Efeso 6 - Samoan Contemporary New Testament

O le Fānau ma Mātua

¹ O ‘outou le fānau, ia usiusita‘i i o ‘outou mātua i le Ali‘i, auā o le mea tonu lava lea e ao ‘ona fai.

² ‘Ia e āva i lou tamā ma lou tinā (o le tulafono muamua lea ‘ua i ai le mea ‘ua folafolaina),

³ ‘ina ‘ia manuia ai oe ma ia e ola umi ai i le lau‘ele‘ele.

⁴ O ‘outou tamā fo‘i, ‘aua ne‘i fa‘atigā ia ‘outou fānau, a ‘ia tausia i latou e tusa ma a‘oa‘iga ma a‘oa‘oga a le Ali‘i.

O Pologa ma o Latou Matai

⁵ O ‘outou pologa, ia usiusita‘i i o ‘outou matai i la le tino, ma le mata‘u ma le gatete, i le fa‘amaoni o ‘outou loto fa‘apei ‘ona ‘outou ‘au‘auna ‘iā Keriso.

⁶ ‘Aua ne‘i ‘au‘auna i le va‘aiga o mata, fa‘apei o i latou o lo‘o manana‘o e fa‘afiafia i tagata; a ‘ia fa‘apei o ‘au‘auna a Keriso, ‘ia faia le finagalo o le Atua ma le loto ‘atoa,

⁷ ma le fiafia, fa‘apei o lo‘o ‘au‘auna atu i le Ali‘i ‘ae lē o tagata.

⁸ ‘Ia ‘outou iloa o lē na te faia se mea lelei, e toe maua lea e ia mai le Ali‘i, po o se pologa po o se sa‘oloto.

⁹ O ‘outou matai fo‘i, ‘ia ‘outou faia ia lava mea ‘iā te i latou. ‘Ia tāofia le fa‘amata‘uina o i latou, ‘ia ‘outou iloa o lo‘o i le lagi le Matai o i latou ma ‘outou, e lē fa‘ailogaina fo‘i tagata e ia.

O le Tau‘a e Tete‘e atu i le Leaga

¹⁰ O le toe ‘upu, ‘ia ‘outou lototetele i le Ali‘i ma le malosi o lona mana.

¹¹ ‘Ia ‘outou ‘o‘ofu i ‘ofutau mai le Atua, ‘ina ‘ia ‘outou mafaia ‘ona tete‘e atu i togafiti a le tiapolo.

¹² Auā tatou te lē tau ma tagata, a o ali‘i sili ma faipule ma ali‘i o le pouliuli o lenei lalolagi, ‘atoa fo‘i ma agaga leaga o i le lagi.

¹³ O le mea lea, ‘ia ‘outou tago i ‘ofutau ‘ato‘atoa mai le Atua, ‘ina ‘ia ‘outou mafaia ‘ona tete‘e atu pe a o‘o i le aso leaga, pe a uma ‘ona ‘outou faia o na mea uma, ‘ona ‘outou tūtūmau ai lea.

¹⁴ O le mea lea ‘ia tumau ‘outou, ‘ia fusia o ‘outou sulugātiti i le fa‘amaoni, ma ‘ia ‘avea le amiotonu ma o ‘outou ufifatafata,

¹⁵ ma ‘ia fa‘ase‘evaeina o ‘outou vae i le nofo sauni e folafola le Tala Lelei o le filemū.

¹⁶ A ‘ia sili lava i mea uma ‘ona ‘avea le fa‘atuatua ma talitā, o le a mafai ai e ‘outou ‘ona tineia ū fanafana mumū uma lava a lē o lo‘o leaga.

¹⁷ ‘Ia ‘outou ‘avea le puloutau o le fa‘aolataga, ma le pelu o le Agaga, o le afioga lea a le Atua.

¹⁸ ‘Ia ‘outou tatalo e lē aunoa ma ōle atu i le fesoasoani mai le Atua, ma ‘ia tatalo fo‘i i le mana o le Agaga. ‘Ia mataala i mea uma, ma ‘ia tausisi i le tatalo mo tagata pa‘ia uma lava.

¹⁹ ‘Ia tatalo fo‘i mo a‘u, ‘ina ‘ia tu‘uina mai le ‘upu ‘iā te a‘u, ia ‘ou fa‘amalosi ai e fa‘ailoa atu le mea lilo o le Tala Lelei,

²⁰ o le ‘upu lava lea ‘ua noanoatia ai a‘u le sāvali; ‘ina ‘ia ‘ou fa‘amalosi ai e tautala e pei ‘ona tatau ‘ona ‘ou tautala atu.

O Toe Alofa‘aga

²¹ O Tuiko, o le uso pele o ia ma le ‘au‘auna fa‘amaoni i le Ali‘i, o le a fa‘ailoa atu e ia ‘iā te ‘outou mea uma, ‘ina ‘ia iloa ai e ‘outou mea uma lava o ‘iā te a‘u.

²² ‘Ou te ‘auina atu o ia ‘iā te ‘outou, ‘ona o le fa‘amoemoe ‘ia ‘outou iloa ai mea uma ‘iā te i matou, ma fa‘amafanafana i o ‘outou loto.

²³ ‘Ia i le au uso le manuia ma le alofa, fa‘atasi ma le fa‘atuatua mai le Atua le Tamā, ma le Ali‘i o Iesu Keriso.

²⁴ ‘Ia i ai le alofa tunoa ia i latou uma lava o ē e lē uma le alofa i lo tatou Ali‘i o Iesu Keriso.