Filipi 1 - Samoan Contemporary New Testament

O ‘Upu Fa‘afeiloa‘i

¹ O Paulo ma Timoteo, o ‘au‘auna a Keriso Iesu. O le tusi i le au pa‘ia uma o ‘iā Keriso Iesu o lo‘o i Filipi, ‘atoa ma epikopo ma tiakono.

² ‘Ia ‘iā te ‘outou le alofa tunoa, ma le manuia mai le Atua lo tatou Tamā, ‘atoa ma le Ali‘i o Iesu Keriso.

O le Tatalo a Paulo mo ē e Faitau i le Tusi

³ ‘Ou te fa‘afetai i lo‘u Atua i taimi uma ‘ou te manatu ai ‘iā te ‘outou,

⁴ e lē aunoa fo‘i ‘ona ‘ou ōle atu ma le fiafia i a‘u tatalo uma mo ‘outou uma lava,

⁵ ‘ona o lo ‘outou mafuta fa‘atasi i le Tala Lelei, e amata mai i le ulua‘i aso se‘ia o‘o mai i le taimi nei.

⁶ ‘Ua ‘ou mautinoa fo‘i o lē na amataina le galuega lelei ‘iā te ‘outou, o ia lava lea na te fa‘a‘ato‘atoaina i le aso o Iesu Keriso.

⁷ ‘Ua tatau ‘ona ‘ou manatu fa‘apenā ‘iā te ‘outou uma; auā ‘ua teuina ‘outou i lo‘u loto, ‘ona ‘ua tatou ‘auai fa‘atasi ma a‘u i le alofa tunoa, i le taimi na ‘ou i ai i le falepuipui ‘atoa ma lo‘u tu atu e fa‘amaonia le Tala Lelei.

⁸ Auā ‘ua silafia e le Atua lo‘u naunau ‘iā te ‘outou uma lava, i le alofa naunauta‘i o Iesu Keriso.

⁹ O la‘u tatalo fo‘i lenei, ia fa‘atuputeleina pea lava lo ‘outou alofa, ma le iloa lelei, ‘atoa ma le fa‘autauta uma,

¹⁰ ‘ina ‘ia ‘outou lagolagoina le mea e lelei ‘ato‘atoa. ‘Ona ‘avea ai lea o ‘outou ma tagata e mamā ma e sao ‘ona lelei i le aso o Keriso.

¹¹ E fa‘atūmulia fo‘i ‘outou i fua o le amiotonu mai ‘iā Iesu Keriso, ‘ina ‘ia vi‘ia ma fa‘ane‘ene‘eina ai le Atua.

O le Ola ‘iā Keriso

¹² Uso e, ‘ou te mana‘o ‘ina ‘ia ‘outou iloa, o mea na o‘o ‘iā te a‘u, ‘ua fesoasoani ia e fa‘alauteleina atili ai le Tala Lelei.

¹³ O lea ‘ua fa‘aalia ai le noanoatia o a‘u ‘ona o Keriso, i le fale uma o le ‘au e leoleo ‘atoa ma isi mea uma.

¹⁴ O le to‘atele fo‘i o le au uso o i le Ali‘i, ‘ua matuā fa‘atuatua ‘ona o le noanoatia o a‘u; ‘ua atili ai ‘ona fa‘amalosi i latou e tautala atu i le afioga a le Atua e aunoa ma le fefe.

¹⁵ E i ai isi ‘ua tāla‘i atu Keriso ma le matau‘a ma le finau vale, a o isi fo‘i ‘ua tāla‘i atu ma le lotolelei.

¹⁶ O ē e tāla‘i ma le alofa, ‘ua iloa e i latou na tu‘uina a‘u ‘i‘inei ‘ina ‘ia ‘ou tu atu e finau mo le Tala Lelei.

¹⁷ A o ē e tala‘iina Keriso ma le finau vale, e lē faia ma le fa‘amaoni e i latou lea mea, a ‘ua faia ma le manatu ia fa‘aopoopo mai ai le puapuagā i o‘u noanoataga.

¹⁸ A fa‘apefea nei la? E ui lava i faiga uma, pe fa‘atagā fai, pe fai ma le fa‘amaoni, ‘ua tala‘iina atu ai Keriso, o le mea lenā ‘ou te ‘oli‘oli ai.

¹⁹ O le mea lea, o le a ‘ou ‘oli‘oli lava, auā ‘ua ‘ou iloa e i‘u atu le mea lenei i le lavea‘iina o a‘u, ‘ona o ā ‘outou tatalo ‘atoa ma le fesoasoani mai o le Agaga o Iesu Keriso.

²⁰ O lo‘o ‘ou naunau tele ma fa‘amoemoe ‘ina ‘ia ‘ou lē ma i se mea e tasi, a ‘ia ‘ou matuā fa‘amalosi fa‘apei ‘ona ‘ou faia e lē aunoa, e fa‘apea fo‘i i aso nei, ‘ina ‘ia vi‘ia ai Keriso i lo‘u tino, i le ola po o le oti.

²¹ Auā o lo‘u ola ‘ua ‘iā Keriso lea; a o lo‘u oti o lo‘u manuia lea.

²² ‘Āfai ‘ou te ola i le tino, e fua mai le galuega mo a‘u. Peita‘i, ‘ou te lē iloa po o lē fea tonu le mea ‘ou te filifilia.

²³ Auā ‘ua ‘ou fa‘alētonu i manatu e lua; ‘ou te naunau tele ‘ou te alu, ‘ina ‘ia fa‘atasia a‘u ma Keriso; o le mea lea e sili ‘ona lelei.

²⁴ Peita‘i ia ‘ou tumau i le tino, o le mea lea e sili ‘ona aogā ‘iā te ‘outou.

²⁵ ‘Ua ‘ou mautinoa le mea lenei, ‘ou te tumau; tatou te tūtūmau fa‘atasi fo‘i, ‘ina ‘ia alualu pea ‘outou ma ‘ia fiafia i le fa‘atuatua;

²⁶ ‘ina ‘ia fa‘atuputeleina ai lo ‘outou ‘oli‘oli ‘iā Keriso Iesu ‘ona o a‘u, i lo‘u toe alu atu ‘iā te ‘outou.

²⁷ Tau lava ‘ina ‘ia tusa ai la ‘outou amio ma le Tala Lelei ‘iā Keriso, pe ‘āfai ‘ou te alu atu ma feiloa‘i ma ‘outou, po o lo‘u nofo ‘ese fo‘i nai ‘iā te ‘outou, ia ‘ou iloa lava sina tala ‘iā te ‘outou, e tusa ma lo ‘outou tumau i le agaga e tasi, ma le manatu e tasi, o lo‘o finau fa‘atasi mo le fa‘atuatuaga ‘ua i le Tala Lelei.

²⁸ A ‘ia lē fa‘amata‘uina ‘outou i se mea e tasi e i latou o ē e tete‘e mai. O le fa‘ailoga lea ‘iā te i latou o le malaia; a o le fa‘ailoga o le ola ‘iā te ‘outou; ma o lea lava fa‘ailoga e mai le Atua.

²⁹ Auā ‘ua foa‘iina fua mai ‘iā te ‘outou ‘ona o Keriso, e lē tau ‘ina fa‘atuatua ‘iā te ia, a ‘ia fa‘atigāina fo‘i ‘outou ‘ona o ia.

³⁰ ‘Ua aofia ai fo‘i ‘outou i lea lava tauiviga sa ‘outou va‘ai i ai, ma ‘ua ‘outou fa‘alogo nei i ai ‘iā te a‘u.