Eperu 10 - Samoan Contemporary New Testament

E Tasi Lava le Taulaga ‘ua Lelei ‘Ato‘atoa

¹ Auā o le tulafono o lo‘o i ai le ata o mea lelei o le a o‘o mai, ‘ae lē matuā tutusa ia mea; e lē mafaia i taulaga o lo‘o avatu so‘o i lea tausaga ma lea tausaga ‘ona fa‘a‘ato‘atoaina ē o lo‘o fa‘alatalata i ai.

² ‘Ana mafaia po ‘ua lē toe faia ia taulaga; auā ‘ua uma ‘ona fa‘amamāina ē na ‘au‘auna ai, po ‘ua lē toe iloa agasala e i latou i le loto fuatiaifo.

³ Peita‘i o ia taulaga na fa‘amanatu ai agasala i lea tausaga ma lea tausaga,

⁴ auā e lē mafai ‘ona ‘ave‘esea agasala i le toto o povi po‘a ma ‘oti.

⁵ O le mea lea ‘ua fetalai mai ai o ia i lona maliu mai i le lalolagi, “O manu fasia ‘atoa ma taulaga ‘ua e lē finagalo i ai, a ‘ua e saunia le tino mo a‘u.

⁶ O taulaga mū ma taulaga mo agasala ‘ua e lē fiafia i ai,

⁷ ‘ona ‘ou fai ane lea, Le Atua e, silasila mai ia, ‘ou te alu atu e fai lou finagalo, pei ‘ona tusia ‘iā te a‘u i le tusi ta‘ai.”

⁸ ‘Ua muamua ‘ona fetalai mai, “O manu fasia, o taulaga fo‘i, ma taulaga mū, ma taulaga mo agasala ‘ua e lē finagalo i ai, ma e lē fiafia i ai” (o mea ia ‘ua faia e tusa ma le tulafono),

⁹ ‘ona toe fetalai mai lea, “Le Atua e, silasila mai ia, ‘ou te alu atu e fai lou finagalo.” ‘Ua ‘ave‘esea ai e ia le mea na muamua, ‘ina ‘ia fa‘atumauina lona lua.

¹⁰ O le finagalo lea ‘ua fa‘apa‘iaina ai i tatou i le taulaga i le tino o Iesu Keriso, na o le tasi le ofoina atu.

¹¹ ‘Ua tutū fo‘i ositaulaga uma, ‘ua ‘au‘auna i lea aso ma lea aso, ma avatu so‘o taulaga e lē mafai ‘ona ‘ave‘esea ai agasala.

¹² Peita‘i o Keriso ‘ua na avatua le taulaga e na o le tasi, a ‘ua lava mo augā tupulaga uma, mo agasala, ‘ona nofo lea o ia i le itū taumatau o le Atua e fa‘avavau,

¹³ o lo‘o fa‘atalitali atu ai pea, se‘ia o‘o ‘ina ‘avea i latou o ē e fai o ia ma o latou fili ma mea e tu ai ona ‘a‘ao.

¹⁴ Auā o le taulaga e tasi ‘ua fa‘a‘ato‘atoaina ai e ia e fa‘avavau o ē ‘ua fa‘apa‘iaina.

¹⁵ O lo‘o molimau mai ai fo‘i le Agaga Pa‘ia ‘iā i tatou; auā ‘ua uma ‘ona mua‘i fetalai mai o ia,

¹⁶ “O le feagaiga lava lenei ‘ou te osia ma i latou pe a mavae atu ia aso, o lo‘o fetalai mai ai le Ali‘i, ‘ou te tu‘uina atu a‘u tulafono i o latou loto, ma ‘ou tusia i o latou mafaufau.”

¹⁷ ‘Ona toe fetalai mai ai lea, “O a latou agasala fo‘i ma o latou solitulafono ‘ou te lē toe manatua lava.”

¹⁸ O lenei, o le mea o i ai le fa‘amāgaloina o ia mea, ‘ua lē toe i ai se taulaga mo le agasala.

‘Ia Tatou Fa‘alatalata atu i le Atua

¹⁹ O lenei, uso e, ‘ua tatou sa‘oloto e ulu atu i le mea e sili ‘ona pa‘ia ‘ona o le toto o Iesu,

²⁰ i le ala fou e ola ai, ‘ua fa‘aavanoaina e ia mo i tatou i le ‘ie puipui, o lona lava tino lea,

²¹ ma ‘ona ‘ua ia i tatou le ositaulaga sili e pule i le fale o le Atua.

²² Inā tatou fa‘alatalata atu ia ma le loto fa‘amaoni i le fa‘atuatua ‘ua mautinoa lava, ‘ua sausauina o tatou loto nai le manatu ifo ‘ua leaga, ma ‘ua fa‘atā‘e‘eleina fo‘i o tatou tino i le vai manino.

²³ Inā tatou tāofi mau ia i le fa‘amoemoe ‘ua tatou ta‘utino atu e aunoa ma le fefo‘ifo‘ia‘i, auā e fa‘amaoni lē na folafolaina mai.

²⁴ ‘Ia tatou manatunatu fo‘i o le isi i le isi, ‘ina ‘ia tau fa‘atupu ai le alofa ma galuega lelei.

²⁵ ‘Aua le lafoa‘iina le fa‘apotopotoina o i tatou, pei o le masani a nisi, a ‘ia ‘outou fefa‘amafanafanaa‘i, ia atili ai fo‘i ‘ona ‘outou faia fa‘apea ‘ina ‘ua ‘outou iloa ‘ua lata mai le Aso.

²⁶ Auā ‘āfai tatou te agasala ma le loto i ai, a ‘ua uma ‘ona tatou talia le malamalama o le ‘upu moni, ‘ua lē toe lava se taulaga mo agasala,

²⁷ na ‘ona fa‘atali ma le mata‘u tele i le fa‘amasinoga ma le to‘asā e mumū, e susunu ai ē o tete‘e atu.

²⁸ O lē na fa‘alēaogāina le tulafono a Mose, na oti o ia i le molimau a le to‘alua po o le to‘atolu, ‘ua lē alofagia.

²⁹ O le ā se fa‘asalaga mamafa ‘ua ‘outou manatu ‘ua talafeagai ma le tagata ‘ua na soli le Alo o le Atua, ma ‘ua ta‘ulēaogāina fo‘i e ia le toto o le feagaiga na fa‘apa‘iaina ai o ia, ma ‘ua ‘upuleaga i le Agaga o le Alofa tunoa?

³⁰ Auā ‘ua tatou iloa lē na fetalai mai, “O ‘iā te a‘u le taui ma sui, ‘ou te taui atu.” I le ma lea, “E fa‘amasino e le Ali‘i lona lava nu‘u.”

³¹ O le mea e mata‘u tele ai pe ‘āfai e pa‘ū se isi i ‘a‘ao o le Atua soifua.

³² A ‘ia ‘outou toe manatu i aso anamua, ‘ina o fa‘amalamalamaina ‘outou, na ‘outou ‘onosa‘i ai i le tauiviga tele ma puapuagā;

³³ ‘ina ‘ua faia ‘outou ma mata‘aga i ‘upu fāifāi ma puapuagā, tasi lea mea; i le ma lenei, ‘ina ‘ua fa‘atasia ‘outou ma ē ‘ua fa‘apea.

³⁴ Auā na ‘outou alolofa mai i ē ‘ua noanoatia, ma ‘outou ‘onosa‘i i le vetega o a ‘outou ‘oloa ma le ‘oli‘oli, ‘ina ‘ua ‘outou iloa ‘ua ‘iā te ‘outou le ‘oloa e sili ‘ona lelei ma le tumau.

³⁵ O le mea lea, ia ‘aua ai ne‘i ‘outou lafoa‘iina le lototele, auā ‘ua i ai le taui tele.

³⁶ Auā ‘ua aogā ‘iā te ‘outou le ‘onosa‘i, ‘ina ‘ia ‘outou maua le mea na folafolaina, pe a uma ‘ona ‘outou faia le finagalo o le Atua.

³⁷ “Auā e toeitiiti lava, ‘ona o‘o mai ai lea o lē e maliu mai, e lē tuai mai o ia.

³⁸ ‘Ae ola le tagata amiotonu i le fa‘atuatua; i le ma lea, a tu‘umuli, e le fiafia lava lo‘u loto ‘iā te ia.”

³⁹ A o i tatou, e lē o ni tagata e tu‘umuli i le malaia, a o ē e fa‘atuatua e ola ai le agaga.