Ioane 6 - Samoan Contemporary New Testament

‘Ua Fafagaina e Iesu le To‘alima Afe

¹ Mulimuli ane, ‘ona toe fo‘i atu ai lea o Iesu i le Vaituloto o Kalilaia, o le Vaituloto lava lea o Tiperia.

² Sa mulimuli atu ‘iā te ia tagata e to‘atele, auā na va‘ai i latou i ana galuega mamana i le fa‘amālōlōina o ma‘i.

³ ‘Ona maliu a‘e ai lea o Iesu i le mea maupu‘epu‘e, ma nonofo ai ma ona so‘o.

⁴ ‘Ua latalata i le Tausamiga o le Paseka a Iutaia.

⁵ Sa silasila solo Iesu, ma na va‘aia ai le to‘atele o tagata o lo‘o ō mai ‘iā te ia; o lea na fetalai atu ai o ia ‘iā Filipo, “O fea e mafai ‘ona tatou fa‘atauina mai ai ni mea‘ai e fafaga ai nei tagata?”

⁶ Na fai atu e ia lea ‘upu e tofotofo ai ia Filipo; sa mautinoa lelei lava e ia le mea o le a na faia.

⁷ ‘Ua tali atu Filipo, “E lē lava le lua selau tenari e fa‘atau ai ni areto, ‘ina ‘ia tofu ai nei tagata ma sina mea itiiti.”

⁸ ‘Ona fai ane lea o le isi o ona so‘o, o Anetere‘a lea, o le uso o Simona Peteru,

⁹ “O lo‘o ‘i‘inei le tamaitiiti e i ai ana areto e lima ma i‘a e lua. A o le ā le aogā mo nei tagata e to‘atele?”

¹⁰ ‘Ua fetalai atu Iesu ‘iā te i latou, “Fa‘anonofo i lalo tagata.” E tele fo‘i le mutia i lea mea. O lea sa nonofo i latou i lalo; pe tusa o le lima afe tane.

¹¹ ‘Ona tago ai lea o Iesu i le areto, ‘ua fa‘afetai i le Atua, ‘ona tufatufaina atu lea mo tagata uma na nonofo i lalo. ‘Ua fa‘apea fo‘i ‘ona faia e ia i i‘a; na ‘a‘ai i latou ma ‘ua mā‘o‘ona.

¹² ‘Ina ‘ua mā‘o‘ona i latou uma, sa fetalai atu loa Iesu i ona so‘o, “Fa‘apotopoto lelei mea‘ai ‘ua totoe; ‘aua ne‘i o tatou fa‘amāumāuina se mea.”

¹³ ‘Ona fa‘apotopoto ai lea e i latou mea uma na totoe a ē na ‘a‘ai, ma fa‘atūtūmu ai ‘ato e sefulu ma le lua.

¹⁴ ‘Ua va‘aia e i latou sa i ai lenei galuega ofoofogia a Iesu, ‘ona fai ane lea, “E moni lava, o le perofeta lenei ‘ua afio mai i le lalolagi!”

¹⁵ ‘Ua silafia e Iesu o le a ō mai i latou e pu‘e ma ‘avea fa‘amalosi o ia ma tupu; ‘ona toe maliu ‘ese loa lea na o ia i le mea maupu‘epu‘e.

‘Ua Savali Iesu i Luga o le Vai

¹⁶ ‘Ua o‘o i le afiafi, ‘ona ō ane ai lea o ona so‘o i le vaituloto,

¹⁷ ‘ua ō atu i le va‘a ma toe fo‘i atu i Kapanaumi. ‘Ua po, ‘ae le‘i maliu mai lava Iesu ‘iā te i latou.

¹⁸ Na agi mai le matagi malosi, ma ‘ua sousou ai le vai.

¹⁹ Sa taualo e so‘o le va‘a pe tusa o le tolu po o le fa maila, ‘ae va‘aia loa e i latou Iesu o savali i luga o le vai, ma o lo‘o aga‘i mai i le va‘a; ‘ona matata‘u ai lea o i latou.

²⁰ ‘Ua fetalai atu Iesu ‘iā te i latou, “ ‘Aua tou te matata‘u, o a‘u lava!”

²¹ Na manana‘o i latou e ‘ave o ia i le va‘a, ‘ona fa‘afuase‘i ai lea ‘ona o‘o atu o le va‘a i le lau‘ele‘ele o le nu‘u na aga‘i atu i ai i latou.

‘Ua Sā‘ili Tagata ‘iā Iesu

²² O le aso na soso‘o ai, na va‘aia ai e tagata o ē na nonofo i le isi itū o le vaituloto le va‘a e tasi o lo‘o i ai i inā. Na iloa fo‘i e i latou e le‘i maliu atu Iesu fa‘atasi ma ona so‘o, na o i latou lava na malaga atu.

²³ E tele fo‘i nisi va‘a mai Tiperia, na ō mai i le matāfaga e latalata i le mea na ‘a‘ai ai tagata e to‘atele i areto, ‘ina ‘ua uma ‘ona faia e le Ali‘i le fa‘afetai.

²⁴ ‘Ina ‘ua va‘aia e tagata ‘ua lē o i ai Iesu ma ona so‘o i lea mea, ‘ona ō a‘e ai lea o i latou i va‘a, ma ō atu i Kapanaumi e sā‘ili ‘iā te ia.

O Iesu o le Areto o le Ola

²⁵ ‘Ua maua Iesu e tagata i le isi itū o le vaituloto, ‘ona fai atu lea o i latou ‘iā te ia, “Le A‘oa‘o e, o anafea na e maliu mai ai ‘i‘inei?”

²⁶ ‘Ua tali atu Iesu, “O le ‘upu moni lava ‘ou te ta‘u atu ‘iā te ‘outou, ‘ua ‘outou sā‘ili ‘iā te a‘u, auā na ‘outou ‘a‘ai i le areto ma ‘outou mā‘o‘ona ai, ‘ae lē ‘ona ‘ua ‘outou va‘ai i a‘u galuega mamana.

²⁷ ‘Aua tou te galulue mo mea‘ai e pala; a ‘ia ‘outou galulue mo mea‘ai e tumau mo le ola e fa‘avavau. O le a foa‘iina atu e le Atali‘i o le Tagata lenā mea‘ai ‘iā te ‘outou, auā ‘ua tu‘uina e le Atua le Tamā lana fa‘ailoga e fa‘amaonia ai o ia.”

²⁸ ‘Ona fesili mai lea o i latou ‘iā te ia, “Se ā se mea matou te faia, ‘ina ‘ia matou faia ai le galuega a le Atua?”

²⁹ ‘Ua tali atu Iesu, “O le galuega lenei ‘ua finagalo ai le Atua ‘ia ‘outou faia: ‘ia fa‘atuatua i lē na ‘auina mai e ia.”

³⁰ ‘Ona tali mai lea o i latou, “Se ā se fa‘ailoga mamana ‘e te faia, ‘ina ‘ia matou va‘ai i ai ma fa‘atuatua ai ‘iā te oe? Se ā se mea ‘e te faia?

³¹ Na ‘a‘ai e o matou tamā le manai i le vao e pei ‘ona tusia: ‘Na avatu e ia ‘iā te i latou le areto mai le lagi latou te ‘a‘ai ai.’ ”

³² ‘Ua fetalai atu Iesu, “O le ‘upu moni lava ‘ou te ta‘u atu ‘iā te ‘outou, e le‘i avatua e Mose ‘iā te ‘outou le areto mai le lagi, peita‘i o lo‘u Tamā ‘ua foa‘iina atu ‘iā te ‘outou le areto moni mai le lagi.

³³ Auā o le areto na avatu e le Atua, o ia lava lenā na afio ifo mai le lagi, ma avatu le ola i le lalolagi.”

³⁴ ‘Ona fai mai lea o i latou ‘iā te ia, “Le Ali‘i e, aumai ia ‘iā te i matou lenā areto e lē aunoa,”

³⁵ ‘Ua fetalai atu Iesu ‘iā te i latou, “O a‘u o le areto o le ola. O lē e mulimuli mai ‘iā te a‘u e lē toe fia ‘ai; o lē fo‘i e fa‘atuatua ‘iā te a‘u, e lē toe fia inu.

³⁶ “O lenei, sa ‘ou fai atu ‘iā te ‘outou, na ‘outou va‘ai ‘iā te a‘u ‘ae tou te le‘i fa‘atuatua mai.

³⁷ O i latou uma lava na tu‘uina mai ‘iā te a‘u e lo‘u Tamā, o le a ō mai i latou ‘iā te a‘u. ‘Ou te lē te‘ena se isi e sau ‘iā te a‘u,

³⁸ auā na ‘ou alu ifo mai le lagi e fai le finagalo o lē na ‘auina mai a‘u, ‘ae lē o lo‘u lava loto.

³⁹ O le mea lenei na finagalo i ai lē na ‘auina mai a‘u ‘ou te faia; ‘ina ‘ia lē maumau se tasi o ē na tu‘uina mai e ia ‘iā te a‘u; a ‘ia ‘ou toe fa‘atutūina, i latou i le ola i le aso gata‘aga.

⁴⁰ Auā o le mea lenei ‘ua finagalo i ai lo‘u Tamā, ia maua le ola e fa‘avavau e i latou uma o ē e va‘ai, ma fa‘atuatua i le Atali‘i; ‘ou te toe fa‘atutūina fo‘i i latou i le aso gata‘aga.”

⁴¹ Sa muimui ‘iā te ia tagata Iutaia, auā na fetalai atu o ia, “O a‘u o le areto na alu ifo mai le lagi.”

⁴² O lea sa fai ane i latou, “E lē o Iesu ‘ea lenei, o le atali‘i o Iosefa? ‘Ua tatou iloa lona tamā ma lona tinā. O lenei fo‘i, pe fa‘apefea ‘ona fai mai o ia, na afio mai le lagi?”

⁴³ ‘Ua tali atu Iesu, “Soia le taumuimui.

⁴⁴ E lē mafai ‘ona sau se isi ‘iā te a‘u, vaganā ‘ua tosina mai o ia e le Tamā o lē na ‘auina mai a‘u; ‘ou te toe fa‘atūina o ia i le aso gata‘aga.

⁴⁵ Na tusia e perofeta, ‘O le a a‘oa‘oina tagata uma lava e le Atua.’ So o se isi e fa‘alogo i le Tamā ma ana a‘oa‘oga, e sau o ia ‘iā te a‘u.

⁴⁶ E lē fa‘apea e so o se isi lava e va‘ai i le Tamā; a o lē e mai le Atua, o ia lea ‘ua va‘ai i le Tamā.

⁴⁷ “O le ‘upu moni lava ‘ou te ta‘u atu ‘iā te ‘outou, o lē e fa‘atuatua, ‘ua ‘iā te ia le ola e fa‘avavau.

⁴⁸ O a‘u o le areto o le ola.

⁴⁹ Na ‘a‘ai e o ‘outou tamā le manai i le vao, a ‘ua oti i latou.

⁵⁰ A o le areto na alu ifo mai le lagi, so o se isi e ‘ai ai, e lē oti o ia.

⁵¹ O a‘u o le areto ola na alu ifo mai le lagi. So o se isi e ‘ai i lenei areto, e ola e fa‘avavau. O le areto ‘ou te tu‘uina atu ‘iā te ia o lo‘u tino lea, ‘ou te tu‘uina atu ‘ina ‘ia ola ai le lalolagi.”

⁵² ‘Ona amata lea ‘ona fefinaua‘i o Iutaia lava latou ma fai ane, “E mafai fa‘apefea e lenei tagata ‘ona tu‘uina mai o lona tino tatou te ‘a‘ai ai?”

⁵³ ‘Ua fetalai atu Iesu ‘iā te i latou, “O le ‘upu moni lava ‘ou te ta‘u atu ‘iā te ‘outou: ‘Āfai tou te lē ‘a‘ai i le tino o le Atali‘i o le Tagata, ma feinu i lona toto, ‘ua lē i totonu ‘iā te ‘outou le ola.

⁵⁴ O lē e ‘ai i lo‘u tino, ma inu i lo‘u toto, ‘ua ‘iā te ia le ola e fa‘avavau, ‘ou te toe fa‘atūina fo‘i o ia i le aso gata‘aga.

⁵⁵ Auā o lo‘u tino o le mea‘ai moni lea, o lo‘u toto fo‘i o le mea inu moni lea.

⁵⁶ O lē e ‘ai i lo‘u tino, ma inu i lo‘u toto, e ola o ia ‘iā te a‘u, o a‘u fo‘i ‘ou te ola ‘iā te ia.

⁵⁷ Na ‘auina mai a‘u e le Tamā o lē o lo‘o soifua, o le mea lea, ‘ou te ola ai fo‘i a‘u. E fa‘apea fo‘i lē e ‘ai ‘iā te a‘u, e ola o ia ‘ona o a‘u.

⁵⁸ O le areto lenei na alu ifo mai le lagi: e lē pei o le manai na ‘a‘ai e o ‘outou tamā, ma feoti i latou. O lē e ‘ai i lenei areto, e ola o ia e fa‘avavau.”

⁵⁹ Na fetalai atu e Iesu lenei ‘upu a o a‘oa‘o o ia i le sunako i Kapanaumi.

O ‘Upu o le Ola e Fa‘avavau

⁶⁰ E to‘atele nisi o ona so‘o na fa‘alogo i lenei ‘upu, ma fai ane, “E matuā faigatā lenei a‘oa‘oga. O ai e mafai ‘ona fa‘alogo i ai?”

⁶¹ Sa silafia lelei e Iesu ‘ua lē mālilie ona so‘o i lenei mea, ‘ona fetalai atu lea o ia, “Po ‘ua ‘avea ‘ea lenei mea ma mea tou te fa‘avaivai ai?

⁶² Pe fa‘apefea nei la pe a ‘outou va‘ai i le Atali‘i o le Tagata, ‘ua toe afio a‘e i le mea na i ai muamua o ia?

⁶³ O le Agaga e tupu ai le ola; o le tino e leai sona aogā. O ‘upu ‘ou te tautala atu ai ‘iā te ‘outou o le Agaga ia, ma le ola.

⁶⁴ ‘Ae lē o fa‘atuatua nisi o ‘outou.” Auā na silafia lelei e Iesu mai le amataga i latou o ē e lē fa‘atuatua, ma lē o le a fa‘alata ‘iā te ia.

⁶⁵ ‘Ona toe fetalai atu lea o ia, “O le pogai tonu lea na ‘ou fai atu ai ‘iā te ‘outou, e lē mafai e se isi ‘ona sau ‘iā te a‘u, vaganā ‘ua ta‘ita‘iina mai o ia e le Tamā.”

⁶⁶ Talu ai lenei mea, na ō ‘ese nisi o ona so‘o ma ‘ua lē toe fa‘atasi ma ia.

⁶⁷ ‘Ona fetalai atu lea o Iesu i ona so‘o e to‘asefulu ma le lua, “Pe fa‘apefea ‘outou, po ‘ua ‘outou fia ō ‘ese fo‘i?”

⁶⁸ ‘Ona tali mai lea o Simona Peteru, “Le Ali‘i e, a matou o ‘iā te ai? O lo‘o ‘iā te oe ‘upu o le ola e fa‘avavau.

⁶⁹ ‘Ua matou talitonu ma iloa nei o oe o lē e Pa‘ia mai le Atua.”

⁷⁰ ‘Ua tali atu Iesu ‘iā te i latou, “Pe na ‘ou lē filifilia ‘ea le to‘asefulu ma le lua o ‘outou? ‘Ae peita‘i o le tasi o ‘outou o le tiapolo ia!”

⁷¹ Sa fetalai o ia e uiga ‘iā Iuta le atali‘i o Simona le Sekara, o ia lea o le tasi o le to‘asefulu ma le lua na fa‘alataina o ia.