Eperu 3 - Samoan Contemporary New Testament

E Sili Iesu i lo Mose

¹ O lenei, le au uso pa‘ia e, o ē ‘ua aofia i le vala‘au mai le lagi, ‘ia ‘outou mafaufau i le ‘aposetolo ma le ositaulaga sili o lo‘o tatou folafolaina atu, o Iesu lea.

² Na fa‘amaoni o ia i lē na tofia o ia, pei fo‘i o Mose sa fa‘amaoni i le ‘āiga o le Atua.

³ Auā e ta‘uaogāina Iesu i le mamalu e sili atu i lo Mose, e pei lava ‘ona sili le vi‘iga o lē e saunia le fale i lo le fale.

⁴ Auā e tofu fale ta‘itasi ma le tagata na faia; a o le Atua na faia mea uma lava.

⁵ Sa fa‘amaoni lava Mose i lona ‘au‘auna atu i le ‘āiga uma o le Atua, ‘ina ‘ia molimau o ia i mea o le a tala‘iina mai;

⁶ peita‘i o Keriso, o ia o le Alo e pule i lona lava ‘āiga o lona ‘āiga i tatou pe ‘āfai tatou te tāofi mau i le lototele, ma le mitamita i le fa‘amoemoe.

O le Mālōlōga mo Tagata o le Atua

⁷ O le mea lea, e pei ‘ona fetalai mai le Agaga Pa‘ia, “O le aso nei ‘āfai tou te fa‘alogo ai i lona si‘ufofoga,

⁸ ‘aua tou te fa‘ama‘a‘a i o ‘outou loto, e pei o le fouvalega i le aso o le tofotofoga i le vao.

⁹ Sa tofotofo mai ai e o ‘outou tamā ‘iā te a‘u, ma sa va‘aia ai e i latou a‘u galuega i tausaga e fasefulu.

¹⁰ O le mea lea na ‘ou ‘ino‘ino ai i lenā tupulaga, ma ‘ou fai ane, ‘ ‘Ua sesē i latou i o latou loto e lē aunoa, ‘ua lē iloa e i latou o‘u ala.’

¹¹ ‘Ona ‘ou tautō ai lea i lo‘u ita, ‘E lē sao atu lava i latou i lo‘u mālōlōga.’ ”

¹² Uso e, ‘ia ‘outou fa‘aeteete ‘ina ne‘i i ai i se isi o ‘outou e lotoleaga ma le lē fa‘atuatua, tou te ō ‘ese ai mai le Atua soifua.

¹³ A ‘ia ‘outou fefa‘amafanafanaa‘i i lea aso ma lea aso, manū o tatou i ai i le “aso nei”, ‘ina ne‘i loto ma‘a‘a se isi o ‘outou i le pepelo o le agasala.

¹⁴ Auā e mafuta fa‘atasi i tatou ma Keriso, pe ‘āfai tatou te tāofi mau i lo tatou ulua‘i fa‘atuatua e o‘o lava i le gata‘aga,

¹⁵ manū o lo‘o fai mai, “O le aso nei ‘āfai tou te fa‘alogo ai i lona si‘ufofoga, ‘aua tou te fa‘ama‘a‘a i o ‘outou loto, pei ‘ona faia i le finauga.”

¹⁶ Auā o ai ‘ea ē ‘ua fa‘alogo ‘ae tete‘e atu? E lē o i latou uma ‘ea ē na o a‘e nai Aikupito na ta‘ita‘iina e Mose?

¹⁷ O ai fo‘i i latou sa ‘ino‘ino i ai o ia i tausaga e fasefulu? E lē o i latou ‘ea na agasala, sa oti o latou tino i le vao?

¹⁸ O ai fo‘i i latou na tautō ai o ia, e lē sao atu i lona mālōlōga? E lē o i latou ‘ea na fa‘alogogatā?

¹⁹ O lenei, ‘ua tatou iloa na lē mafai ‘ona sao atu i ai i latou ‘ona o le lē fa‘atuatua.