Eperu 12 - Samoan Contemporary New Testament

O le Atua lo Tatou Tamā

¹ O lenei, o i tatou o ē o lo‘o si‘omia e le fa‘apotopotoga tele o tagata molimau, ‘ia tatou tu‘u‘eseina mea mamafa uma, ‘atoa ma le agasala o lo‘o pipi‘i mai, a ‘ia tatou taufetuli ma le ‘onosa‘i i le tausiniōga ‘ua feagai ma i tatou.

² Ma ‘ia va‘ava‘ai atu ‘iā Iesu, lē na te ta‘ita‘iina, ma o ia fo‘i e fa‘a‘ato‘atoaina lo tatou fa‘atuatua. O lē na ‘onosa‘i i le satauro, na fa‘atauva‘a ‘iā te ia le ma ‘ona o le ‘oli‘oli sa i ona luma; ‘ua nofo fo‘i o ia i le itū taumatau o le nofoāli‘i o le Atua.

³ ‘Ia ‘outou manatu i lē na ‘onosa‘i i le fa‘atū‘i‘ese mai o tagata agasala ‘iā te ia, ‘ina ‘ia lē fa‘avaivai o ‘outou loto ma ‘outou lē lavātia.

⁴ E o‘o mai lava i aso nei, tou te le‘i fa‘amasa‘aina le toto a o ‘outou tete‘e atu i le agasala.

⁵ ‘Ua galo ‘ea ‘iā te ‘outou le apoapoa‘iga na tu‘uina atu ‘iā te ‘outou e pei ‘ona tu‘uina atu i le fānau? “Lo‘u atali‘i e, ‘aua le fa‘atauva‘a i lou manatu le a‘oa‘iga a le Ali‘i; ‘aua fo‘i le fa‘avaivai pe a a‘oa‘iina oe e ia.

⁶ Auā o lē ‘ua alofagia e le Ali‘i, ‘ua a‘oa‘i atu o ia ‘iā te ia; ‘ua sasaina fo‘i e ia atali‘i uma ‘ua talia e ia.”

⁷ E tatau lava ‘ona ‘outou ‘onosa‘i i le a‘oa‘iga. O lo‘o tausia ‘outou e le Atua e pei ‘ona tausia e ia atali‘i; auā o ai se atali‘i e alofa i ai lona tamā ‘ae lē a‘oa‘iina?

⁸ ‘Ae ‘āfai e aunoa ‘outou ma le a‘oa‘iga ‘ua tofusia ai le fānau uma lava, o lona uiga, o ‘outou o fānau fa‘apouliuli ‘ae lē o ni atali‘i.

⁹ Auā fo‘i sa i ai o tatou tamā fa‘aletino o ē na a‘oa‘iina i tatou, ma sa tatou usiusita‘i i ai; e lē sili ‘ea ‘ona tatou usita‘i i le Tamā o tatou agaga tatou te ola ai?

¹⁰ Auā o i latou na a‘oa‘i mai ia i tatou i nai aso itiiti i lo latou faitalia; peita‘i, o ia ‘ua a‘oa‘i mai ia i tatou ‘ina ‘ia lelei ai i tatou, ma ‘ia tatou ‘auai i lana amio lelei.

¹¹ O a‘oa‘iga fo‘i pe a tu‘uina mai, e lē manatu i ai o se mea e ‘oli‘oli ai, a o le mea e fa‘anoanoa ai; ‘ae mulimuli ane e fua mai ai le fua o le amiotonu e manuia ai ē ‘ua a‘oa‘iina ai.

O Apoapoa‘iga ma Lapata‘iga

¹² O le mea lea ‘ia ‘outou fa‘amalosi ai i lima ‘ua gagase ma tulivae ‘ua vāivāi;

¹³ i le ma lea, ‘ia ‘outou faia ala lelei mo ‘outou vae, ‘ina ne‘i mapeva le vae ‘ua pipili, ‘ae lelei ‘ona fa‘amālōlōina.

¹⁴ ‘Ia ‘outou tausisi i le filemū ma tagata uma lava, i le ma le amio lelei; a aunoa ma lea uiga, e leai se isi na te iloa atu le Ali‘i.

¹⁵ ‘Ia ‘outou fa‘aeteete; ‘ina ne‘i i ai se isi na te lē maua le alofa tunoa o le Atua; ‘ina ne‘i i ai se a‘a ‘o‘ona e tupu a‘e e fa‘atupu ai fa‘alavelave ‘iā te ‘outou, ma leaga ai nisi e to‘atele;

¹⁶ ne‘i i ai se faita‘aga, po‘o se fa‘atalalē i mea pa‘ia, e pei o Esau, lē na tu‘uina atu lona tofi ulumatua e fa‘atau a‘i le ‘ai e tasi.

¹⁷ Auā ‘ua ‘outou iloa, e mulimuli ane, ‘ina ‘ua mana‘o o ia ‘ia maua le fa‘amanuiaga, ‘ua te‘ena e ia; auā e ui lava ‘ina ‘ai‘oi o ia ma loimata, e le‘i maua e ia se mea e liliu ai le loto o lona tamā.

¹⁸ Auā ‘ua ‘outou lē o‘o mai i le mea e mafai ‘ona pa‘i i ai, ma le afi mumū, ma ao uliuli ma le pogisā, ma le afā,

¹⁹ ma le ta‘alili o le pū, ma le si‘ufofoga ‘ua fetalai mai, ‘ua ‘ai‘oi atu ai fo‘i ē na fa‘alogo ai, ‘ina ‘ia lē toe fa‘aopoopoina i ai se isi ‘upu.

²⁰ Auā na lē lavātia e i latou le mea na poloa‘i mai ai: “ ‘Āfai fo‘i o se manu e papa‘i atu i le mauga e fetogiina i ma‘a.”

²¹ Na fa‘apea fo‘i ‘ona mata‘utia le mea na iloa, na fai mai ai Mose, “ ‘Ou te fefe lava ma ‘ou gatete.”

²² A ‘ua ‘outou o‘o i le mauga o Siona ma le ‘a‘ai o le Atua soifua, o Ierusalema fa‘alelagi, ma agelu e matuā to‘atele i le fa‘atasiga fiafia,

²³ ma le fa‘apotopotoga o le ‘au ulumatua. O ē ‘ua tusia i le lagi, ma le Atua o le fa‘amasino aoao, ma agaga o ē ‘ua amiotonu ‘ua fa‘a‘ato‘atoaina,

²⁴ ma Iesu le puluvaga o le feagaiga fou, ma le toto e sausau ai, o lo‘o tala mai i mea e sili ‘ona lelei i lo le toto o Apelu.

²⁵ ‘Ia ‘outou fa‘aeteete ‘ina ne‘i ‘outou liliu ‘ese mai lē o lo‘o fetalai mai. Auā ‘āfai na lē sao i latou o ē na liliu ‘ese mai lē na fetalai i le lalolagi, e matuā lē sao lava i tatou pe a liliu ‘ese mai lē o lo‘o fetalai mai le lagi.

²⁶ O lona si‘ufofoga na lūlūina ai le lalolagi i ia aso, a ‘ua folafola mai nei e ia, fai mai, “E toe tasi le lūlūga ‘ou te lūlūina ai e lē gata i le lalolagi, ‘ae fa‘apea fo‘i ma le lagi.”

²⁷ O le ‘upu fo‘i lenei, “E toe tasi,” ‘ua fa‘ailoa mai ai le ‘ave‘esega o mea e mafai ‘ona lūlūina, e pei o mea ‘ua faia, ‘ina ‘ia tumau pea mea e lē mafai ‘ona lūlūina.

²⁸ O lenei, ‘ua tatou maua le mālō e lē mafai ‘ona lūlūina, e ao ‘ona tatou fa‘afetai ai, tatou te ‘au‘auna ai ma le migao ma le mata‘u i le Atua.

²⁹ Auā o lo tatou Atua o le afi mumū ‘a‘asa o ia.