Efeso 5 - Samoan Contemporary New Testament

Ola i le Malamalama

¹ O le mea lea ‘ia ‘outou fa‘aa‘oa‘o i le Atua e fa‘apei o le fānau pele.

² ‘Ia ‘outou savavali i le alofa fa‘apei o Keriso fo‘i na alofa mai o ia ‘iā te i tatou, ma ‘ua foa‘iina mai o ia lava mo i tatou, o le taulaga i le Atua o le mea manogi lea.

³ A o le faita‘aga ma amioleaga uma lava, po o le manumanu, ‘aua ne‘i ta‘ua ia mea ‘iā te ‘outou, e pei ‘ona tatau i le au pa‘ia.

⁴ E lē tatau fo‘i ‘iā te ‘outou ‘ona tautala mai i ‘upu masoā, ma ‘upu valea, ma ‘upu fa‘aulaula; a o le fa‘afetai e tatau lava lea.

⁵ Auā ‘ia ‘outou iloa lenei mea, e lē fai le Mālō o Keriso ma le Atua ma tofi o ē e faita‘aga, ma ē e amioleaga po o ē e matape‘ape‘a (o le ifo i tupua lava lea).

⁶ ‘Aua ne‘i fa‘asesēina ‘outou e se isi i ‘upu lē aogā, auā o mea ia e o‘o mai ai le to‘asā o le Atua i le fānau a ē e lē usiusita‘i.

⁷ O le mea lea, ‘aua ne‘i fa‘atasi ‘outou ma i latou;

⁸ auā sa pouliuli ‘outou, a o lenei ‘ua ‘outou malamalama i le Ali‘i; inā savavali ia fa‘apei o le fānau a le malamalama.

⁹ Auā o fua o le malamalama o le agalelei, ma le amiotonu, ma le fa‘amaoni;

¹⁰ ia taumafai ‘ona su‘esu‘e ‘outou po o le ā le mea e fiafia i ai le Ali‘i.

¹¹ ‘Aua fo‘i tou te mafuta fa‘atasi ma galuega lē aogā a le pouliuli, ‘ae lelei ‘ona ‘outou ‘aumaia ia mea i le malamalama.

¹² Auā o le tautala atu i mea na faia fa‘alilolilo e i latou, o se mea lea e māasiasi ai.

¹³ O mea uma lava e fa‘aalia e le malamalama, e fa‘aalia ai le mea moni;

¹⁴ auā o se mea ‘ua fa‘amaoni ‘ona fa‘aalia, o le malamalama lea. O le mea lea ‘ua fai mai ai: “Ala ia oe lē o lo‘o moe, tula‘i mai nai ē ‘ua oti, ‘ona susulu atu lea o Keriso ‘iā te oe.”

¹⁵ O le mea lea, ia savavali ma le fa‘autauta, ‘aua ne‘i fa‘apei o ē e vālea a ‘ia fa‘apei o ē e popoto;

¹⁶ ia fa‘aaogāina tatau o ‘outou taimi, auā o aso leaga nei.

¹⁷ O le mea lea, ‘aua ne‘i vālea ‘outou, a ‘ia taumafai ‘ona malamalama i le finagalo o le Atua.

¹⁸ ‘Aua ne‘i ‘onā ‘outou i le uaina, auā na ‘ona fa‘aleagaina ai ‘outou. ‘Ia fa‘atūmuina ‘outou i le Agaga.

¹⁹ ‘Ia fetautalatala‘i ‘outou i salāmo ma pese ma pese fa‘aleagaga, ia pepese ma fai pesega i le Ali‘i i o ‘outou loto.

²⁰ ‘Ia fa‘afetai pea lava pea i le Atua le Tamā i mea uma lava, i le suafa o lo tatou Ali‘i o Iesu Keriso;

²¹ ‘ia ‘outou usiusita‘i, o le tasi i le isi, i le migao ‘iā Keriso.

O le Tane ma le avā

²² O ‘outou avā, ia usiusita‘i ia ‘outou lava tane ia fa‘apei o le Ali‘i,

²³ auā o le tane o le ulu lea o le avā, fa‘apei o Keriso fo‘i o le ulu, ma o le Fa‘aola fo‘i o le ekalesia, o lona tino lea.

²⁴ O le mea lea, fa‘apei ‘ona usiusita‘i o le ekalesia ‘iā Keriso, ia fa‘apea fo‘i ‘ona usiusita‘i avā ‘iā latou lava tane i mea uma lava.

²⁵ O ‘outou tane, ia alolofa ia ‘outou lava avā, fa‘apei o Keriso fo‘i ‘ona alofa i le ekalesia, ma ‘ua foa‘iina mai o ia e ia lava mo le ekalesia.

²⁶ Na faia e ia lenei mea, ‘ina ‘ia mafai ‘ona fa‘amamāina o ia i le fa‘atā‘eleina i le vai ma le fa‘apa‘iaina i le ‘upu,

²⁷ ‘ina ‘ia tu‘uina atu e ia le ekalesia ‘iā te ia lava, i le matagofie e aunoa ma se ila, po o se ma‘anuminumi, po o se isi lava mea fa‘apenā, ‘ina ‘ia pa‘ia ma ‘ia lē ponā o ia.

²⁸ ‘Ia fa‘apea ‘ona alolofa o tane ‘iā latou lava avā, ia latou alolofa atu ‘iā te i latou fa‘apei ‘ona alolofa i latou i o latou lava tino, auā o lē e alofa i lana avā, ‘ua alofa o ia ‘iā te ia lava.

²⁹ Auā e leai se isi e ‘ino‘ino i lona lava tino, peita‘i na te fafaga ma tausia o ia fa‘apei o Keriso fo‘i ‘ona tausia le ekalesia,

³⁰ auā o itūtino lava i tatou o lona tino.

³¹ Fa‘apei ‘ona fai mai o le Tusi, “O le mea lea e tu‘ua ai e le tane lona tamā ma lona tinā, ‘ae fa‘atasi ma lana avā, ‘ona ‘avea ai lea o i lā‘ua ma tino e tasi.”

³² O le mea lilo tāua tele lenei; ‘ou te tautala atu e fa‘atatau ‘iā Keriso ma le ekalesia.

³³ A o ‘outou, ia ta‘ito‘atasi ‘outou ma alofa i lana avā fa‘apei o ia lava, ma ‘ia fa‘aalia atu fo‘i e le avā le fa‘aaloalo i lana tane.