Filemoni 1 - Samoan Contemporary New Testament

O ‘Upu Fa‘afeiloa‘i

¹ O a‘u o Paulo, o lē ‘ua ‘avea ma pagotā ‘ona o Iesu Keriso, ma Timoteo lo tatou uso. ‘Ou te tusi atu ia Filemoni la tatou uō o lē na tatou galulue fa‘atasi,

² ma le ekalesia i lou fale, ma lo tatou tuafafine o Afia, ma Arekipa o le fitafita fa‘atasi ma i tatou.

³ ‘Ia ‘iā te ‘outou le alofa tunoa ma le manuia mai le Atua lo tatou Tamā, ‘atoa ma le Ali‘i o Iesu Keriso.

O le Alofa ma le Fa‘atuatua o Filemoni

⁴ ‘Ou te fa‘afetai i lo‘u Atua, pe a ‘ou ta‘uta‘ua oe e lē aunoa i a‘u tatalo;

⁵ auā ‘ua ‘ou fa‘alogo i lou alofa ma lou fa‘atuatua i le Ali‘i o Iesu Keriso, ‘atoa ma le au pa‘ia uma lava;

⁶ o la‘u talosaga ia ‘avea le mafutaga ma oe i le fa‘atuatua, ma ala e fa‘amalamalamaina ai atili fa‘amanuiaga uma ‘ua tatou maua ‘iā Keriso.

⁷ Auā ‘ua ‘ou matuā ‘oli‘oli tele ma fa‘amafanafanaina i lou alofa, ‘ua fa‘afiafiaina fo‘i loto o le au pa‘ia uma ‘ona o oe le uso.

O le Olega mo Onesemo

⁸ ‘Ua fa‘amalosia a‘u fa‘apei o se uso ‘iā Keriso ‘ona o lea mea, ‘ina ‘ia fa‘atonuina oe ‘ia faia mea e tatau ‘ona fai.

⁹ ‘Ou te ‘ai‘oi atu ‘ona o le alofa, o a‘u o Paulo o le toeaina, o lē ‘ua ‘avea nei fo‘i ma pagotā ‘ona o Keriso Iesu.

¹⁰ ‘Ou te ‘ai‘oi atu ‘iā te oe ‘ona o lo‘u atali‘i o Onesemo, o lē na ‘ou fānaua ao ‘avea a‘u ma pagotā.

¹¹ Sa lē aogā o ia ‘iā te oe, a o lenei ‘ua aogā o ia mo oe ma a‘u.

¹² ‘Ua ‘ou toe ‘auina atu nei o ia ‘iā te oe, ma ‘ua alu atu lava o ia ma lo‘u loto.

¹³ Sa ‘ou mana‘o ma te nonofo pea ma ia, a o ‘ou i ai i le falepuipui ‘ona o le Tala Lelei, ‘ina ‘ia ‘avea o ia ma ‘ou sui e ‘au‘auna mai ‘iā te a‘u.

¹⁴ Ui i lea, ‘ou te lē mana‘o e faia fa‘amalosi se mea e aunoa ma lou loto malie i ai; ‘ina ne‘i ‘avea ma mea ‘ua fa‘atauānauina lou agalelei mai, a ‘ia faia ma le loto.

¹⁵ Atonu o le mea lea na te‘a ‘ese ai o ia mo sina taimi, ‘ina ‘ia e toe maua ai o ia e fa‘avavau;

¹⁶ e lē toe pei o se pologa, ‘ae sili atu i lo le pologa, o le uso pele o ia ‘iā Keriso; e lē sili ‘ea ‘ona fa‘apea ‘iā te oe i la le tino ‘atoa ma la le Ali‘i?

¹⁷ O le mea lea ‘āfai ‘e te manatu ‘iā te a‘u o lau uō, ia e toe talia o ia e pei lava ‘ona e talia o a‘u.

¹⁸ ‘Ae ‘āfai na agaleaga o ia ‘iā te oe, po ‘ua ‘aitalafu ‘iā te oe, ia e tu‘u mai lea mea ‘iā te a‘u.

¹⁹ O a‘u o Paulo, ‘ua ‘ou tusi atu i lo‘u lava lima, ‘ou te totogi atu lava; ‘ae ‘ou te lē fai atu i lau ‘aitalafu ‘iā te a‘u, na e ‘aitalafu ‘iā te a‘u i lou lava ola.

²⁰ O le mea lea lo‘u uso e, se‘i e fa‘afiafia mai ‘iā te a‘u i le Ali‘i, ia e fa‘amafanafana mai i lo‘u loto ‘iā Keriso.

²¹ ‘Ua ‘ou mautinoa e pei ‘ona ‘ou tusi atu, o le a sili mea ‘e te faia i mea ‘ua ‘ou fai atu ai.

²² I le ma lenei fo‘i, ia saunia se potu ‘ou te nofo ai; auā ‘ou te fa‘amoemoe o a ‘outou tatalo e tu‘uina atu ai a‘u ‘iā te ‘outou.

O Toe Alofa‘aga

²³ O lo‘o alolofa atu ‘iā te oe Epafara, o lē sa ma falepuipui fa‘atasi ‘ona o Keriso Iesu,

²⁴ e fa‘apea fo‘i ‘ona alofa atu o Mareko, ma Aritako, ma Tema ma Luka; o ē sa galulue fa‘atasi ma a‘u.

²⁵ ‘Ia i ai i o ‘outou agaga le alofa tunoa o lo tatou Ali‘i o Iesu Keriso.