Fa‘aaliga 15 - Samoan Contemporary New Testament

O Agelu ‘ua i ai Mala Mulimuli

¹ Na ‘ou va‘aia fo‘i i le lagi le isi fa‘ailoga tele e ofo ai, o agelu e to‘afitu ‘ua i ai mala e fitu e gata ai; auā e fa‘ai‘uina ai le to‘asā o le Atua.

² Na ‘ou va‘aia fo‘i ‘ua peiseaī o se sami tioata ‘ua fefiloi ma le afi; ma o i latou fo‘i na manumālō i le manu fe‘ai, ma lona fa‘atagata, ma le numera o lona igoa, ‘ua tutū i latou i le sami tioata, ‘ua ‘iā te i latou kitara a le Atua.

³ ‘Ua latou pepese i le pese a Mose le ‘au‘auna a le Atua, ma le pese a le Tama‘i Mamoe, ‘ua fa‘apea atu: “Le Ali‘i e, le Atua e ou le malosi uma lava, ‘ua tetele au galuega e ofo ai! E tonu ma fa‘amaoni ou ala, le Tupu o augātupulaga e!

⁴ Le Ali‘i e, o ai sē le mata‘u ma vivi‘i atu i lou suafa? Auā ‘ua na o oe e pa‘ia; auā e ō mai nu‘u uma lava ma latou ifo i ou luma; auā ‘ua fa‘aalia au fa‘amasinoga tonu.”

⁵ ‘Ua mavae ia mea, ‘ona ‘ou va‘ai lea, ‘ua fa‘aavanoaina i le lagi le malumalu o i le fale fetāfa‘i o le molimau.

⁶ ‘Ona ō atu lea mai le malumalu o agelu e to‘afitu ‘ua i ai mala e fitu, ‘ua ‘o‘ofu i latou i le lino e mamā ma le pupula, ‘ua fusia fo‘i o latou fatafata i fusi auro.

⁷ O le tasi fo‘i o mea ola e fa ‘ua ia avatu i agelu e to‘afitu o ipu auro e fitu, ‘ua tūtūmu i le to‘asā o le Atua o lē e soifua e fa‘avavau lava.

⁸ ‘Ua tumu fo‘i le malumalu i le asu mai le pupula o le Atua ‘atoa ma lona mana; e le mafaia fo‘i e se tasi ona ulu atu i le malumalu, se‘ia fa‘ai‘uina mala e fitu a agelu e to‘afitu.