Ioane 10 - Samoan Contemporary New Testament

O le Tala Fa‘atusa i le Leoleo Mamoe

¹ ‘Ua fetalai atu Iesu, “O le ‘upu moni lava ‘ou te ta‘u atu ‘iā te ‘outou, o lē e lē ulu atu i le faitoto‘a o le lotoā mamoe, ‘ae ui mai i se isi auala, o le gaoi o ia ma le faomea.

² O le tagata e ulu atu i le faitoto‘a, o le leoleo mamoe o ia.

³ E tatala atu ‘iā te ia e le leoleo le faitoto‘a; e fa‘alogo mamoe i lona leo; e vala‘au fo‘i e ia mamoe i o latou igoa, ma ta‘ita‘i atu i latou i fafo.

⁴ A aumai e ia mamoe i fafo, e muamua atu o ia ‘iā te i latou; e mulimuli atu fo‘i mamoe ‘iā te ia, auā ‘ua iloa e i latou lona leo.

⁵ E lē mulimuli atu i latou i se tagata ‘ese, ‘ae sosola ‘ese mai ‘iā te ia; auā e lē iloa e i latou lona leo.”

⁶ Na fa‘aali atu e Iesu ‘iā te i latou lenei tala fa‘atusa, ‘ae sa lē malamalama i latou i le mea na fa‘aali atu e ia ‘iā te i latou.

O Iesu o le Leoleo Mamoe Lelei

⁷ O lea sa toe fetalai atu Iesu, “O le ‘upu moni lava ‘ou te ta‘u atu ‘iā te ‘outou, o a‘u o le faitoto‘a o le lotoā mamoe.

⁸ O i latou uma lava o ē na muamua ‘iā te a‘u, o gaoi ma faomea i latou; e lē fa‘alogo fo‘i mamoe ‘iā te i latou.

⁹ O a‘u nei o le faitoto‘a. O lē e ui mai ‘iā te a‘u e fa‘aolaina; e ulufale mai o ia ma toe ulufafo, ma maua e ia le mea‘ai.

¹⁰ O le gaoi, na ‘ona sau o ia e gaoi, ma fasi, ma fa‘aumatia. ‘Ua ‘ou sau ‘ina ‘ia maua e i latou le ola, ia maua atili ai lava.

¹¹ “O a‘u o le leoleo mamoe lelei. O le leoleo mamoe lelei ‘ua nofo sauni o ia e oti fa‘atasi ma mamoe.

¹² O le ‘au‘auna, e lē o le leoleo mamoe o ia, e lē o ia fo‘i e ona mamoe; a o‘o ‘ina va‘aia e ia le luko ‘ua sau ‘ona sola lea; ‘ona pu‘ea ai lea e le luko o mamoe, ma fa‘ata‘ape‘apeina.

¹³ E sola le ‘au‘auna auā ‘ua na o ia o se ‘au‘auna, e lē popole fo‘i i mamoe.

¹⁴ O a‘u o le leoleo mamoe lelei, ‘ua ‘ou iloa a‘u mamoe, ‘ua iloa fo‘i a‘u e i latou,

¹⁵ fa‘apei ‘ona silafia a‘u e le Tamā ma ‘ou iloa le Tamā; ‘ou te tu‘uina atu fo‘i lo‘u ola e sui ai mamoe.

¹⁶ O lo‘o i ai fo‘i isi a‘u mamoe e lē o i lenei lotoā. E tatau ‘ona ‘ou ‘aumaia fo‘i i latou; latou te fa‘alogo i lou leo, ‘ona ‘avea lea o latou ma lafu mamoe e tasi, i lalo o le leoleo mamoe e to‘atasi.”

¹⁷ O le mea lea e alofa mai ai le Tamā ‘iā te a‘u, auā ‘ou te tu‘uina atu lo‘u ola, ‘ina ‘ia ‘ou toe aumai ai.

¹⁸ E leai se isi na te ‘ave‘eseina mai ‘iā te a‘u, ‘ae peita‘i, ‘ou te tu‘uina atu e a‘u lava. O ‘iā te a‘u le pule e tu‘uina atu, o ‘iā te a‘u fo‘i le pule e toe aumai ai. ‘Ua ‘ou maua lenā poloa‘iga mai lo‘u Tamā.

¹⁹ ‘Ona toe vaeluaina lea o tagata Iutaia ‘ona o nei ‘upu.

²⁰ E to‘atele nisi ‘ua fai ane, “ ‘Ua ‘iā te ia le temoni, o le vale fo‘i o ia, a ‘ua ‘outou fa‘alogo aiseā ‘iā te ia.”

²¹ A o isi ‘ua fai ane, “E lē mafai ‘ona tautala fa‘apea se tagata ‘ua i ai le temoni! E mafai fa‘apefea e se temoni ‘ona fa‘apupula mata o ni tagata tauaso?”

‘Ua Te‘ena Iesu e Tagata Iutaia

²² O le taimi tonu o le tau malūlū, na faia ai i Ierusalema le Tausamiga o le Fa‘apa‘iaga.

²³ ‘Ua maliu atu Iesu i le malumalu, ma femaliua‘i i le fa‘apaologa o Solomona.

²⁴ ‘Ona lolofi atu lea o tagata Iutaia ‘iā te ia ma fai ane, “O afea ‘ea e uma ai le fa‘alētonu o matou mafaufau ‘iā te oe? ‘Āfai o oe o le Keriso, inā ta‘utino mai ia.”

²⁵ ‘Ua tali atu Iesu, “ ‘Ua uma ‘ona ‘ou fai atu ‘iā te ‘outou, ‘ae tou te le‘i talitonu ‘iā te a‘u. O galuega ‘ou te faia i le suafa o lo‘u Tamā, e molimau mai ia ‘iā te a‘u;

²⁶ ‘ae tou te lē talitonu, auā e lē ni a‘u mamoe ‘outou.

²⁷ E fa‘alogo a‘u mamoe i lo‘u leo; ‘ua ‘ou iloa i latou, ‘ua mulimuli mai fo‘i i latou ‘iā te a‘u.

²⁸ ‘Ou te avatu ‘iā te i latou le ola e fa‘avavau, e lē oti fo‘i i latou; e leai fo‘i se isi na te ‘ave‘eseina i latou mai ‘iā te a‘u.

²⁹ O lo‘u Tamā o lē na tu‘uina mai i latou ‘iā te a‘u, e sili o ia i lo so o se isi, e lē mafai fo‘i e se isi ‘ona ‘ave‘esea i latou mai le Tamā.

³⁰ O a‘u ma le Tamā e tasi lava i mā‘ua.”

³¹ ‘Ona toe fetāgofi lea o tagata Iutaia i ma‘a e fetogi ‘iā te ia.

³² ‘Ua fetalai atu Iesu ‘iā te i latou, “ ‘Ua ‘ou faia i o ‘outou luma galuega lelei e tele mai lo‘u Tamā, o lē fea o ia galuega ‘ua ‘outou fetogiina ai a‘u?”

³³ ‘Ua toe tali mai tagata Iutaia, “E lē ‘ona o galuega lelei ‘ua matou fetogiina ai oe, a ‘ona ‘ua e ‘upuvale i le Atua. O oe ‘ua na o se tagata, a ‘ua e taumafai e ‘avea oe ma Atua.”

³⁴ ‘Ua tali atu Iesu, “E lē ‘ua tusia ‘ea i la ‘outou tulafono, na ‘ou fai atu, ‘O atua ‘outou’?

³⁵ ‘Ua matou iloa so o se mea e fai mai ai le Tusi e fa‘amaoni ia; na ta‘ua e le Atua ē na tu‘uina atu i ai e ia lana afioga o atua.

³⁶ A o a‘u, na filifilia a‘u e le Tamā ma ‘auina mai i le lalolagi. E fa‘apefea la ‘ona ‘outou talitonu i a‘u galuega, ‘ina ‘ia ‘outou iloa ai o lo‘o i totonu ‘iā te a‘u le Tamā, o a‘u fo‘i o lo‘o i totonu o le Tamā.”

³⁷ ‘Āfai ‘ou te lē o faia galuega a lo‘u Tamā, ‘aua tou te talitonu mai ‘iā te a‘u.

³⁸ ‘Ae ‘āfai ‘ou te faia, e ui lava ‘ina ‘outou lē talitonu mai ‘iā te a‘u, ‘ia ‘outou talitonu i galuega, ‘ina ‘ia iloa e ‘outou, ma talitonu, o lo‘o i totonu ‘iā te a‘u le Tamā, o a‘u fo‘i o lo‘o i totonu ‘iā te ia.

³⁹ Sa toe taumafai i latou e pu‘e ‘iā te ia, a ‘ua maliu ‘ese o ia mai o latou lima.

⁴⁰ ‘Ona toe maliu atu lea o Iesu i Ioritana, i le mea sa papatiso ai Ioane, ma ‘ua nofo ai.

⁴¹ E to‘atele nisi tagata na ō ane ‘iā te ia ma fai ane, “E le‘i faia e Ioane se fa‘ailoga, a o mea uma lava na fai mai ai o ia e uiga i lenei tagata e moni uma lava.”

⁴² E to‘atele tagata sa talitonu ‘iā te ia i lea mea.