Ioane 7 - Samoan Contemporary New Testament

O Iesu ma Ona uso

¹ Mulimuli ane, ‘ona maliu atu ai lea o Iesu i Kalilaia; e le‘i finagalo o ia e maliu atu i Iutaia, auā sa manana‘o tagata Iutaia e fasioti ‘iā te ia.

² ‘Ua latalata le Tausamiga o Fale Apitaga a Iutaia.

³ ‘Ona fai atu lea o uso o Iesu ‘iā te ia, “Tu‘u ia le mea nei ‘ae maliu atu i Iutaia, ‘ina ‘ia va‘ai ou so‘o i galuega o lo‘o e faia.

⁴ E leai se isi na te faia fa‘alilolilo se mea pe ‘āfai e mana‘o o ia ‘ina ‘ia lauiloa. Talu ai ‘ona ‘ua e faia nei mea, e ao ‘ona fa‘aalia oe e oe lava i le lalolagi ‘atoa.”

⁵ E o‘o fo‘i i ona uso e le‘i talitonu ‘iā te ia.

⁶ ‘Ua fetalai atu Iesu ‘iā te i latou, “E le‘i o‘o i lo‘u taimi, ‘ae peita‘i o taimi uma lava ‘ua saunia lea mo ‘outou.

⁷ E lē ‘ino‘ino le lalolagi ‘iā te ‘outou, ‘ae ‘ino‘ino ‘iā te a‘u; auā ‘ou te molimau atu i le leaga o a latou amio.

⁸ ‘Ia ‘outou o i le tausamiga. ‘Ou te lē alu i le tausamiga, auā e le‘i o‘o mai lo‘u taimi.”

⁹ ‘Ua fetalai atu e ia lenā ‘upu, ‘ona nofo ai pea lea o ia i Kalilaia.

O Iesu i le Tausamiga o Fale Apitaga

¹⁰ ‘Ua ō atu uso o Iesu i le tausamiga, ‘ona maliu fa‘alilolilo atu ai lea o ia a ‘ua lē fa‘ailoa i tagata.

¹¹ Na sā‘ili tagata Iutaia ‘iā te ia i le tausamiga. Sa fesili ane i latou, “O fea o i ai o ia?”

¹² Sa tele le femusua‘i o tagata e uiga ‘iā te ia. ‘Ua fai mai nisi, “O le tagata lelei o ia,” a o isi ‘ua fai mai, “E leai, ‘ua fa‘avalea e ia tagata.”

¹³ Peita‘i e leai se isi na tautala fa‘aaliali e uiga ‘iā te ia, auā na fefefe i latou i tagata Iutaia.

¹⁴ ‘Ona maliu atu lea o Iesu i le malumalu, ma a‘oa‘o ai i le taulotoa‘iga o le tausamiga.

¹⁵ Sa matuā ofo tagata Iutaia ma fai ane, “Na fa‘apefea ‘ona iloa e ia nei mea e tele ‘ae le‘i a‘oga o ia?”

¹⁶ ‘Ua tali atu Iesu, “O le mea ‘ua ‘ou a‘oa‘o atu e lē o sa‘u a‘oa‘oga, a o le a‘oa‘oga mai le Atua, lē na ‘auina mai a‘u.

¹⁷ So o se isi ‘ua loto e fai lona finagalo, o le a iloa e ia pe mai le Atua la‘u a‘oa‘oga, po ‘ua ‘ou a‘oa‘o atu i la‘u lava pule.

¹⁸ O lē e tautala e tusa ma lana lava pule, ‘ua sā‘ilia e ia lona lava vi‘iga. O lē e mana‘o ia vi‘ia lē na ‘auina mai o ia, o le tagata fa‘amaoni o ia, e leai fo‘i se pepelo ‘iā te ia.

¹⁹ E le‘i avatua ‘ea e Mose le tulafono ‘iā te ‘outou? ‘Ae peita‘i e leai se isi o ‘outou na usita‘i i le tulafono. ‘Ua ‘outou taumafai aiseā e fasioti ‘iā te a‘u?”

²⁰ ‘Ua tali mai i latou, “ ‘Ua ‘iā te oe le temoni. O ai o taumafai e fasioti oe?”

²¹ ‘Ua tali atu Iesu, “E i ai le galuega e tasi na ‘ou faia, na ‘outou ofo uma ai.

²² Auā na fa‘atonuina ‘outou e Mose ia peritomeina ‘outou, peita‘i e lē o Mose a o ‘outou tamā na amataina, ma ‘ua ‘outou peritomeina le tagata i le Sapati.

²³ ‘Āfai e peritomeina le tagata i le Sapati ‘ina ‘ia lē solia ai le tulafono a Mose, aiseā ‘ua ‘outou lē malilie ai ‘iā te a‘u ‘ina ‘ua ‘ou fa‘amālōlōina le tagata i le Sapati?

²⁴ ‘Aua le fa‘amasino atu e tusa ma foliga va‘aia, a ‘ia fa‘amasino i le fa‘amasinoga tonu.”

O le Keriso ‘ea o ‘Ia?

²⁵ ‘Ua fai mai nisi tagata Ierusalema, “E lē o ia ‘ea lenei o lo‘o sā‘ili i latou e fasioti?

²⁶ O lo‘o tautala o ia i tagata uma, ‘ae leai se isi e tete‘e atu ‘iā te ia. Po ‘ua iloa moni ‘ea e ta‘ita‘i o ia o le Keriso?

²⁷ ‘Ae peita‘i, o le tagata lenei ‘ua tatou iloa le mea e sau ai; ‘ae a maliu mai le Keriso, e leai se isi na te iloa le mea e maliu mai ai o ia.”

²⁸ A o a‘oa‘o atu Iesu i le malumalu, sa fetalai atu o ia ma le leo tele, “Po ‘ua ‘outou iloa le mea ‘ou te sau ai? Peita‘i ‘ou te le‘i sau i la‘u lava pule; a o lē na ‘auina mai a‘u e fa‘amaoni o ia, tou te lē iloa o ia.

²⁹ ‘Ua ‘ou iloa o ia, auā na ‘ou sau mai ‘iā te ia, na ‘auina mai fo‘i a‘u e ia.”

³⁰ ‘Ona taumafai lea o i latou e pu‘e ‘iā te ia, ‘ae le‘i o‘o atu se lima o se isi ‘iā te ia, auā e le‘i o‘o i lona taimi.

³¹ ‘Ae peita‘i e to‘atele isi tagata na fai ane, “ ‘Āfai e afio mai le Keriso, e lē faia ‘ea e ia galuega mamana e sili atu nai lo mea na faia e lenei tagata?”

‘Ua ‘Auina mai Fitafita e Pu‘e ‘iā Iesu

³² Sa fa‘alogo faresaio i le femusua‘i a tagata e to‘atele i nei mea e uiga ‘iā te ia, ‘ona ‘auina lea e i latou nisi o leoleo fa‘atasi ma ositaulaga sili e pu‘e ‘iā te ia.

³³ ‘Ua fetalai atu Iesu, “E lē umi se taimi o le a tatou fa‘atasi ai, ‘ona ‘ou alu atu ai lea i lē na ‘auina mai a‘u.

³⁴ O le a ‘outou sā‘ili ‘iā te a‘u, ‘ae tou te lē maua a‘u; auā tou te lē mafai ‘ona ō atu i le mea ‘ou te i ai.”

³⁵ ‘Ona fetautalatala‘i lea o tagata Iutaia ma fai ane, “Po o fea e alu i ai o ia e lē mafai ai ‘ona tatou maua o ia? Pe lē alu atu ‘ea o ia i tagata Iutaia o lo‘o i ‘a‘ai o Eleni ma a‘oa‘o ai?

³⁶ O le ā le uiga o lenā ‘upu, ‘O le a ‘outou sā‘ili ‘iā te a‘u ‘ae tou te lē maua a‘u,’ i le ma lea, ‘E lē mafai ‘ona ‘outou o i le mea ‘ou te alu i ai’?”

O le Folafolaina o le Vai Ola

³⁷ O le aso mulimuli o le tausamiga, o le aso lea e sili ‘ona tau‘a. Na tu Iesu ma fetalai leotele atu i lenā aso, “So o se isi e fia inu, sau ‘iā te a‘u e inu ai.

³⁸ E pei ‘ona fai mai o le Tusi, ‘O lē e fa‘atuatua mai ‘iā te a‘u, e tafe mai le vai ola mai totonu ‘iā te ia.’ ”

³⁹ Sa fai atu e Iesu lenā ‘upu e uiga i le Agaga o le a maua e i latou o ē e fa‘atuatua ‘iā te ia. E le‘i foa‘iina mai le Agaga i lenā taimi, auā e le‘i toe fa‘atūina Iesu i le mamalu.

‘Ua Fevaevaea‘i Tagata

⁴⁰ ‘Ua fa‘alogo tagata e uiga i nisi o nei fetalaiga, ‘ona fa‘apea ane lea o i latou, “O le perofeta moni le tagata lenei.”

⁴¹ ‘Ua fai ane nisi, “O ia o le Keriso.” A ‘ua fai ane isi, “E afio mai ‘ea le Keriso mai Kalilaia?

⁴² ‘Ua fai mai le Tusi, o le Keriso e tupu mai ‘iā Tavita, o lē e fānau mai i Peteleema, le ‘a‘ai sa mau ai Tavita.”

⁴³ Sa fevaevaea‘i loa tagata ‘ona o ia.

⁴⁴ Sa manana‘o nisi e pu‘e ‘iā te ia, ‘ae leai se isi na tago atu ‘iā te ia.

O le lē Talitonu o Ta‘ita‘i Iutaia

⁴⁵ ‘Ua toe fo‘i atu leoleo i faresaio ma ositaulaga sili, ‘ona fesili mai lea o i latou i leoleo, “O le ā le mea ‘ua ‘outou le aumai ai o ia?”

⁴⁶ ‘Ona tali atu lea o i latou, “E leai se tagata e tautala e pei o lenei tagata.”

⁴⁷ ‘Ua fesili atu faresaio ‘iā te i latou, “Po ‘ua fa‘avalea fo‘i ‘outou e ia?

⁴⁸ Po ‘ua ‘outou iloa ‘ea se isi o tatou ta‘ita‘i, po o se isi o faresaio ‘ua talitonu ‘iā te ia?

⁴⁹ Sa le‘i iloa e tagata le tulafono a Mose, o le mea lea ‘ua fa‘amalaiaina ai i latou.”

⁵⁰ ‘Ua fai atu ‘iā te i latou Nikotemo, lē na alu ‘iā Iesu, o ia fo‘i o se tasi o i latou,

⁵¹ “O la tatou tulafono e lē fa‘asalaina se tagata a o le‘i mua‘i fa‘alogo atu ‘iā te ia, ma su‘esu‘e lava le mea na faia e ia.”

⁵² ‘Ona latou fai mai ai lea, “O se Kalilaia fo‘i oe? ‘Ia su‘esu‘e i le Tusi ‘ona e iloa ai lea, e leai se perofeta e tu mai i Kalilaia.”

⁵³ ‘Ona ta‘itasi lea o i latou ma alu i lona ‘āiga.