Fa‘aaliga 4 - Samoan Contemporary New Testament

O le Tapua‘iga i le Lagi

¹ ‘Ua mavae atu ia mea, ‘ona ‘ou iloa atu lea, o le faitoto‘a ‘ua avanoa i le lagi, o le ulua‘i leo fo‘i na ‘ou fa‘alogo ai e pei o se pū o lo‘o tautala mai ‘iā te a‘u, fai mai, “Inā sau ia i luga nei, se‘i ‘ou fa‘aali atu ‘iā te oe mea o le a tutupu i aso o lumana‘i.”

² O le taimi lava lea na ‘ou i ai loa i le Agaga. ‘Ua tu mai o le nofoāli‘i i le lagi, ma lē o lo‘o ti‘eti‘e ai i le nofoāli‘i,

³ O lē o lo‘o ti‘eti‘e mai e foliga i ma‘a tāua o le iasepi ma le salikea i le tino mai; ‘ua si‘osi‘oina fo‘i le nofoāli‘i e le nuanua e pei o le samaraki lona tino mai.

⁴ ‘Ua si‘osi‘oina fo‘i le nofoāli‘i e nofoāli‘i e luasefulu ma le fa; na ‘ou iloa fo‘i toeaina e to‘aluasefulu ma le fa e ti‘eti‘e i ia nofoāli‘i, ‘ua ‘o‘ofu i ‘ofu papa‘e; ‘ua i o latou ulu fo‘i pale auro.

⁵ ‘Ua o‘o mai fo‘i uila, ma faititili, ma leo mai le nofoāli‘i; o lo‘o mumū fo‘i sulu e fitu i luma o le nofoāli‘i e fa‘amalamalama ai, o agaga ia e to‘afitu o le Atua.

⁶ ‘Ua i luma fo‘i o le nofoāli‘i le sami tioata, e pei o ma‘a tioata. ‘Ua si‘omia fo‘i le nofoāli‘i, i ‘ona itū ta‘itasi, e meaola e fa, ‘ua tūtūmu i mata i luma ‘atoa ma tua.

⁷ O le meaola muamua e pei o se leona, o lona lua o meaola e pei o se povi ta‘anoa, o lona tolu o meaola e pei o se tagata ona mata, o lona fa o meaola e pei o se aeto ‘ua lele.

⁸ O meaola e fa e tofu ma ‘apa‘au ta‘iono, ma e tumu i latou i mata i fafo ‘atoa ma totonu; e lē mapu i latou i le ao ma le po i le fai atu, “E pa‘ia, e pa‘ia, e pa‘ia le Ali‘i le Atua e ona le malosi uma lava, o lē na soifua, o lo‘o soifua fo‘i, o le a afio mai!”

⁹ A vivi‘i fo‘i, ma fa‘ane‘ene‘e, ma fa‘afetai atu meaola i lē o lo‘o ti‘eti‘e i le nofoāli‘i, o lē e soifua e fa‘avavau fa‘avavau lava.

¹⁰ ‘Ona fa‘apa‘u‘ū ai lea o toeaina e to‘aluasefulu ma le fa i luma o lē o lo‘o ti‘eti‘e i le nofoāli‘i, ma ifo atu i lē e soifua e fa‘avavau fa‘avavau lava, ma lafo o latou pale i luma o le nofoāli‘i, ma fai atu,

¹¹ “Lo matou Ali‘i e, ma lo matou Atua, e tatau lava ‘ona tu‘uina atu ‘iā te oe le vi‘iga, ma le fa‘ane‘etaga, ma le mana; auā na e faia mea uma lava, ‘ona o lou finagalo fo‘i e i ai i latou ma ‘ua faia.”