Efeso 1 - Samoan Contemporary New Testament

O ‘Upu Fa‘afeiloa‘i

¹ O a‘u o Paulo, o le ‘aposetolo a Keriso Iesu e tusa ma le finagalo o le Atua, ‘ua ‘ou tusi atu i le au pa‘ia, o ē ‘ua fa‘atuatua fo‘i ‘iā Keriso Iesu.

² ‘Ia ‘iā te ‘outou le alofa tunoa ma le manuia mai le Atua lo tatou Tamā, ‘atoa ma le Ali‘i o Iesu Keriso.

O Fa‘amanuiaga Fa‘aleagaga ‘iā Keriso

³ ‘Ia tatou fa‘afetai atu i le Atua, le Tamā o lo tatou Ali‘i o Iesu Keriso, o lē na fa‘amanuia mai ia i tatou i fa‘amanuiaga fa‘aleagaga uma lava i mea o i le lagi ‘ona o Keriso.

⁴ A o le‘i foafoaina le lalolagi, na filifilia e ia i tatou ‘ona o Keriso, ‘ina ‘ia pa‘ia i tatou, ma ‘ia lē mata‘uleagaina i ona luma.

⁵ Na tofia e ia i tatou ‘ona o lona alofa, ‘ina ‘ia ‘avea i tatou ma ana tamafai ‘ona o Iesu Keriso, e tusa ma lona lava finagalo malie.

⁶ ‘Ia tatou vi‘ia o ia ‘ona o le mamalu o lona alofa tunoa na foa‘ifuaina mai e ia ‘iā i tatou ‘ona o lona Alo pele.

⁷ O ia ‘ua maua ai e i tatou le togiola i lona toto, o le fa‘amāgaloina o agasala e tusa ma le ‘oloa faula‘i o lona alofa tunoa.

⁸ ‘Ua foa‘i tele mai e ia ‘iā i tatou le poto ma le fa‘autauta.

⁹ ‘Ua fa‘ailoa mai e ia ‘iā i tatou le mea lilo o lona finagalo, e tusa ma lona finagalo malie na fa‘ataunu‘uina ai e ia ‘iā Keriso,

¹⁰ e pei o se fuafuaga mo le taimi e tatau ai; ma ‘ia feso‘ota‘i ‘iā Keriso mea uma lava, o mea i le lagi ma mea i le lalolagi.

¹¹ O ia fo‘i ‘ua maua ai e i matou le tofi, na fuafuaina e ia anamuā e tusa ma le finagalo o lē na galue i mea uma, e tusa ma le fa‘atonuga a lona lava finagalo,

¹² o i matou o ē na mua‘i fa‘amoemoe ‘iā Keriso, na filifili ma tofia i matou ia ola mo le vi‘iga o lona mamalu.

¹³ E fa‘apea fo‘i ‘outou, ‘ina ‘ia ‘outou fa‘alogo i le ‘upu moni o le Tala Lelei o lo ‘outou fa‘aolataga, ma fa‘atuatua ‘iā Keriso, ‘ua fa‘amaufa‘ailogaina i le Agaga Pa‘ia na folafolaina;

¹⁴ o le fa‘amaoni o ia o lo tatou tofi se‘ia o‘o ‘ina tatou maua o ia, ‘ina ‘ia vi‘ia ai lona mamalu.

O le Tatalo a Paulo

¹⁵ ‘Ona o lenei lava mea, ‘ina ‘ua ‘ou fa‘alogo i lo ‘outou fa‘atuatua i le Ali‘i o Iesu, ‘atoa ma lo ‘outou alofa i le au pa‘ia uma lava.

¹⁶ ‘Ua lē mapu ai ‘ona ‘ou fa‘afetai atu i le Atua ‘ona o ‘outou, ma manatua ‘outou i a‘u tatalo.

¹⁷ ‘Ina ‘ia foa‘i atu ‘iā te ‘outou e le Atua o lo tatou Ali‘i o Iesu Keriso, o le Tamā e ona le mamalu, le agaga o le poto ma fa‘aaliga, ‘ina ‘ia ‘outou iloa lelei ai o ia.

¹⁸ ‘Ia fa‘apupulaina mata o ‘outou loto, ma ‘ia ‘outou iloa le uiga o le fa‘amoemoe ‘ua i lona vala‘au mai, ma le uiga o le tele na‘uā o mea lelei o i lana tofiga ‘ua silisili mo le au pa‘ia,

¹⁹ ‘atoa ma le silisili ‘ese o lona mana e lē mafuafuaina, o lo‘o i totonu ‘iā te i tatou o ē ‘ua fa‘atuatua, e tusa ma galuega a lona mana tele lava.

²⁰ Na fa‘ataunu‘uina ‘iā Keriso ‘ina ‘ua toe fa‘atūina mai o ia e ia nai ē ‘ua oti, ma fa‘anofo ‘iā te ia i lona itū taumatau i le lagi,

²¹ E silisili lava o ia i ali‘i ma faipule, ma ē e malolosi, ma ali‘i sili, ma igoa uma lava e ta‘ua, e lē gata i le olaga nei ‘ae ‘atoa fo‘i ma le ola o le a o‘o mai.

²² ‘Ua tu‘uina fo‘i e ia mea uma lava i lalo o ona vae, ma ‘ua faia fo‘i o ia ma ulu o mea uma lava mo le ekalesia,

²³ o lona tino lea, o le tumu o ia o lē na te fa‘atūmuina mea uma lava i mea uma.