Ioane 21 - Samoan Contemporary New Testament

‘Ua Fa‘aali Iesu i So‘o e To‘afitu

¹ ‘Ua mavae ia mea, ‘ona toe fa‘aali lea o Iesu lava ia i so‘o i le Vaituloto o Tiperia; ‘ua fa‘apea ‘ona fa‘aali o ia.

² Sa i ai fa‘atasi Simona Peteru ma Toma ‘ua ta‘ua o le Masaga, ma Natanielu o le Kana i Kalilaia, ma atali‘i o Sepetaio, ma isi ona so‘o e to‘alua.

³ ‘Ua fai atu Simona Peteru ‘iā te i latou, “O le a ‘ou alu ‘ou te fagota.” ‘Ua fai ane i latou ‘iā te ia, “Matou te ō atu fo‘i fa‘atasi ma oe.” ‘Ona ō atu loa lea o i latou i lo latou va‘a, ‘ua ‘atoa le po ‘ae le‘i maua se i‘a e tasi.

⁴ ‘Ua o‘o i le taeao, ‘ua tu Iesu i le matāfaga, ‘ae le‘i iloa e so‘o o Iesu.

⁵ ‘Ona fetalai atu lea o Iesu ‘iā te i latou, “Le fānau e, ‘ua maua ‘ea ni a ‘outou i‘a?” ‘Ua tali mai i latou ‘iā te ia, “E leai.”

⁶ ‘Ona fetalai atu lea o ia ‘iā te i latou, “Lafo le ‘upega i le itū taumatau o le va‘a, ‘ona ‘outou maua ai lea.” ‘Ona lafo lea e i latou o le ‘upega, ma ‘ua lē toe mafai e i latou ‘ona toso a‘e, auā ‘ua tele naunau i‘a.

⁷ ‘Ua fai ane le so‘o ‘ua alofaina e Iesu ‘iā Peteru, “O le Ali‘i lenei.” ‘Ua fa‘alogo Simona o le Ali‘i ia, ‘ona ‘ofu lea e ia lona ‘ofu (auā sa tu‘u ‘ese ona ‘ofu) ‘ua oso i le vai.

⁸ ‘Ua ō ane isi so‘o i o latou va‘a, auā e le‘i mamao i latou ma le lau‘ele‘ele, pe tusa o le selau iata mai le lau‘ele‘ele, ‘ua toso le ‘upega ‘ua tumu i i‘a.

⁹ ‘Ua tu lau‘ele‘ele i latou, sa va‘aia loa e i latou le afi malala, ‘ua i ai i ona luga le i‘a ma le areto.

¹⁰ ‘Ona fetalai atu lea o Iesu ‘iā te i latou, “Aumai ni nai i‘a ‘ua ‘outou maua.”

¹¹ ‘Ona alu ane lea o Simona Peteru ma toso mai le ‘upega i le matāfaga, ‘ua tumu i i‘a tetele, e selau limasefulu ma le tolu le aofa‘i; e ui lava ‘ina tele i‘a, e le‘i māsae ai lava le ‘upega.

¹² ‘Ua fetalai atu Iesu ‘iā te i latou, “O mai ia inā ‘a‘ai.” E le‘i fesili atu lava se isi o so‘o ‘iā te ia, “O ai ‘ea oe?” auā ‘ua iloa e i latou o le Ali‘i o ia.

¹³ ‘Ua maliu atu Iesu, ‘ua tago i le areto, ma ‘ua tu‘uina atu ‘iā te i latou, ‘ua fa‘apea fo‘i ‘ona faia e ia i i‘a.

¹⁴ O lona fa‘atolu lea ‘ona fa‘aali Iesu i ona so‘o, talu ‘ona toetū mai o ia nai ē ‘ua oti.

O Iesu ma Peteru

¹⁵ ‘Ua uma ‘ona ‘a‘ai i latou, ‘ona fetalai atu lea o Iesu ia Simona Peteru, “Simona e, le atali‘i o Ioane, pe sili lou alofa mai ‘iā te a‘u i lo latou nei?” ‘Ua fai atu o ia ‘iā te ia, “Ioe, Le Ali‘i e, ‘ua e silafia lava ‘ou te alofa ‘iā te oe.” ‘Ua fetalai atu o ia ‘iā te ia, “ ‘Ia e fafaga i a‘u mamoe.”

¹⁶ ‘Ua toe fetalai fa‘alua atu o ia ‘iā te ia, “Simona e, le atali‘i o Ioane pe ‘e te alofa mai ‘iā te a‘u?” ‘Ua tali atu o ia ‘iā te ia, “Ioe, Le Ali‘i e, ‘ua e silafia ‘ou te alofa lava ‘iā te oe.” ‘Ua fetalai atu Iesu ‘iā te ia, “ ‘Ia e tausi i a‘u mamoe.”

¹⁷ ‘Ua toe fetalai fa‘atolu atu o ia ‘iā te ia, “Simona e, le atali‘i o Ioane, pe ‘e te alofa mai ‘iā te a‘u?” ‘Ua fa‘anoanoa Peteru auā ‘ua fa‘atolu ‘ona fetalai atu o ia ‘iā te ia, “Pe ‘e te alofa mai ‘iā te a‘u?” ‘Ua fai atu Peteru ‘iā te ia, “Le Ali‘i e, ‘ua e silafia mea uma lava; ‘ua e silafia ‘ou te alofa lava ‘iā te oe.” ‘Ua fetalai atu Iesu ‘iā te ia, “ ‘Ia e fafaga i a‘u mamoe.

¹⁸ O le ‘upu moni lava ‘ou te ta‘u atu ‘iā te oe, sa e fusi lou fusipa‘u a o e taule‘ale‘a, ma alu i so o se mea ‘e te loto i ai; peita‘i, a o‘o ‘ina e toeaina, ‘e te fa‘aloloa ou lima, e fusi fo‘i ‘iā te oe e se isi, e ‘ave fo‘i oe i le mea ‘e te lē loto i ai.”

¹⁹ ‘Ua fetalai atu o ia i lea ‘upu e fa‘ailoa atu ai le uiga o le maliu o Peteru, ‘ina ‘ia vi‘ia ai le Atua. ‘Ua uma lea, ‘ona fetalai atu lea o ia, “Mulimuli mai ‘iā te a‘u.”

O Iesu ma le Isi So‘o

²⁰ ‘Ua fāliu Peteru ma ‘ua iloa atu le so‘o na alofaina e Iesu o lo‘o mulimuli mai. O ia lea na fa‘alagolago i lona fatafata a o fai le talisuaga, ‘ua fai atu fo‘i, “Le Ali‘i e, o ai ‘ea lē na te fa‘alataina oe?”

²¹ ‘Ua iloa atu o ia e Peteru, ‘ona fai mai lea o ia ‘iā Iesu, “Le Ali‘i e, a fa‘apefea le tagata lenei?”

²² ‘Ua tali atu Iesu, “ ‘Āfai ‘ou te mana‘o ‘ia tumau pea o ia se‘ia ‘ou sau, po o le ā le uiga o lea mea ‘iā te oe? ‘Ia e mulimuli mai pea oe ‘iā te a‘u.”

²³ ‘Ona salalau atu lea o le tala lenei i le au uso; e lē oti lava lea so‘o; ‘ae le‘i fetalai atu Iesu ‘iā te ia, e lē oti o ia, ‘ae sa fetalai atu, “ ‘Āfai ‘ou te mana‘o ‘ia tumau pea o ia se‘ia ‘ou sau, po o le ā le uiga o lea mea ‘iā te oe?”

²⁴ O le so‘o lenei o lo‘o molimau i nei mea uma, ma tusia fo‘i ia mea; ‘ua matou iloa e moni lana molimau.

O le Fa‘ai‘uga

²⁵ E tele fo‘i nisi mea na faia e Iesu; ‘āfai e tusia ta‘itasi ia mea, o lo‘u manatu e lē mafai ‘ona ofi i le lalolagi ia tusi pe a tusia.