aperaamo se mea fa‘apenā.

⁴¹ ‘Ua ‘outou faia le mea na faia e lo ‘outou tamā.” ‘Ona fai mai lea o i latou, “E lē o ni fānau fa‘apouliuli i matou. E to‘atasi lo matou Tamā, o le Atua lea.”

⁴² ‘Ua fetalai atu Iesu ‘iā te i latou, “ ‘Āfai o lo ‘outou Tamā moni le Atua, tou te alolofa mai ‘iā te a‘u; auā na ‘ou sau mai le Atua; ‘ou te le‘i sau i la‘u lava pule, a o ia na ‘auina mai a‘u.

⁴³ Aiseā na ‘outou lē lagona ai la‘u a‘oa‘oga? Auā na ‘outou lē fa‘alogo i a‘u a‘oa‘oga.

⁴⁴ O ‘outou o le fānau a le tiapolo, ‘ua ‘outou manana‘o e mulimuli i mea ‘ua mana‘o ai lo ‘outou tamā. O ia o le fasioti tagata talu mai le amataga. E le‘i i ai lava o ia i le itū o le ‘upu moni, auā e lē o ‘iā te ia le ‘upu moni. ‘Āfai e tautala o ia i le pepelo, ‘ua faia lava e ia le mea ‘ua masani ai o ia, auā o ia o le pepelo, o le tamā fo‘i o pepelo uma lava.

⁴⁵ ‘Ua ‘ou fa‘aali atu le ‘upu moni, o le mea lea ‘ua ‘outou lē fa‘atuatua mai ai ‘iā te a‘u.

⁴⁶ O ai se isi o ‘outou e mafai ‘ona fa‘amaonia ‘ua ‘ou agasala? ‘Āfai ‘ua ‘ou fa‘aali atu ‘iā te ‘outou le ‘upu moni, aiseā ‘ua ‘outou lē talitonu mai ai ‘iā te a‘u?

⁴⁷ O lē e maliu mai i le Atua, e fa‘alogo o ia i le afioga a le Atua. O ‘outou, e lē mai le Atua ‘outou, o le mea lea tou te lē fa‘alogo ai.”

O Iesu ma Aperaamo

⁴⁸ ‘Ua tali atu tagata Iutaia ‘iā Iesu, “ ‘Ua lē sa‘o ‘ea i matou i lo matou fai atu o oe o le Samaria, ma o lo‘o ‘iā te oe fo‘i le temoni?”

⁴⁹ ‘Ua tali atu Iesu, “E lē o ‘iā te a‘u se temoni. ‘Ou te āva lava i lo‘u Tamā, a ‘ua ‘outou lē āva ‘iā te a‘u.

⁵⁰ ‘Ou te lē sā‘ilia se mamalu mo a‘u lava. E to‘atasi lē o lo‘o ‘ona sā‘ilia, o ia lea o lē e fa‘amasino.

⁵¹ O le ‘upu moni lava ‘ou te ta‘u atu ‘iā te ‘outou, o le tagata na te tausia lau ‘upu e lē oti o ia.”

⁵² ‘Ua fai mai tagata Iutaia ‘iā te ia, “ ‘Ua matou iloa lelei lava ‘ua ‘iā te oe le temoni. Na oti Aperaamo, na oti fo‘i perofeta, a ‘ua e fai mai, ‘So o se isi e usita‘i i lau ‘upu e lē oti o ia.’

⁵³ E sili ‘ea oe i lo matou tamā o Aperaamo lē ‘ua oti? O perofeta fo‘i ‘ua oti i latou! O le ā ‘ea lou manatu, o ai oe?”

⁵⁴ ‘Ua tali atu Iesu, “ ‘Āfai ‘ou te sā‘ilia lo‘u lava mamalu, e leai se aogā o lo‘u mamalu. O lē e fa‘amamaluina a‘u o lo‘u Tamā lea, o lē ‘ua ‘outou fai mai ai, o lo ‘outou Atua.

⁵⁵ ‘Ua ‘outou lē iloa o ia, a ‘ua ‘ou iloa o ia. ‘Āfai na ‘ou fai atu ‘ou te lē iloa o ia, ‘ua ‘avea a‘u ma pepelo e pei o ‘outou. ‘Ae peita‘i ‘ua ‘ou iloa o ia, ma usita‘i i lana afioga.

⁵⁶ Na ‘oli‘oli lo ‘outou tamā o Aperaamo, auā na va‘ai o ia i lo‘u aso; na va‘ai fo‘i i ai ma fiafia ai.”

⁵⁷ ‘Ua fai ane tagata Iutaia ‘iā te ia, “E le‘i ‘atoa le limasefulu o ou tausaga, na e va‘ai ‘ea ‘iā Aperaamo?”

⁵⁸ ‘Ua tali atu Iesu, “O le ‘upu moni lava ‘ou te ta‘u atu ‘iā te ‘outou, na ‘ou i ai a o le‘i i ai Aperaamo.”

⁵⁹ ‘Ona fetāgofi lea o i latou i ma‘a o le a fetogi ‘iā te ia; a ‘ua lafi Iesu ma maliu ‘ese loa ma le malumalu.