Ɀireʋo 1 - Bhaibhiri Idzva rechiShona rine Dhuterokanonika

Chinangwa chebhuku rino

¹ Tsumo dzaSoromoni mwanakomana waDhavhidhi mambo weIsiraeri

² dzokuti vanhu vazive ungwaru nezvidzidzo kuti vanzwisise mashoko ezvakadzama,

³ dzinoitawo kuti munhu adzidze uchenjeri, ururami, noruenzaniso nokuva pachokwadi.

⁴ Kuitirawo kuti vanhuwo zvavo vapiwe uchenjeri nevechidiki kufunga.

⁵ Mungwaru achadzinzwawo agopamhidzira ruzivo anonzwisisa agowanawo mano.

⁶ Kuri kuitira kuti munhu anzwisise tsumo namadimikira uye mazwi avangwaru nezvirahwe zvavo.

⁷ Kutya Tenzi ndiko kutanga kworuzivo mapenzi anoshora ungwaru nechidzidziso.

I: MAZWI OKUSUMA UNGWARU Vechidiki sianai neshamwari dzakaipa

⁸ Mwanangu, teerera zvaunodzidziswa nababa vako. Usarambe zvaunorairwa naamai vako.

⁹ Zvichava tsungare yokushongedza musoro wako nayo nechuma chokushongedza huro yako nacho.

¹⁰ Mwanangu, vatadzi vakakunyengetedza kuita chinhu, usabvume.

¹¹ Kana vakati, “Uya tiende tindovandira vanhu tivauraye tindovhurumukira kuvarwisa vasina mhaka uye zvisina tsarukano

¹² sezvinoita nzvimbo yavafi tivamedze vari vapenyu vakangodaro sezvavakaita sezvinoita vanodzika muguva,

¹³ tichawana zvose zvakakosha tigozadza dzimba dzedu nezvinhu zvokupamba,

¹⁴ isa mugove wako kwatiri tive nechikwama chimwechete.”

¹⁵ Mwanangu, rega kufamba munzira navo usarege tsoka yako ichienda munzira dzavo

¹⁶ nokuti tsoka dzavo dzinomhanyira kuuipi uye vanokurumidza kudeura munhu ropa

¹⁷ nokuti hazvina zvazvinobatsira kuteya urimbo shiri dzichiona.

¹⁸ Vanhu ivava kutozvivandira ikoko kuti ivo vafe vanovandira kuparara kwoupenyu hwavo pachavo.

¹⁹ Iwoyu ndiwo mugumo wavose vanowana zvinhu nenzira isina kunaka zvinoparadza upenyu hwomuridzi wazvo.

Ungwaru hunoyambira vasina hanya nahwo

²⁰ Ungwaru hunodanidzira mumugwagwa hunoshevedzera pamisika.

²¹ Hunodaidzira zvikuru pamusoro petsvingo hunotaura mashoko ahwo huri kumusuo wedare reguta.

²² Nhaimi vasinganzwisisi muchasvika rinhi musinganzwisisi? Imi vashori kusvikira rinhiko muchifarira kunyomba uye muri mapenzi asingadi ruzivo?

²³ Teererai zvandinokutsiurai ini ndichazvikwengura ipfungwa dzangu kwamuri ndikuzivisei mashoko angu

²⁴ ndinodaro nokuti ndakadaidzira asi makaramba kudavira. Ndakatambanudza ruoko asi hapana akambotirimuka.

²⁵ Hauna kumboita hanya nemazano angu makaramba kuti ndikutsiurei.

²⁶ Kana neniwo ndichakusekai mupfumvu yenyu ndikusveveredzei kana mabatwa nokutya,

²⁷ kana kutya kwakuvhungai sedutu pfumvu yakuwirai sechamupupuri kuora mwoyo nokurwadziwa kwamonerana nemi.

²⁸ Vachandidaidza asi ini handipinduri vachanditsvagisisa asi havandiwani.

²⁹ Nokuti vakavenga ruzivo uye havana kusarudza kutya Tenzi.

³⁰ Havana kuita hanya nemazano angu vakashora kuvatsiura kwangu.

³¹ Ndizvozvo vachadya michero yemaitiro avo vagoguta netwavanonanga,

³² nokuti vasinganzwisisi vanouraiwa nokutsauka kwavo kushaya hanya kwamapenzi kunoauraya.

³³ Asi anonditeerera anogarika achava pamutambaratede wokusambotya chinhu chakaipa.