Ioane 2 - Samoan Contemporary New Testament

O le Fa‘aipoipoga i Kana

¹ ‘Ua mavae aso e lua, ‘ona fai ai lea o le fa‘aipoipoga i Kana i Kalilaia. Sa i ai le tinā o Iesu.

² Sa vala‘auina Iesu ma ona so‘o i le fa‘aipoipoga.

³ ‘Ua uma le uaina, ‘ona fai atu lea o le tinā o Iesu ‘iā te ia, “ ‘Ua leai sa latou uaina.”

⁴ ‘Ua tali atu Iesu ‘iā te ia, “Tama‘ita‘i e, o le ā ‘ea le mea ‘ua e fai mai ai ‘iā te a‘u? E le‘i o‘o i lo‘u itūlā.”

⁵ ‘Ona fai atu lea o le tinā o Iesu i ‘au‘auna, “ ‘Ia ‘outou faia so o se mea e fai ane ai o ia ‘iā te ‘outou.”

⁶ Sa i ai fagu vai ‘ele tetele e ono, sa tutū ai i lea mea mo le fa‘amamāina o tagata Iutaia; o le fagu e tasi pe tusa o le luasefulu i le tolusefulu kalone lona tele.

⁷ ‘Ua fetalai atu Iesu i ‘au‘auna, “Fa‘atūtūmu fagu i vai.” ‘Ona fa‘atūtūmuina lea e i latou ‘ua matuā tūtūmu lava.

⁸ ‘Ona fetalai atu lea o ia i ‘au‘auna, “Asu loa le vai ma avatu i lē e pule i le taumafataga.” ‘Ona avatu ai lea e i latou ‘iā te ia.

⁹ ‘Ua tofo e ia le vai ‘ua liu uaina, ‘ae le‘i iloa e ia po‘o fea na maua ai le uaina (a o ‘au‘auna na asuina le vai ‘ua iloa e i latou); sa vala‘au o ia i le fa‘ato‘āfaiavā, ma fai atu ‘iā te ia.

¹⁰ “E muamua ‘ona avane e tagata le uaina lelei, a inu tele i ai tagata vala‘aulia, ‘ona aumai ai lea o le uaina e masani ai; a ‘ua tu‘u e ‘outou le uaina lelei e o‘o mai i lenei taimi!”

¹¹ Na faia e Iesu lenei ulua‘i fa‘ailoga i Kana i Kalilaia; na fa‘aalia ai lona mamalu, ma sa talitonu ai ona so‘o ‘iā te ia.

¹² Mulimuli ane, ‘ua maliu atu Iesu ma lona tinā, ma ona uso, ma ona so‘o i Kapanaumi, ma nonofo ai mo ni nai aso.

‘Ua Maliu atu Iesu i le Malumalu

¹³ ‘Ua latalata i le Paseka a tagata Iutaia, ‘ona maliu atu lea o Iesu i Ierusalema.

¹⁴ Na maua e ia i totonu o le malumalu tagata o ē na fa‘atau atu povi, ma mamoe, ma lupe ‘atoa fo‘i ma ē e sui tupe, o lo‘o nonofo ‘iā latou laulau.

¹⁵ Na faia e ia le sasa i manoa, ma tuli‘esea i latou fa‘atasi ma mamoe ma povi mai le malumalu; na ia fuli fo‘i i lalo laulau a ē e sui tupe, ma fa‘asalalau a latou tupe.

¹⁶ Sa fa‘atonuina fo‘i e ia ē na fa‘atau lupe, “ ‘Ave‘ese ia nei mea ma ‘i‘inei! ‘Aua le faia le fale o lo‘u Tamā ma nofoaga o fefa‘ataua‘iga!”

¹⁷ Na manatua e ona so‘o le mea ‘ua tusia, “O lo‘u naunau tele i lou fale, ‘ua pei o se afi mumū i totonu ‘iā te a‘u.”

¹⁸ Na toe fo‘i ane ‘iā Iesu nisi tagata Iutaia ma la latou fesili, “O le ā se fa‘ailoga e mafai ‘ona e faia, ‘ina ‘ia matou talitonu ai o lo‘o ‘iā te oe le pule e faia ai nei mea?”

¹⁹ ‘Ua tali atu Iesu, “Lepeti lenei malumalu; ‘ona ‘ou toe faia lea i aso e tolu.”

²⁰ ‘Ona fesili mai lea o tagata Iutaia, “E fasefulu ma le ono tausaga na faia ai lenei malumalu; ‘ae fa‘apefea ‘ona e fai mai ‘e te toe faia i aso e tolu?”

²¹ Peita‘i, o le malumalu na fetalai atu ai Iesu, o lona tino lea.

²² ‘Ina ‘ua toe soifua mai Iesu nai ē ‘ua oti, sa manatua loa e ona so‘o le mea na fetalai atu ai Iesu, ‘ona talitonu ai lea o i latou i le Tusi, ma ‘upu na fetalai atu ai o ia.

‘Ua Silafia e Iesu Tagata Uma

²³ A o i ai Iesu i Ierusalema i le Paseka, e to‘atele na talitonu ‘iā te ia, ‘ina ‘ua va‘ai i latou i fa‘ailoga na faia e ia.

²⁴ A o Iesu e le‘i talitonu o ia ‘iā te i latou, auā ‘ua na silafia tagata uma lava.

²⁵ E lē mana‘omia fo‘i se tasi e molimau atu ‘iā te ia e uiga i tagata, auā ‘ua na silafia mea o i loto o tagata.