Eperu 8 - Samoan Contemporary New Testament

O Iesu le Tatou Ositaulaga Sili

¹ O le ‘a‘ano moni o le matā‘upu o lo‘o tautalagia nei, ‘ua ia i tatou le ositaulaga sili, o lē o lo‘o nofo i le itū taumatau o le nofoāli‘i o lē e Silisili‘ese o i le lagi,

² o le ‘au‘auna o ia i le mea pa‘ia, ma le fale fetāfa‘i moni, sa fa‘atūina e le Ali‘i, ‘ae lē o tagata.

³ Auā ‘ua tofia ositaulaga uma ‘ina ‘ia ositaulaga i meaalofa ma taulaga. O le mea lea ‘ua tatau ai fo‘i ‘ona i ai i lenei ositaulaga sili se mea e ositaulaga a‘i.

⁴ Auā ana i ai o ia i le lalolagi, po ‘ua lē ‘avea o ia ma ositaulaga, auā o lo‘o i ai ositaulaga o ē e osiina taulaga i meaalofa e tusa ma le tulafono.

⁵ O ē o lo‘o ‘au‘auna i le fa‘atusa ma le ata o le mea pa‘ia fa‘alelagi, pei ‘ona a‘oa‘oina Mose e le Atua ‘ina o le a fai le fale fetāfa‘i; auā na fetalai mai o ia, “ ‘Ia oe, ne‘i e lē faia mea uma lava e pei o le fa‘atusa sa fa‘aali atu ‘iā te oe i le mauga.”

⁶ A o lenei ‘ua maua e ia le galuega e sili, e pei ‘ona ‘avea o ia ma puluvaga o le feagaiga e sili ‘ona lelei, auā ‘ua fa‘amaufa‘ailogaina i mea e sili ‘ona lelei ‘ua folafolaina mai.

⁷ Auā ana sa‘o ‘ona lelei le feagaiga muamua, po ‘ua lē toe sā‘ilia lona lua.

⁸ Auā ‘ua ta‘ua e ia ‘ua lē sa‘o lē na muamua, ‘ona fetalai atu lea o ia ‘iā te i latou. “O lo‘o fetalai mai le Ali‘i, o le a o‘o mai aso ‘ou te osia ai le feagaiga fou ma le ‘āiga o Isaraelu ‘atoa ma le ‘āiga o Iuta.

⁹ E lē pei o le feagaiga na ‘ou osia ma o latou tamā, i le aso na ‘ou tago ai i o latou lima ma ta‘ita‘i atu i latou nai le nu‘u o Aikupito. Auā o lo‘o fetalai mai le Ali‘i, e le‘i tumau i latou i la‘u feagaiga, ‘ona ‘ou tu‘ulafoa‘iina ai lea o i latou.

¹⁰ A o le feagaiga lenei ‘ou te osia ma le ‘āiga o Isaraelu pe a mavae atu ia aso, o lo‘o fetalai mai ai le Ali‘i: ‘Ou te tu‘uina atu a‘u tulafono i o latou mafaufau, ma ‘ou tusia i o latou loto; e fai fo‘i a‘u ma o latou Atua, e fai fo‘i i latou ma o‘u nu‘u.

¹¹ E lē toe a‘oa‘o atu e tagata ta‘ito‘atasi i ē e tuā‘oi, ‘atoa ma o latou uso, ma fai atu i ai, ‘ ‘Ia e iloa le Ali‘i.’ Auā e iloa a‘u e tagata uma lava, o tagatanu‘u ‘atoa ma ali‘i.

¹² Auā ‘ou te fa‘amāgaloina a latou amioleaga, ‘ou te lē toe manatua fo‘i a latou agasala.”

¹³ O lana fetalaiga e uiga i le feagaiga fou, ‘ua ta‘ua ai e ia le feagaiga muamua o le feagaiga tuai; o le mea fo‘i ‘ua ta‘ua ‘ua tuai, ‘ua tauau ‘ina vāivāi ma ‘ua lata ‘ona mavae atu.