Eperu 4 - Samoan Contemporary New Testament

¹ O lenei, manū o lo‘o i ai pea le folafolaga ia ulufale atu i lona mālōlōga, ‘ia tatou fefefe ai ‘ina ne‘i i ai se isi o ‘outou e lē o‘o i ai.

² Auā ‘ua tala‘iina mai ‘iā te i tatou le Tala Lelei e pei fo‘i o i latou; a ‘ua lē aogā le ‘upu na fa‘alogo ai i latou, ‘ona ‘ua le fa‘ataunu‘uina ma le fa‘atuatua i ē na fa‘alogo i ai.

³ Auā tatou te sao atu i le mālōlōga, o i tatou o ē ‘ua fa‘atuatua, pei ‘ona fetalai mai o ia, “Pei ‘ona ‘ou tautō i lo‘u ita, ‘E lē sao atu lava i latou i lo‘u mālōlōga.’ ” O le mālōlōga lava lea i le galuega na faia ‘ina ‘ua uma ‘ona fa‘avaeina le lalolagi.

⁴ Auā ‘ua fai mai o ia i le ‘upu e uiga i le aso fitu, “Na mālōlō fo‘i le Atua i le aso fitu i ana galuega uma.”

⁵ ‘Ua toe fai mai fo‘i le ‘upu lenei, “E lē sao atu lava i latou i lo‘u mālōlōga.”

⁶ O lenei, ‘ua tu‘uina mai pea lava ‘ina ‘ia sao atu i ai isi, auā ‘ua lē sao i ai ē na mua‘i tala‘iina i ai le Tala Lelei, ‘ona o le fa‘alogogatā.

⁷ ‘Ona toe tu‘u mai ai lea o le isi aso, e pei ‘ona ta‘u mai ‘iā Tavita, “O le aso nei,” ‘ina ‘ua mavae tausaga e tele, pei ‘ona fetalai mai, “O le aso nei ‘āfai tou te fa‘alogo ai i lona si‘ufofoga, ‘aua tou te fa‘ama‘a‘a i o ‘outou loto.”

⁸ Auā ana fa‘ao‘o i latou e Iosua i le mālōlōga, po ‘ua lē toe ta‘uina mai e le Atua se isi aso.

⁹ O le mea lea ‘ua tu‘uina mai ai pea lava le mālōlōga o le Sapati mo tagata o le Atua.

¹⁰ Auā o lē ‘ua sao atu i lona mālōlōga, ‘ua mālōlō fo‘i o ia i ana lava galuega, fa‘apei o le Atua i ana lava galuega.

¹¹ O lenei, ‘ia tatou tauivi ‘ina ‘ia tatou sao atu i lenā mālōlōga, ne‘i i ai se isi e pa‘ū ‘ona o lona fa‘aa‘oa‘o i le fa‘alogogatā o isi tagata.

¹² Auā o lo‘o ola le afioga a le Atua, o lo‘o matuā galue fo‘i, o lo‘o sili fo‘i lona ma‘ai i pelu uma e fa‘atau ma‘ai itū; o lo‘o vaevae ai fo‘i e o‘o lava i le vavae‘eseina o le loto ma le agaga, ‘atoa fo‘i ma so‘oga o le tino ma ‘a‘ano o ivi, o lo‘o fa‘amasinoina fo‘i manatu ma filifiliga o le loto.

¹³ E leai fo‘i se mea e tasi na faia e lilo i ona luma peita‘i e ta‘atia fua ma manino mea uma lava i lana silifaga; tatou te ta‘uina atu fo‘i ‘iā te ia a tatou amio.

O Iesu le Ositaulaga Silisili

¹⁴ O lenei, ‘ua ia i tatou le ositaulaga silisili, ‘ua afio atu i le lagi, o Iesu le Alo o le Atua; o lea ‘ia tatou tāofi mau ai tatou ta‘utinoga.

¹⁵ Auā e lē o ‘iā i tatou se ositaulaga sili o lē na te lē mafaia ‘ona tigā alofa fa‘atasi ma i tatou, i mea tatou te vāivāi ai; peita‘i o ia lava o lē sa fa‘aosoosoina i mea uma e pei o i tatou fo‘i, a ‘ua leai lava se agasala ‘iā te ia.

¹⁶ O le mea lea ‘ia tatou fa‘alatalata atu ai ma le lototele i le nofoāli‘i o le alofa tunoa, ‘ina ‘ia alofagia ai i tatou, ma ‘ia maua ai fo‘i le alofa tunoa e fesoasoani mai i aso e tatau ai.