Ioane 16 - Samoan Contemporary New Testament

¹ “ ‘Ua ‘ou fai atu ‘iā te ‘outou nei mea uma, ‘ina ‘ia lē lūlūina lo ‘outou fa‘atuatua.

² E tulia ‘outou i fafo e i latou i o latou sunako. O le a o‘o mai le itūlā e manatu ai se isi, o le fasiotia o ‘outou, o lona faia lea o le taulaga i le Atua.

³ E faia e i latou ia mea ‘iā te ‘outou, auā e le‘i iloa e i latou le Tamā ‘atoa ma a‘u.

⁴ ‘Ae peita‘i ‘ua ‘ou ta‘u atu nei mea ‘iā te ‘outou, ‘ina ‘ia ‘outou manatua ‘ua uma ‘ona ‘ou ta‘uina atu ‘iā te ‘outou, pe a o‘o i le itūlā e tutupu ai. “ ‘Ou te le‘i ta‘uina atu nei mea ‘iā te ‘outou mai le amataga, auā na ‘ou i ai ‘iā te ‘outou.

O le Galuega a le Agaga Pa‘ia

⁵ ‘Ae ‘ou te alu atu nei i lē na ‘auina mai a‘u; ‘ae le‘i fesili mai lava se isi o ‘outou ‘iā te a‘u, ‘Po o fea ‘e te alu i ai?’

⁶ A ‘ua tūtūmu o ‘outou loto i le fa‘anoanoa, ‘ina ‘ua ‘ou ta‘uina atu nei mea ‘iā te ‘outou.

⁷ ‘Ae ui lava i lea, ‘ou te ta‘utino atu ‘iā te ‘outou le ‘upu moni: e aogā ‘iā te ‘outou lo‘u alu ‘ese; auā ‘āfai ‘ou te lē alu ‘ese, e lē maliu mai le Fesoasoani ‘iā te ‘outou; ‘ae ‘āfai ‘ou te alu, ‘ou te ‘auina mai o ia ‘iā te ‘outou.

⁸ ‘Āfai e maliu mai o ia, na te fa‘ailoa atu i tagata o le lalolagi le agasala, ma le amiotonu, ma le fa‘amasinoga.

⁹ O le agasala, auā e le‘i talitonu i latou ‘iā te a‘u;

¹⁰ o le amiotonu, auā ‘ou te alu atu i le Tamā, ‘ona ‘outou lē toe va‘ai mai ai lea ‘iā te a‘u;

¹¹ o le fa‘amasinoga, auā ‘ua uma ‘ona fa‘amasinoina le ali‘i o lenei lalolagi.

¹² “E tele mea ‘ou te fia ta‘uina atu ‘iā te ‘outou, ‘ae tou te lē mafaia ‘ona talia i aso nei.

¹³ ‘Ae a maliu mai o ia, o le Agaga lea o le ‘upu moni; na te ta‘ita‘iina ‘outou i ‘upu moni uma lava; auā e lē tautala o ia i lana lava pule, a o mea uma e fa‘alogo i ai, e tautala a‘i o ia; ma e fa‘aali atu fo‘i e ia ‘iā te ‘outou mea o le a o‘o mai.

¹⁴ O ia lava e vivi‘i mai ‘iā te a‘u, auā e maua e ia mai ‘iā te a‘u, ma fa‘ailoa atu ai ‘iā te ‘outou.

¹⁵ O mea uma lava o i le Tamā, o a‘u mea ia; o le mea lea na ‘ou fai atu ai e maua e ia mai ‘iā te a‘u, ma fa‘ailoa atu ai ‘iā te ‘outou.

O le Fa‘anoanoa ma le Fiafia

¹⁶ “Toeitiiti ‘ona ‘outou lē toe va‘ai mai lea ‘iā te a‘u; toeitiiti fo‘i ‘ona ‘outou toe va‘ai mai lea ‘iā te a‘u.”

¹⁷ ‘Ona fetautalatala‘i lea o isi o ona so‘o, “O le ā ‘ea le uiga o lenei mea ‘ua fetalai mai ai o ia ‘iā te i tatou, ‘e toeitiiti ‘ona ‘outou lē toe va‘ai mai lea ‘iā te a‘u; e toeitiiti fo‘i ‘ona ‘outou toe va‘ai mai lea ‘iā te a‘u i le ma lea, ‘auā ‘ou te alu atu i le Tamā’?”

¹⁸ ‘Ona fai ane lea o i latou, “O le ā ‘ea le uiga o le mea ‘ua fetalai mai ai o ia, ‘E toeitiiti’? Tatou te lē iloa le mea ‘ua fetalai mai ai o ia.”

¹⁹ ‘Ua silafia e Iesu ‘ua manana‘o i latou e fesili ane ‘iā te ia, o lea na fetalai atu ai o ia ‘iā te i latou, “Pe tou te felafolafoa‘i ‘ea i le mea na ‘ou fai atu ai, ‘E toeitiiti ‘ona ‘outou lē toe va‘ai mai lea ‘iā te a‘u, e toeitiiti fo‘i ‘ona ‘outou toe va‘ai mai lea ‘iā te a‘u’?

²⁰ O le ‘upu moni lava ‘ou te ta‘u atu ‘iā te ‘outou, e fētāgisi ‘outou ma taufai tagiauē, ‘ae ‘oli‘oli le lalolagi; e fa‘anoanoa ‘outou, ‘ae liua lo ‘outou fa‘anoanoa ma ‘oli‘oli.

²¹ ‘Āfai e fānau se fafine e tigā ai o ia, auā ‘ua o‘o i lona taimi; a uma ‘ona fānau mai e ia le tamaitiiti, ‘ona lē toe manatua lea e ia o le tigā ‘ona o le ‘oli‘oli, ‘ona ‘ua fānau mai le tagata i le lalolagi.

²² E fa‘anoanoa nei fo‘i ‘outou; ‘ae ‘ou te toe sau ‘iā te ‘outou, ‘ona ‘oli‘oli ai lea o ‘outou loto, e lē ‘ave‘esea fo‘i e se isi lo ‘outou ‘oli‘oli.

²³ “O lea aso tou te lē toe fesili mai ai ‘iā te a‘u i se mea e tasi. O le ‘upu moni lava ‘ou te ta‘u atu ‘iā te ‘outou, so o se mea tou te ōle atu ai i le Tamā, e foa‘iina atu e ia ‘iā te ‘outou i lo‘u igoa.

²⁴ E o‘o mai nei lava tou te le‘i ōle mai i se mea i lo‘u igoa; ‘ia ‘outou ōle atu ‘ona ‘outou maua ai lea, ‘ina ‘ia ‘ato‘atoa ai lo ‘outou ‘oli‘oli.

O le Manumālō i le Lalolagi

²⁵ “ ‘Ua ‘ou fai atu nei mea ‘iā te ‘outou i ‘upu fa‘atusa. O le a o‘o mai le taimi ‘ou te lē toe tautala atu ai ‘iā te ‘outou i ‘upu fa‘atusa, ‘ae ‘ou te fa‘aali manino atu ‘iā te ‘outou le Tamā.

²⁶ A o‘o mai lea aso, ‘ona ‘outou ōle atu lea ‘iā te ia i lo‘u igoa; ‘ou te lē fai atu ‘iā te ‘outou, ‘ou te ōle atu i le Tamā mo ‘outou,

²⁷ auā e alofa lava le Tamā ‘iā te ‘outou, ‘ona ‘ua ‘outou alolofa mai ‘iā te a‘u, ma talitonu fo‘i na ‘ou sau mai le Atua.

²⁸ ‘Ua ‘ou sau mai le Tamā, ma ‘ou sau i le lalolagi; o le a ‘ou toe tu‘ua le lalolagi, ma alu atu i le Tamā.”

²⁹ ‘Ona fai ane lea o ona so‘o ‘iā te ia, “O lenei, ‘ua e fetalai manino mai lava e aunoa ma le fa‘aaogāina o ‘upu fa‘atusa.

³⁰ ‘Ua matou iloa nei ‘ua e silafia mea uma lava, ‘e te lē mana‘o fo‘i e fesili atu se isi ‘iā te oe; o le mea lea ‘ua matou talitonu ai ‘ua e maliu mai le Atua.”

³¹ ‘Ua tali atu Iesu ‘iā te i latou, “ ‘Ua ‘outou talitonu mai nei ‘ea?

³² ‘Ua o‘o mai le itūlā, ‘ua o‘o nei lava i ai, e fa‘apea ai ‘outou, e ta‘itasi ma alu i lona ‘āiga, ‘ae tu‘ua na o a‘u; peita‘i, ‘ou te lē to‘atasi lava a‘u, auā o lo‘o ‘iā te a‘u le Tamā.

³³ ‘Ua ‘ou fai atu nei mea ‘iā te ‘outou, ‘ina ‘ia ‘outou maua le manuia ‘iā te a‘u. O le a maua ‘outou i puapuagā i le lalolagi; a ‘ia ‘outou lototetele! ‘Ua ‘ou fa‘ato‘ilaloina le lalolagi.”