Eperu 13 - Samoan Contemporary New Testament

E Fa‘apefea ‘Ona fa‘amalie le Atua

¹ ‘Ia tumau le fealofani o le ‘au uso.

² ‘Aua le galo le alofa i le tagata ‘ese; auā o le ala lea na talia ai e nisi o agelu ma le lē iloa.

³ ‘Ia ‘outou manatua ē ‘ua noanoatia, e peiseaī ‘ua noanoatia ‘outou fa‘atasi ma i latou; ia manatua fo‘i ē ‘ua agaleagaina, auā o lo‘o i le tino fo‘i ‘outou.

⁴ ‘Ia fa‘amamaluina le fa‘aipoipoga e tagata uma, ia leai se mea e leaga ai le moega o le ulugali‘i; auā e fa‘amasinoina e le Atua i latou o ē e faita‘aga, ma ē e mulilulua.

⁵ ‘Ia aunoa o ‘outou olaga ma le tu‘inanau i tupe, ma ‘ia ‘outou loto malilie i mea ‘ua ‘outou maua; auā ‘ua fetalai mai o ia, “ ‘Ou te lē tu‘ua lava oe, ‘ou te lē tu‘ulafoa‘iina oe.”

⁶ O le mea lea tatou te mafaia ai ‘ona fai atu ma le lototele, “O le Ali‘i o lo‘u fesoasoani o ia, ‘ou te lē fefe lava i se mea e faia e tagata ‘iā te a‘u.”

⁷ ‘Ia ‘outou manatua o ‘outou ta‘ita‘i, o ē ‘ua folafolaina atu le afioga a le Atua ‘iā te ‘outou; ‘ia ‘outou fa‘aa‘oa‘o i lo latou fa‘atuatua, ma ‘ia mafaufau i le taunu‘uga o a latou amio.

⁸ O Iesu Keriso e lē liu lava o ia, o ananafi, ma le asō, e o‘o lava i le fa‘avavau.

⁹ ‘Aua le fe‘avea‘iina ‘outou i a‘oa‘oga ‘ese ma uiga ‘ese‘ese; auā e lelei ‘ona fa‘atumauina o le loto i le alofa tunoa, e lē o mea e ‘ai, ‘ua leai se aogā i ē o lo‘o tāofi i ai.

¹⁰ ‘Ua ia i tatou le fatafaitaulaga, e lē tatau ‘ona ‘a‘ai i mea o i ai ē o lo‘o ‘au‘auna i le fale fetāfa‘i.

¹¹ Auā o manu ia, ‘ua ‘ave o latou toto i le mea pa‘ia e le ositaulaga sili e fai ma taulaga mo agasala, ‘ua susunu o latou tino i tua o le to‘agalauapi.

¹² O lea na puapuagātia ai Iesu i tua o le faitoto‘a o le ‘a‘ai, ‘ina ‘ia fa‘apa‘iaina ai e ia le nu‘u i lona lava toto.

¹³ O le mea lea, ‘ia tatou ō atu ai ‘iā te ia i tua o le to‘agalauapi, ma ‘ia tatou ‘onosa‘i i le ‘upu fāifāi ‘ua fāifāiina ai o ia;

¹⁴ auā e leai so tatou ‘a‘ai tumau ‘i‘inei, a ‘ua tatou sā‘ili i le ‘a‘ai o le a o‘o mai.

¹⁵ O lenei, o ia tatou te avatu so‘o ai le taulaga o le vi‘iga i le Atua, o le fua lea o tatou laugutu, o lo‘o fa‘afetai atu i lona suafa.

¹⁶ ‘Aua le galo ‘iā te ‘outou ‘ona agalelei ma alolofa atu; auā o taulaga fa‘apenā e fiafia ai le Atua.

¹⁷ ‘Ia ‘outou usiusita‘i i o ‘outou ta‘ita‘i ma ‘outou gaua‘i i ai; auā o lo‘o leoleo i latou mo o ‘outou agaga, e ta‘u atu i ai e i latou le tala, ‘ina ‘ia faia ma le ‘oli‘oli ‘ae ‘aua le faia ma le tigā, auā e lē aogā lea mea ‘iā te ‘outou.

¹⁸ ‘Ia ‘outou tatalo mo i matou; auā o lo‘o matou tāofi ‘ua ia i matou le loto fuatiaifo lelei, matou te loto fo‘i e amio lelei i mea uma lava.

¹⁹ ‘Ua atili ai ‘ona ‘ou ‘ai‘oi atu ‘iā te ‘outou e fai lenā mea, ‘ina ‘ia vave ‘ona toe tu‘uina atu ai o a‘u ‘iā te ‘outou.

O le Tatalo Fa‘ai‘u

²⁰ A o le Atua e ona le manuia, o lē na toe fa‘atūina mai nai ē ‘ua oti le leoleo mamoe sili, o lo tatou Ali‘i o Iesu, ‘ona o le toto o le feagaiga e fa‘avavau.

²¹ Ia fa‘a‘ato‘atoaina ‘outou e ia i galuega lelei uma lava, ‘ina ‘ia ‘outou faia lona finagalo, ia galuea‘iina e ia i totonu ‘iā te ‘outou le mea e mālie i ona luma, ‘ona o Iesu Keriso; ia ‘iā te ia le vi‘iga e fa‘avavau fa‘avavau lava. Amene.

O Toe ‘Upu

²² Uso e, ‘ou te ‘ai‘oi atu ‘iā te ‘outou, ‘ia ‘outou talia lenei ‘upu apoapoa‘i; auā fo‘i ‘ua ‘ou tusi fa‘apu‘upu‘u atu ‘iā te ‘outou.

²³ ‘Ia ‘outou iloa ‘ua tu‘uina atu lo tatou uso o Timoteo, ‘āfai e vave sau o ia, ma te asiasi atu ‘iā te ‘outou fa‘atasi ma ia.

²⁴ ‘Ou te alofa atu i o ‘outou ta‘ita‘i uma, ‘atoa ma le ‘au pa‘ia uma lava. O lo‘o alolofa atu i latou o i Italia ‘iā te ‘outou.

²⁵ ‘Ia ‘iā te ‘outou uma le alofa tunoa o le Atua. Amene.