2 Ioane 1 - Samoan Contemporary New Testament

O le ‘Upu Tomua

¹ O le tusi lenei a le toeaina i le tama‘ita‘i ‘ua filifilia e le Atua, ma lana fānau ‘ou te alofa fa‘amaoni i ai. E lē na o a‘u, a o ē uma ‘ua iloa le ‘upu moni o lo‘o alolofa atu ‘iā te ia,

² auā ‘ua tumau ‘iā te i matou le ‘upu moni, ma o le a i ai pea ‘iā te i matou e fa‘avavau.

³ ‘Ia ‘iā te ‘outou le alofa tunoa, ma le alofa mutimutivale, ma le manuia mai le Atua le Tamā ‘atoa ma le Ali‘i o Iesu Keriso, o le Alo o le Tamā i le fa‘amaoni ‘atoa ma le alofa.

O le ‘Upu Moni ma le Alofa

⁴ ‘Ua ‘ou fiafia lava ‘ina ‘ua ‘ou maua nisi o a ‘outou fānau o lo‘o savavali i le ‘upu moni, e pei ‘ona poloa‘iina i matou e le Tamā.

⁵ O lenei le tama‘ita‘i e, ‘ou te ‘ai‘oi atu ‘iā te oe ‘ia tatou fealofani. E lē o se poloa‘iga fou ‘ou te tusi atu ai ‘iā te oe; o le poloa‘iga lava na tatou maua talu le amataga.

⁶ O lenei lava le alofa, ia savavali i tatou e tusa ma ana poloa‘iga. O le poloa‘iga lenei e pei ‘ona ‘outou fa‘alogo ai talu le amataga: ia ola i le alofa.

⁷ Auā e to‘atele o ē e fa‘asesē ‘ua ō atu i le lalolagi, o ē ‘ua lē taliaina le mea moni ‘ua maliu mai Iesu Keriso i le tino. O le fa‘asesē lava lenei ma anetikeriso.

⁸ ‘Ia ‘outou fa‘aeteete ‘iā te ‘outou lava, ne‘i maumau a ‘outou galuega na ‘outou galulue ai, a ‘ia maua e ‘outou lo ‘outou taui ‘ato‘atoa.

⁹ So o se isi e alu ‘ese i a‘oa‘oga a Keriso ‘ae lē tumau i ai, ‘ua lē ‘iā te ia le Atua. A o lē e tumau i le a‘oa‘oga ‘ua ‘iā te ia le Tamā ma le Alo.

¹⁰ ‘Āfai e alu atu se isi ‘iā te ‘outou ‘ae na te lē avatua lenei a‘oa‘oga, ‘aua ne‘i ‘outou taliaina o ia i o ‘outou ‘āiga; ‘aua fo‘i tou te fai atu i ai, “ ‘Ia manuia ‘outou.”

¹¹ Auā o sē e ofo atu ‘iā te ia, ‘ua ‘auai fa‘atasi o ia i ana galuega leaga.

O Toe ‘upu

¹² E tele mea ‘ou te fia fa‘aali atu ‘iā te ‘outou ‘ae ‘ou te lē mana‘o e fa‘aaogāina pepa ma le vaitusi; ‘ou te fa‘amoemoe ‘ou te alu atu ‘iā te ‘outou, ‘ia tatou fetautalatala‘i, ‘ina ‘ia ‘ato‘atoa ai lo ‘outou ‘oli‘oli.

¹³ O lo‘o alolofa atu ‘iā te oe le fānau a lou uso, o ē ‘ua filifilia fo‘i e le Atua.