Efeso 4 - Samoan Contemporary New Testament

E Tasi le Tino

¹ O le mea lea, o a‘u o lē ‘ua noanoatia ‘ona o le Ali‘i, ‘ou te ‘ai‘oi atu ‘iā te ‘outou ia tusa la ‘outou amio ma le vala‘au ‘ua vala‘auina ai ‘outou.

² ‘Ia loto maulalo ma agamalū, ma ‘onosa‘i e lē aunoa. ‘Ia fa‘apalepale le isi i le isi i le alofa.

³ ‘Ia taumafai ‘outou e tausi le loto gatasi i le Agaga, i le noataga o le filemū.

⁴ E tasi le tino, e tasi fo‘i le Agaga, e pei lava ‘ona vala‘auina ai ‘outou e le Atua i le fa‘amoemoe e tasi, e tusa ma lo ‘outou vala‘auina.

⁵ E tasi le Ali‘i, e tasi le fa‘atuatuaga, e tasi fo‘i le papatisoga.

⁶ E tasi le Atua o le Tamā o tagata uma lava, o lē o lo‘o galue i mea uma, o lo‘o i ai fo‘i i mea uma lava.

⁷ Peita‘i ‘ua foa‘iina mai le alofa tunoa ‘iā te i tatou ta‘ito‘atasi, e tusa ma le mea ‘ua foa‘iina mai e Keriso.

⁸ O le mea lea ‘ua fai mai ai le Tusi, “ ‘Ina ‘ua afio a‘e o ia i mea maualuluga, na ‘aveina fa‘atagataotau‘a e ia le to‘atele fa‘atasi ma ia; ‘ua foa‘iina atu fo‘i e ia meaalofa i tagata.”

⁹ O le a ‘ea lona uiga o le ‘upu, “Na afio a‘e o ia i mea maualuluga?” O lona uiga, o ia fo‘i lea na afio ifo i mea maualalo o le lalolagi.

¹⁰ O lē na afio ifo, o ia lava lea na afio a‘e i luga o lagi uma, ‘ina ‘ia fa‘atūmuina e ia mea uma lava na faia.

¹¹ O ia lava lea na foa‘iina atu meaalofa i tagata; na tofia e ia nisi e fai ma ‘aposetolo, o isi e fai ma perofeta, o isi e tāla‘i i le Tala Lelei, o isi e fai ma leoleo ma a‘oa‘o.

¹² ‘Ina ‘ia fa‘a‘au‘upegaina ai le au pa‘ia e fai ai e i latou le galuega, ia ati a‘e ai le tino o Keriso.

¹³ Se‘ia o‘o ‘ina maua e i tatou le loto gatasi i le fa‘atuatua ma le iloa lelei o le Alo o le Atua, ia fai ai ma tagata matua, e o‘o atu i le fua o le tagata matua e fa‘atatau i le tumu o Keriso.

¹⁴ ‘Ina ia lē toe tamaiti i tatou i le felafoa‘iina i peau ma fe‘avea‘iina i matagi o a‘oa‘oga a tagata pepelo, o e o lo‘o ta‘ita‘isesēina isi ‘iā latou lava togafiti.

¹⁵ ‘Ia tautala atu i le ‘upu moni i le alofa, ia tutupu ai i tatou ‘iā te ia i mea uma, o le ulu lava o ia, o ia fo‘i o Keriso;

¹⁶ e tupu mai ‘iā te ia le tino uma lava, o lo‘o fa‘atasia ma fa‘asoso‘oina ai i so‘oga e pei ‘ona saunia e ia. ‘Āfai e galulue vaega ‘ese‘ese o le tino e pei ‘ona tatau ai, o le a tupu le tino ‘atoa ma atiina a‘e ai i le alofa.

O le Ola fou ‘iā Keriso

¹⁷ O le mea lea ‘ou te fai atu ma ta‘utino atu i le Ali‘i, ‘aua ne‘i savavali ‘outou fa‘apei o Nu‘u ‘ese, o lo‘o savavali i le valea o latou loto.

¹⁸ O lo‘o fa‘apogisāina o latou mafaufau, ‘ua liliu‘ese i latou nai le ola o lo‘o i le Atua, ‘ona o le valea ‘ua ‘iā te i latou, ‘atoa ma le ma‘a‘a o latou loto.

¹⁹ ‘Ua lē lagona e i latou se ma; ‘ua tu‘uina atu i latou e i latou lava i le matāitu, ‘ua tu‘inanau fo‘i e fai amioga leaga ‘ese‘ese.

²⁰ ‘Ae lē o mea nā na a‘oa‘oina ai ‘outou ‘iā Keriso,

²¹ pe ‘āfai e moni na ‘outou fa‘alogologo ‘iā te ia, pe na a‘oa‘oina fo‘i ‘outou ‘iā te ia, e pei ‘ona i ai le ‘upu moni ‘iā Iesu.

²² ‘Ia fa‘aumatia o ‘outou olaga tuai na ‘outou ola ai, e tusa ma tu‘inanau leaga;

²³ a ‘ia toe fa‘afouina mana‘o o ‘outou loto;

²⁴ ma ‘ia fa‘a‘ofuina ‘outou i le tagata fou ‘ua faia i foliga o le Atua, i le amiotonu, ma le amio pa‘ia e fa‘amaoni.

²⁵ O le mea lea, ia tu‘u le pepelo, ia tautala atu tagata ta‘ito‘atasi i ē latou te tuā‘oi i le fa‘amaoni, auā o itūtino lava i tatou o le tasi i le isi.

²⁶ A ‘outou ita, ‘aua ne‘i agasala ai; ‘aua ne‘i goto le la o ‘outou o ita pea.

²⁷ ‘Aua fo‘i ne‘i tu‘uina atu se avanoa i le tiapolo.

²⁸ ‘Aua ne‘i toe gaoi le tagata gaoi; ia fa‘aaogāina e ia ‘ona lima i galuega aogā, ‘ina ‘ia maua ai e ia se mea e avatu i ē ‘ua matitiva.

²⁹ ‘Aua ne‘i tautala atu se ‘upu leaga i o ‘outou gutu, ‘ae tau lava o le ‘upu lelei e fa‘amafanafanaina ai, ‘ina ‘ia maua ai fo‘i le alofa tunoa e i latou o ē e fa‘alogologo ai.

³⁰ ‘Aua fo‘i le fa‘atigā i le Agaga Pa‘ia o le Atua, o lē ‘ua fa‘amaufa‘ailogaina ai ‘outou i le aso o le togiola.

³¹ ‘Ia tu‘u ‘ese e ‘outou ‘upu fa‘atigā ma le lotoa, ma le ita, ma le pisapisaō, ma ‘upu leaga, ‘atoa ma le lotoleaga uma lava;

³² ‘ia ‘outou feagaleleia‘i, ia matamau le tasi i le isi; ‘ia ‘outou fefa‘amāgaloa‘i fa‘apei ‘ona fa‘amāgaloina ‘outou e le Atua ‘iā Keriso.