Iakopo 4 - Samoan Contemporary New Testament

Fa‘auō ma le Lalolagi

¹ Maifea ‘ea tau‘a ma misa o ‘iā te ‘outou? E lē mai mana‘o leaga ‘ea o lo‘o tau i totonu o ‘outou tino?

² ‘Ua ‘outou tu‘inanau i mea, ‘ae tou te le‘i maua; o lea ‘ua ‘outou fasioti ai. ‘Ua ‘outou losilosi, ‘ae lē mafai ‘ona ‘outou maua; o lea fo‘i ‘ua ‘outou femisaa‘i ai ma fai tau‘a. ‘Ua ‘outou lē maua, auā tou te le‘i ōle atu.

³ ‘Ua ‘outou ōle atu ‘ae tou te le‘i maua, auā ‘ua sesē ‘ona ‘outou ōle atu, ‘ua fa‘apito ‘ona ‘outou ōle atu i mea tou te tu‘inanau i ai.

⁴ O ‘outou tagata mulilua e, tou te lē iloa ‘ea o le fefa‘auōa‘i ma le lalolagi o le tete‘e atu lea i le Atua? O lenei, o sē e fia uō i le lalolagi, ‘ua ‘avea o ia ma tagata e tete‘e i le Atua.

⁵ Tou te manatu ‘ea ‘ua lē aogā le mea ‘ua fai mai ai le Tusi, “O le agaga na tu‘uina e le Atua i totonu ‘iā te i tatou, ‘ua fa‘atūmuina o ia i le lotoleaga.”

⁶ A o le alofa tunoa na foa‘iina mai e le Atua e sili atu lona malosi. O lea ‘ua fai mai ai le Tusi, “E tete‘e atu le Atua i ē e mitamitavale, ‘ae foa‘iina mai le alofa tunoa i ē e fa‘amaulalo.”

⁷ O le mea lea ‘ia ‘outou tu‘uina atu ‘outou lava i le Atua; ‘ia ‘outou tete‘e atu i le tiapolo, ‘ona sola ‘ese ai lea o ia ‘iā te ‘outou.

⁸ ‘Ia ‘outou fa‘alatalata atu i le Atua, ‘ona fa‘alatalata mai lea o ia ‘iā te ‘outou. Tagata agasala e, inā fafano ia o ‘outou lima. ‘Ia fa‘amamā o ‘outou loto ‘outou tagata fa‘alotolotolua.

⁹ ‘Ia fa‘asauāina ‘outou ma fa‘avauvau ma fētāgisi; ia liua lo ‘outou ‘ata‘ata ma fa‘avauvau, ma ‘ia ‘avea lo ‘outou ‘oli‘oli ma fa‘anoanoa.

¹⁰ ‘Ia ‘outou fa‘amaulalo i luma o le Ali‘i, ‘ona fa‘aeaina lea o ‘outou e ia.

Lapata‘iga e Uiga i le Fa‘amasino atu i le Uso Kerisiano

¹¹ Uso e, ‘aua ne‘i fai ‘upu leaga le isi i le isi. So o se isi e fai ‘upuleaga i le uso pe fa‘amasino ‘iā te ia, ‘ua fai ‘upu leaga o ia i le tulafono, ma ‘ua fa‘amasino fo‘i i le tulafono. ‘Ae peita‘i ‘āfai ‘e te fa‘amasinoina le tulafono, e lē o oe o se tagata e usiusita‘i i le tulafono, a o oe o le fa‘amasino.

¹² E to‘atasi lava le fai tulafono e to‘atasi fo‘i le fa‘amasino, o lē na te mafai ‘ona fa‘aola ma fasioti; a o ai ‘ea oe o lē e fa‘amasino atu i lē lua te tuā‘oi?

Lapata‘iga e Uiga i le Mitamitavale

¹³ O lenei, fa‘alogo mai ia ‘iā te a‘u ‘outou o ē fai ane, “O le asō po o a taeao tatou te ō atu ai i le ‘a‘ai, tatou te nonofo ai i le tausaga, ma fa‘atau ma maua ai tupe e tele.”

¹⁴ ‘Ae lē iloa e ‘outou pe se ā le mea e tupu a taeao. Auā se ā ‘ea lo ‘outou ola? O le puao lava ia, e aliali mai i sina taimi itiiti ‘ona mou ‘ese atu lea.

¹⁵ ‘Ae tatau ‘ona ‘outou fa‘apea, “ ‘Āfai e finagalo ai le Ali‘i, tatou te ola ai, ‘ona tatou faia lea o lea mea ma lea mea.”

¹⁶ A o lenei, ‘ua ‘outou mitamita ia ‘outou ‘upu fa‘amaualuga; e leaga le mitamita fa‘apenā uma lava.

¹⁷ O le mea lea, o lē ‘ua iloa le mea lelei e fai ‘ae lē faia, o le agasala lea ‘iā te ia.