Eperu 7 - Samoan Contemporary New Testament

O le Ositaulaga o Mekisateko

¹ O Mekisateko lenei o le tupu o Salema, o le ositaulaga a le Atua silisili ‘ese, o lē na fetaia‘i ma Aperaamo ‘ina o fo‘i mai o ia mai le fasiga o tupu, ma ‘ua fa‘amanuia atu ‘iā te ia,

² sa foa‘i atu fo‘i e Aperaamo ‘iā te ia le tasi o vaesefulu o ana mea uma. O le uiga muamua o lona igoa, o le tupu o le amiotonu; ma o le tupu fo‘i o Salema, o lona uiga o le tupu o le filemū.

³ E leai sona tamā po o sona tinā, e leai ni ona tupuga, e leai fo‘i se amataga o ona aso po o se gata‘aga o lona soifua, a ‘ua pei lava o ia o le Alo o le Atua, ma ‘ua tumau o ia o le ositaulaga e fa‘avavau.

⁴ Se‘i silasila i le sili o lenei ali‘i! Na foa‘i atu ‘iā te ia e le tamā o Aperaamo le tasi o vaesefulu o mea na fāoa.

⁵ O i latou fo‘i o le fānau a Levi o ē o lo‘o faia le galuega ositaulaga, ‘ua poloa‘iina i latou i le tulafono ‘ina ‘ia ‘ave ma a latou le tasi o vaesefulu o mea mai tagata o le nu‘u, o latou uso lava ia, a o i latou fo‘i na tutupu mai le tino o Aperaamo.

⁶ A o Mekisateko e le‘i tupu mai ia Levi, a ‘ua maua e ia le tasi o vaesefulu o mea mai ‘iā Aperaamo, ma ‘ua fa‘amanuia atu o ia i lē na i ai ‘upu o le folafolaga.

⁷ ‘Ua lauiloa fo‘i o lē e sili e fa‘amanuia atu o ia i lē e itiiti.

⁸ O le mea e uiga i ositaulaga, e talia le tasi o vaesefulu o mea a tagata o ē e oti; a o le mea e uiga ia Mekisateko, ‘ua talia le tasi o vaesefulu o mea e lē ‘ua ta‘ua mai o lo‘o ola.

⁹ Atonu pe fai ane se isi, o Levi lē na te talia le tasi o vaesefulu, ‘ua avatua e ia le tasi o vaesefulu e ala ‘iā Aperaamo;

¹⁰ auā sa i le tino o lona tamā o ia ‘ina o fa‘afetaia‘i Aperaamo e Mekisateko.

¹¹ O lenei, ‘āfai na fa‘a‘ato‘atoaina le galuega fa‘aositaulaga i le ‘āiga o Levi (auā na maua e le nu‘u le tulafono mai ia i latou ia), a o le ā le mea ‘ua toe fa‘atūina ai le isi ositaulaga, e uiga fa‘atasi ma Mekisateko, a ‘ua lē ta‘ua fa‘apea e uiga fa‘atasi ma Arona?

¹² Auā ‘āfai ‘ua suia le galuega fa‘aositaulaga, ‘ua tatau fo‘i la ‘ona suia le tulafono.

¹³ Auā o lē ‘ua ta‘ua ai ia mea e ‘ese le itū‘āiga e sau ai, ma e leai lava se isi o le itū‘āiga lea na ‘au‘auna i le fatafaitaulaga.

¹⁴ ‘Ua mautinoa lelei lava o Iuta na tupuga mai ai lo tatou Ali‘i; ‘ae leai lava se ‘upu a Mose na ta‘ua ai se feso‘ota‘iga o le itū‘āiga lea ma le galuega fa‘aositaulaga.

O le isi Ositaulaga, e pei o Mekisateko

¹⁵ ‘Ua atili ai ‘ona iloa tino, ‘ina ‘ua tu mai le isi ositaulaga e pei o Mekisateko,

¹⁶ e lē o se tulafono o se poloa‘iga fa‘aletino na ‘avea ai o ia ma ositaulaga, a o le mana o le ola e le uma.

¹⁷ Auā ‘ua molimau mai o ia: “O oe o le ositaulaga e fa‘avavau, e uiga fa‘atasi ma Mekisateko.”

¹⁸ Auā ‘ua tatalaina le poloa‘iga na muamua ‘ona ‘ua vāivāi ma ‘ua lē aogā.

¹⁹ Auā e le‘i fa‘a‘ato‘atoaina se mea e tasi e le tulafono; a ‘ua sui mai le fa‘amoemoe e sili ‘ona lelei, ‘ua tatou fa‘alatalata atu ai i le Atua.

²⁰ Sa le‘i faia fo‘i lea mea e aunoa ma le tautoga.

²¹ A o i latou na mua‘i ‘avea ma ositaulaga, na maua e i latou le tofi e aunoa ma le tautoga, peita‘i, o ia lea ‘ua tu‘uina atu nei i ai le tofi fa‘atasi ma le tautoga: “ ‘Ua tautō le Ali‘i, e lē toe suia lava lona mafaufau, o oe o le ositaulaga e fa‘avavau.”

²² E fa‘apea fo‘i ‘ona ‘avea Iesu ma fa‘amaoniga o le feagaiga e sili ‘ona lelei.

²³ E to‘atele fo‘i ē na ‘avea muamua ma ositaulaga; auā sa lē mafai ‘ona tumau i latou ‘ona o le oti;

²⁴ peita‘i o Iesu e tumau pea lona tofi ositaulaga, auā e tumau o ia e fa‘avavau.

²⁵ O le mea fo‘i lea e mafai ai pea lava e ia ‘ona fa‘aolaina i latou o ē ‘ua fa‘alatalata atu i le Atua e ala ‘iā te ia; auā o lo‘o soifua pea lava o ia e fautua mo i latou.

²⁶ Auā e tatau lava ‘ona ia i tatou se ositaulaga sili fa‘apenā, e pa‘ia, e sao ‘ona lelei, e leai sona leaga, e taumamao ma tagata agasala, e fa‘aeaina fo‘i o ia i luga o lagi.

²⁷ E lē mana‘omia se taulaga mo ni ana agasala, e pei o isi ositaulaga i aso ta‘itasi, e muamua le taulaga mo ana lava agasala, ‘ona osi ai lea o le taulaga mo agasala a le nu‘u; e na o le tasi lava le taulaga na faia e ia ‘ina ‘ua ofoina atu o ia e ia lava.

²⁸ Auā o le tulafono ‘ua tofia ai tagata i lo latou vāivāi e ‘avea ma ositaulaga sili; a o le ‘upu o le tautoga na mulimuli mai i le tulafono ‘ua tofia ai le Alo, o lē ‘ua fa‘a‘ato‘atoaina e fa‘avavau.