Eperu 1 - Samoan Contemporary New Testament

O le ‘Upu a le Atua e ala i Lona Alo

¹ E tele auala ‘ese‘ese na fetalai mai ai le Atua i o tatou tamā anamua e ala i perofeta;

² a ‘ua fetalai mai ‘iā te i tatou i nei aso e gata ai e ala mai i le Alo, o lē ‘ua tofia e ia e fai ma ona tofi mea uma lava, na faia fo‘i e le Atua mea uma lava e ala ‘iā te ia.

³ ‘Ua atagia mai ‘iā te ia le mamalu o le Atua, ma ‘ua tutusa lelei o ia ma le Atua; o lo‘o fa‘atumauina e ia mea uma lava i lana afioga mana, na fa‘amamāina e ia lava a tatou agasala; ‘ona nofo ai lea o ia i le itū taumatau o le Silisili‘ese o lo‘o i lugā.

O Le Silisili ‘ese o le Alo le Atua

⁴ ‘Ua fa‘apea ‘ona silisili o ia i agelu, e pei ‘ona sili o lona suafa ‘ua maua i lo o latou.

⁵ Auā, o anafea ‘ea na fetalai atu ai o ia i se isi o le ‘au agelu, “O lo‘u Atali‘i oe, ‘ua ‘ou fānaua oe i le aso nei”? Pe fai atu fo‘i, “E ‘avea a‘u ma ona Tamā, e ‘avea fo‘i o ia ma o‘u Atali‘i”?

⁶ ‘Ua toe fetalai mai fo‘i o ia ‘ina ‘ua toe ‘aumaia e ia lana ulumatua i le lalolagi, “ ‘Ia ifo agelu uma lava a le Atua ‘iā te ia.”

⁷ ‘Ua fetalai mai fo‘i o ia e uiga i agelu, “ ‘Ua ‘avea e ia ana agelu e fai ma matagi, ma ana ‘au‘auna e fai ma afi mumū.”

⁸ ‘Ua fetalai mai fo‘i e uiga i le Alo, “Le Atua e, o lou nofoāli‘i e fa‘avavau fa‘avavau lava lea; o le to‘oto‘o o lou mālō, o le to‘oto‘o o le amiotonu lea.

⁹ ‘Ua e fiafia i le amiotonu, a ‘ua e ‘ino‘ino i le amioleaga. O le mea lea ‘ua fa‘au‘uina ai oe e le Atua, o lou lava Atua i le suāu‘u o le ‘oli‘oli e sili i ē ‘ua ‘outou fa‘atasi.”

¹⁰ I le ma lea fo‘i, “Le Ali‘i e, na e fa‘avaeina le lalolagi i le amataga, o lagi fo‘i o galuega ia a ou ‘a‘ao.

¹¹ E i‘u ‘ina fa‘aumatia ia mea, a o oe ‘e te tumau pea lava; e i‘u ‘ina pala ia mea uma lava e pei o se ‘ofu.

¹² Pei o se ‘ie pulupulu ‘e te ta‘ata‘aia, e liua ia; a o oe ‘e te lē liliu lava, e leai fo‘i se i‘uga o ou tausaga.”

¹³ A o anafea na fetalai atu ai o ia i se isi o le au agelu, “Inā nofo ia oe i lo‘u itū taumatau, se‘ia ‘ou ‘avea ē e fai oe ma o latou fili ma mea e tu ai ou vae”?

¹⁴ E lē o agaga e ‘au‘auna ‘ea i latou uma, ‘ua ‘auina e ‘au‘auna ‘ona o i latou o ē o le a maua le fa‘aolataga?