Eperu 9 - Samoan Contemporary New Testament

O le Tapua‘iga

¹ O lenei, sa i le feagaiga na muamua sauniga e ‘au‘auna a‘i ma le mea pa‘ia fa‘alelalolagi.

² Auā na saunia le potu i luma, e ta‘ua o le mea pa‘ia, sa i ai le tu‘ugāmolī ma le la‘o‘ai, ma le areto e laulauina i luma.

³ O tala atu fo‘i o le ‘ie puipui lona lua, sa i ai le potu e ta‘ua o le mea e sili ‘ona pa‘ia.

⁴ Sa i ai le ipu auro e fa‘amu ai mea manogi, ma le ‘atola‘au o le feagaiga ‘ua lilo ‘atoa i le auro, sa i ai le ipu auro fa‘a‘ofu‘ofu e tu‘u ai le manai, ma le to‘oto‘o o Arona o lo‘o ola, ma papama‘a o le feagaiga.

⁵ Sa i ona luga fo‘i kerupi pupula, sa fa‘amalumalu ifo i luga a‘e o le nofoa o le alofa; o mea ia e lē mafai ‘ona fa‘amatala ta‘itasi atu nei.

⁶ O lenei, ‘ua fa‘apea ‘ona saunia nei mea uma, ‘ona ulufale so‘o lea o le ositaulaga i le potu i luma, ma faia ai a latou galuega.

⁷ A o le potu i tua, na o le ositaulaga sili e tasi lana ulu i ai i le tausaga. E lē aunoa fo‘i lea ulu atu ma le toto, e osi ai le taulaga mo ia lava, ‘atoa ma sesē o le nu‘u.

⁸ O le a fa‘aali mai e le Agaga Pa‘ia, e le‘i tatalaina le ala i le mea e sili ‘ona pa‘ia, i le taimi lea o tu pea le fale fetāfa‘i muamua,

⁹ (o le fa‘atusa lea e o‘o mai i aso nei) o lo‘o avatu ai meaalofa ma taulaga, ‘ae lē mafaia ‘ona fa‘a‘ato‘atoaina ai le loto fuatiaifo o lē o lo‘o tapua‘i atu.

¹⁰ Peita‘i o lo‘o i ai mea‘ai ma mea inu, ‘atoa ma mea e fufulu ai mea i le vai, o lo‘o i ai fo‘i fa‘atonuga fa‘aletino, se‘ia o‘o mai i aso o le toe fuata‘iga.

¹¹ A o Keriso ‘ua maliu mai, o le ositaulaga sili o ia i mea lelei ‘ua mafai ‘ona aulia, ‘ua ui ane i le fale fetāfa‘i e sili ‘ona lelei ma ‘ato‘atoa e le‘i faia e lima, o lona uiga e lē faia fa‘alelalolagi nei,

¹² ‘ona ulu fa‘atasi lea o ia i totonu o le mea pa‘ia, e lē ulu atu ma le toto o ‘oti ma tama‘i povi, a o lona lava toto, ‘ua maua e ia le togiola e fa‘avavau mo i tatou.

¹³ Auā o le toto o povi po‘a ma ‘oti, ma le lefulefu o le povi fafine ta‘anoa, ‘ua sausauina ai ē ‘ua leaga, e fa‘apa‘iaina ai e o‘o i le fa‘amamāina o le tino.

¹⁴ E lē sili ‘ea ‘ona fa‘amamāina o ‘outou loto fuatiaifo ai galuega e oti ai, i le toto o Keriso, o lē na tu‘uina o ia e ia lava i le Agaga e fa‘avavau, e fai ma taulaga e lē ponā i le Atua, ‘ina ‘ia ‘outou ‘au‘auna i le Atua soifua.

¹⁵ O le mea lea ‘ua ‘avea ai o ia ma puluvaga o le feagaiga fou, ‘ona o lona maliu fo‘i e togiolaina a‘i agasala na faia o le feagaiga tuai, ia maua ai e i latou ‘ua vala‘auina le tofi e fa‘avavau na folafolaina mai.

¹⁶ Auā ‘āfai se mavaega, se‘iloga e oti lē e ana le mavaega, ‘ona fa‘ato‘ā o‘o lea.

¹⁷ Auā e fa‘amaonia le mavaega ‘ona o le oti, ‘ona e leai se aogā a o ola mai lē e ona le mavaega.

¹⁸ Auā e le‘i fa‘amauina le feagaiga muamua a o aunoa ma le toto.

¹⁹ Auā ‘ua uma ‘ona ta‘uina atu e Mose i le nu‘u uma lava poloa‘iga uma e tusa ma le tulafono, ‘ona tago ai lea o ia i le toto o tama‘i povi ma ‘oti, ‘atoa ma le vai, ma fulufulu mamoe e mūmū, ‘ua sausauina ai fo‘i e ia le Tusi ‘atoa ma tagata uma o le nu‘u.

²⁰ Ma fai atu, “O le toto lenei o le feagaiga ‘ua poloa‘i atu ai le Atua ‘iā te ‘outou.”

²¹ O le fale fetāfa‘i fo‘i ‘atoa ma mea uma e ‘au‘auna a‘i, na fa‘apea fo‘i ‘ona sausauina e ia i le toto.

²² Na toetoe ‘ina uma ‘ona fa‘amamāina mea uma i le toto e tusa ma le tulafono; a leai se fa‘amaligiina o le toto, ‘ua leai fo‘i se fa‘amāgaloina.

O le Taulaga a Keriso e Fa‘amāgalo ai Agasala

²³ O le mea lea sa tatau ai ‘ona fa‘amamāina fa‘atusa o mea o i le lagi i sauniga fa‘apea, peita‘i, o mea fa‘alelagi e fa‘amamāina i taulaga e sili atu ‘ona lelei i lo mea ia.

²⁴ Auā ‘ua lē ulu atu Keriso i le mea pa‘ia ‘ua faia e lima, o le fa‘atusa lea o le mea moni, a o le lagi lava, ‘ina ‘ia iloa ai nei o ia i luma o le Atua mo i tatou.

²⁵ ‘Ae lē ‘ina ‘ia ofoina atu so‘o o ia e ia ma taulaga, pei o le ositaulaga sili i lona ulu atu i le mea pa‘ia i lea tausaga ma lea tausaga ma le toto ‘ese.

²⁶ Auā ana fa‘apea po ‘ua tatau ‘ona tigāina so‘o o ia talu ‘ona fa‘avaeina le lalolagi. A o lenei, ‘ua tasi lava le fa‘aalia mai o ia i le taimi e tatau ai, ‘ina ‘ia ‘ave‘esea le agasala, ‘ina ‘ua ‘avea o ia e ia lava ma taulaga.

²⁷ Pei ‘ona tofia mo tagata ‘ina ‘ia tasi lo latou oti, ma le fa‘amasinoga mulimuli ane;

²⁸ e fa‘apea fo‘i Keriso, e tasi lava le ofoina atu o ia e fai ma taulaga, ‘ina ‘ia ‘ave‘esea ai agasala a le to‘atele, e fa‘aali fo‘i e ia ‘iā te i latou o ē e fa‘atalitali ‘iā te ia i lona afio fa‘alua mai, e lē ‘ina ‘ia tau‘aveina agasala, a ‘ia fa‘aolaina i latou.